યુવરાજ સિંહ, પઠાણ અને ઉથપ્પા ફેઈલ, પાકિસ્તાન ચેમ્પિયન્સની સામે ઈન્ડિયા ચેમ્પિયન્સની કારમી હાર

કામરાન અને શરજીલની શાનદાર બેટિંગ

બર્મિંગહામમાં ભારતીય કેપ્ટન યુવરાજ સિંહે ટોસ જીતીને વિપક્ષી ટીમને પ્રથમ બેટિંગ માટે આમંત્રણ આપ્યું હતું. આ આમંત્રણને સ્વીકારીને પાકિસ્તાન ચેમ્પિયન્સની ટીમ 20 ઓવરમાં 4 વિકેટ ગુમાવીને 243 રન બનાવી શકી હતી. ટીમ માટે ઈનિંગની શરૂઆત કરતા વિકેટકીપર બેટ્સમેન કામરાન અકમલે 40 બોલમાં 9 ચોગ્ગા અને 4 છગ્ગાની મદદથી 77 રનની સૌથી વધુ અડધી સદી ફટકારી હતી. તેના સિવાય તેના પાર્ટનર શરજીલ ખાને માત્ર 30 બોલમાં 72 રનનું યોગદાન આપ્યું હતું. આ દરમિયાન તેના બેટમાંથી 7 ચોગ્ગા અને 5 છગ્ગા જોવા મળ્યા હતા.

આ બે બેટ્સમેન સિવાય પાકિસ્તાન માટે ત્રીજા સ્થાને બેટિંગ કરી રહેલા મકસૂદે 26 બોલમાં 51 રન બનાવ્યા અને ચોથા ક્રમે બેટિંગ કરી રહેલો શોએબ મલિક 18 બોલમાં અણનમ 25 રન ફટકારવામાં સફળ રહ્યો. ઈન્ડિયા ચેમ્પિયન્સ માટે આરપી સિંહ, અનુરીત સિંહ, ડી કુલકર્ણી અને નેગી અનુક્રમે 1-1 વિકેટ લેવામાં સફળ રહ્યા.

સુરેશ રૈના અને અંબાતી રાયડીએ આપી લડત

વિપક્ષી ટીમે આપેલા 244 રનના ટાર્ગેટનો પીછો કરતા ભારત તરફથી માત્ર સુરેશ રૈના અને અંબાતી રાયડુ થોડા સમય માટે વિરોધી બોલરોનો સામનો કરી શક્યા હતા. ટીમ માટે ત્રીજા નંબર પર બેટિંગ કરતા રૈનાએ કુલ 40 બોલનો સામનો કર્યો હતો. આ દરમિયાન તે 6 ચોગ્ગા અને 2 છગ્ગાની મદદથી 52 રનની અડધી સદીની ઇનિંગ રમવામાં સફળ રહ્યો હતો. તેના સિવાય રાયડુએ ઇનિંગની શરૂઆત કરતા 23 બોલમાં 39 રન બનાવ્યા હતા.

યુવરાજ સિંહ, પઠાણ અને ઉથપ્પા ફેઈલ

આ બે બેટ્સમેન સિવાય રોબિન ઉથપ્પા 12 બોલમાં 22, યુવરાજ સિંહ 11 બોલમાં 14, ઈરફાન પઠાણ 9 બોલમાં 15 અને યુસુફ પઠાણ શૂન્ય પર પાકિસ્તાન સામે આઉટ થયા હતા.

વિપક્ષી ટીમ માટે વહાબ રિયાઝ અને શોએબ મલિક અનુક્રમે 3-3 વિકેટ લેવામાં સફળ રહ્યા હતા. આ સિવાય સોહેલ તનવીર અને સોહેલ ખાને અનુક્રમે 1-1 વિકેટ લીધી હતી.