પટનામાં ભાજપની વિધાનસભા કૂચ દરમિયાન ભારે લાઠીચાર્જ, બીજેપી નેતાનું મોત

પોલીસના લાઠીચાર્જમાં ભાજપના નેતા વિજય ઘાયલ થયા હતા. તેને હોસ્પિટલ લઈ જવામાં આવ્યા હતા. ,જ્યાં ફરજ પરના ડોક્ટરોએ તેને મૃત જાહેર કર્યા હતા. આ ઘટના બાદ રાજકારણ ગરમાયું છે. ભાજપ અધ્યક્ષ જેપી નડ્ડાએ આ મામલે નીતિશ સરકારને ઘેરી છે.

બીજેપી અધ્યક્ષ જેપી નડ્ડાએ ટ્વીટ કર્યું છે. નડ્ડાએ કહ્યું કે, પટનામાં ભાજપના કાર્યકરો પર લાઠીચાર્જ રાજ્ય સરકારની નિષ્ફળતા અને ગુસ્સાનું પરિણામ છે. ભ્રષ્ટાચારના કિલ્લાને બચાવવા માટે મહાગઠબંધન સરકાર લોકશાહી પર પ્રહાર કરી રહી છે, બિહારના મુખ્યમંત્રી પણ જેની સામે ચાર્જશીટ દાખલ કરવામાં આવી છે તેને બચાવવા માટે તેમની નૈતિકતા પણ ભૂલી ગયા છે.

બીજેપી નેતા સુશીલ મોદીએ કહ્યું કે, પોલીસે લાઠીચાર્જ કર્યો, જેના કારણે વિજય કુમાર નીચે પડી ગયા. તેમની તબિયત બગાડવા લાગી અને તેને હોસ્પિટલ લઈ જવામાં આવ્યા. પરંતું તેમને બચાવી શકાયા નહી.

શિક્ષકની નિમણૂક મુદ્દે સરકાર સામે મોરચો
આ પહેલા ગુરુવારે પણ ગૃહમાં ભારે હોબાળો થયો હતો. શિક્ષકોની નિમણૂકનો મુદ્દો ઉઠતાં શાસક પક્ષ અને વિપક્ષ વચ્ચે ઉગ્ર બોલાચાલી થઈ હતી. ભાજપના સભ્યો વેલ પહોંચ્યા અને સરકારને ઘેરી અને પ્રદર્શન કર્યું, ત્યારબાદ ભાજપના બે ધારાસભ્યોને વિધાનસભામાંથી બહાર કાઢવામાં આવ્યા. બાદમાં રેલી કાઢી રહેલા ધારાસભ્યો અને આગેવાનો પર પોલીસે લાઠીચાર્જ કર્યો હતો.

ભાજપે ગુરુવારે નીતિશ સરકાર વિરુદ્ધ વિધાનસભા કૂચ બોલાવી છે. વિધાનસભાની કાર્યવાહી શરૂ થતાં જ ભાજપના ધારાસભ્યોએ ગૃહમાં હંગામો મચાવ્યો હતો. ડેપ્યુટી સીએમ તેજસ્વી યાદવને બરતરફ કરવાની માંગણીએ જોર પકડ્યું છે. ભાજપે ભ્રષ્ટાચાર, રોજગાર અને શિક્ષકની નિમણૂક પર પ્રશ્નો ઉઠાવ્યા અને ગૃહના વેલમાં પહોંચી ગયા.

ભાજપે વિધાનસભામાંથી વોકઆઉટ કર્યું
બાદમાં સ્પીકરના નિર્દેશ પર ભાજપના ધારાસભ્યો જીવેશ મિશ્રા અને શૈલેન્દ્રને ગૃહમાંથી બહાર કાઢવામાં આવ્યા હતા. માર્શલો બંને ધારાસભ્યોને બહાર લઈ ગયા હતા. બંનેએ સ્પીકરને શાસક પક્ષ માટે એકપક્ષીય પગલાં લેવાનો આરોપ લગાવ્યો. બાદમાં વિપક્ષના નેતા વિજય કુમાર સિંહાના નેતૃત્વમાં ભાજપના તમામ ધારાસભ્યોએ વિધાનસભામાંથી વોકઆઉટ કર્યું હતું.

ભાજપ દ્વારા વિધાનસભા માટે પદયાત્રા કાઢવામાં આવી રહી હતી.ગૃહની બહાર આવ્યા બાદ ભાજપના ધારાસભ્યો પહેલા ધરણા પર બેઠા હતા અને પછી ગાંધી મેદાન તરફ રવાના થયા હતા. બાદમાં ભાજપે ગાંધી મેદાનથી વિધાનસભા સુધી કૂચ શરૂ કરી હતી. આ દરમિયાન પોલીસે ડાક બંગલા ચોક પર ભાજપના નેતાઓ પર લાઠીચાર્જ કર્યો હતો.

ટીયર ગેસના છોડવામાં આવ્યા
બિહાર સરકાર વિરુદ્ધ વિરોધ પ્રદર્શન કરી રહેલા ભાજપના નેતાઓને વિખેરવા માટે સુરક્ષાકર્મીઓએ ચાર્જ સંભાળ્યો અને પાણીની તોપો અને ટીયર ગેસના શેલ છોડ્યા. જે બાદ લાઠીચાર્જ પણ કરવામાં આવ્યો હતો.

શિક્ષણ વિભાગમાં એક સપ્તાહની રજા
આ દરમિયાન, બિહાર શિક્ષણ વિભાગે એક આદેશ જારી કરીને આગામી એક સપ્તાહ માટે શિક્ષણ વિભાગના અધિકારીઓની રજા પર પ્રતિબંધ મૂક્યો છે. આદેશમાં કહેવામાં આવ્યું છે કે જિલ્લા શિક્ષણાધિકારી, જિલ્લા પ્રોગ્રામ ઓફિસર અને અન્ય અધિકારીઓની રજાઓ સ્થગિત કરી દેવામાં આવી છે. આ ઉપરાંત શિક્ષણ વિભાગના અધિકારીઓએ ખાસ સંજોગોમાં રજા લેવા માટે નાયબ સચિવ કે.કે.પાઠકની પરવાનગી લેવાની રહેશે. આંદોલનના કારણે શિક્ષણ વિભાગે આ પગલું ભરવું પડ્યું હતું.

ભાજપના ધારાસભ્યોએ એક દિવસ પહેલા ગૃહમાં ખુરશી તોડી
આ પહેલા બુધવારે પણ વિધાનસભામાં જબરદસ્ત હંગામો થયો હતો. આ દરમિયાન સીએમ નીતિશ કુમાર અને ડેપ્યુટી સીએમ તેજસ્વી યાદવ પણ હાજર હતા. વિધાનસભાની કાર્યવાહી દરમિયાન વિપક્ષના નેતા વિજય કુમાર સિન્હાએ સરકાર પર ભ્રષ્ટાચાર સાથે સમાધાન કરવાનો આરોપ લગાવ્યો. વિપક્ષે ગૃહમાં હોબાળો મચાવ્યો હતો. આ દરમિયાન ભાજપના ધારાસભ્યોએ હંગામો મચાવતા ગૃહમાં ખુરશી તોડી નાખી હતી.