વડોદરામાં લગ્નમાં વર-વધુને મળેલા ગિફ્ટ્સની ચોરી, CCTVમાં 12 વર્ષનો ટેણિયો સામાન લઈને જતા દેખાયો

પાર્ટી પ્લોટમાંથી 1.50 લાખનો સામાન ચોરી
હરણી પોલીસ મથકમાં મદનમોહન શર્માએ નોંધાવેલી ફરિયાદ અનુસાર, તેઓ શ્રેણીક પાર્કમાં રહે છે અને રણોલી જીઆઇડીસીમાં પ્લાસ્ટીકની ફેક્ટરી ધરાવે છે. 9 ફેબ્રુઆરીના રોજ તેમના દિકરાના લગ્ન પ્રસંગ હતા. આ પ્રસંગ હરણી મોટનાથ રોડ પર આવેલા નક્ષત્ર પાર્ટી પ્લોટમાં આયોજિત કરવામાં આવ્યા હતા. નિમંત્રીત મહેમાનો મોટી સંખ્યામાં પાર્ટી પ્લોટમાં હાજર હતા. મહેમાનો વર-વધુને આશીર્વાદ આપવાની સાથે ભેટ-સોગાદો પણ આપતા હતા. આ બધી સોગાદોને એક બેગમાં મુકવામાં આવી હતી.

વડોદરામાં પાર્ટી-પ્લોટમાંથી વર-કન્યાને મળેલા મોંઘા ગિફ્ટની બેગ લઈને 12 વર્ષનો ટેણિયો ફરાર#Vadodara #CrimeNews #theft pic.twitter.com/ccGVaHbKrA

— Gujarat Tak (@GujaratTak) February 10, 2023

12 વર્ષનો ટેણિયો બેગ લઈને જતા દેખાયો
પ્રસંગ બાદ આ બેગ ગાયબ થયાનું ધ્યાને આવતા તમામ દોડતા થયા હતા. અને બેગની ભાળ મેળવવા માટે પાર્ટી પ્લોટના સીસીટીવી તપાસ્યા હતા. તેવામાં ધ્યાને આવ્યું કે, પ્રસંગ દરમિયાન 10-15 કલાકે આશરે 12 વર્ષની ઉંમરનો બાળક મહેમાનો દ્વારા વર-વધુને આપવામાં આવેલી ભેટ-સોગાદો ભરેલી બેગ લઇને પાર્ટી પ્લોટની બહાર નિકળતો દેખાયો હતો. આ થેલામાં કવર મળીને અંદાજીત રૂ. 1.50 લાખનો સામાન થયો હોવાનું અનુમાન છે. સમગ્ર મામલે હરણી પોલીસ મથકમાં ફરિયાદ નોંધાવતા પોલીસ એક્શનમાં આવી છે. અને બાળ તસ્કરની ભાળ મેળવવાની તજવીજ હાથ ધરી છે.