ગુજરાતમાં સરકારી શિક્ષણની આવી છે હાલત! અરવલ્લીમાં ધો.5માં ભણતા બાળકોને કક્કો-બારક્ષરીમાં પણ ફાં ફાં

જાગૃત નાગરિકે બનાવ્યો વીડિયો
સોશિયલ મીડિયામાં અરવલ્લી જિલ્લાના ભિલોડામાં આવેલી ખેરંચા પ્રાથમિક શાળાનો વીડિયો વાઈરલ થયો છે. જાગૃત નાગરિક દ્વારા ઉતારેલા વીડિયોમાં તે ખેરંચાની પ્રાથમિક શાળાની મુલાકાત લે છે અને ત્યાં ભણતા વિદ્યાર્થીઓને સવાલ કરી રહ્યો છે. જેમાં તે બાળકોને તેમનું ધોરણ પૂછે છે અને બાદમાં કક્કો કે બારક્ષરી આવડે છે એમ પૂછે છે. જવાબમાં વિદ્યાર્થીઓ તેમને બંનેમાંથી એકપણ ન આવડતું હોવાનું કહે છે. સાથે જ વીડિયો ઉતારતા સમયે ક્લાસરૂમમાં કોઈ શિક્ષક પણ દેખાતા નથી.

અરવલ્લીમાં આવેલી ખેરંચા પ્રાથમિક શાળામાં ધો.5ના વિદ્યાર્થીઓને કક્કો-બારક્ષરી નથી આવડતા હોવાનો આક્ષેપ. સોશિયલ મીડિયામાં વીડિયો વાઈરલ થયો#Aravalli #GujaratSchool #Education #Student pic.twitter.com/qrEAJ3eams

— Gujarat Tak (@GujaratTak) July 19, 2023

અગાઉ પંચમહાલમાં ગણિતના શિક્ષકને દાખલો નહોતો આવડ્યો
વીડિયોમાં બાળકો તેમને ભણાવવા માટે શિક્ષક પણ ન આવતા હોવાનું કહે છે. ખેરંચાની પ્રાથમિક શાળામાં ખારી, વજાપુર, ખેરંચા સહિત આસપાસના ગામના વિદ્યાર્થીઓ અભ્યાસ કરવા માટે આવતા હોય છે. હાલમાં જ પંચમહાલના ઘોઘંબામાં પણ આ રીતે વીડિયો સામે આવ્યો હતો. જેમાં Dy DDO શાળાની ઓચિંતી મુલાકાતે પહોંચ્યા હતા. આ દરમિયાન તેમણે ગણિતના શિક્ષકને સવાલ પૂછ્યો હતો કે, 200ના 5 ટકા કેટલા થાય? જોકે બાળકોને શાળામાં ગણિત વિષય ભણાવનારા શિક્ષકને એટલી પણ જાણકારી નહોતી કે 200ના 5 ટકા કેટલા થાય.