ગુજરાતઃ એકાંતમાં પ્રણયલીલા કરતા કપલ્સ સાવધાન! ‘ગુફ્તગુ ગેંગ’ને કાયદાનો પાઠ

હેતાલી શાહ.આણંદઃ પ્રેમાલાપ કરવા કોઈ પણ જગ્યાએ કપલ એકાંતમાં બેસી જતા હોય છે. જોકે મોટાભાગના કપલના પ્રેમ પ્રકરણ ખાનગી હોય છે જે બહુ ઓછા લોકો જાણતા હોય છે, જેનો ફાયદો લૂંટારૂ ગેંગ સરળતાથી ઉઠાવી જાય છે. આવી જ એક લૂંટની ઘટના આણંદમાં બની છે. જ્યાં આણંદના અક્ષર ફાર્મ પાછળ એકાંતમાં બેસેલા કપલને પોલીસની નકલી ઓળખ આપીને કેટલાક શખ્સો દ્વારા લૂંટ આચરી હતી. જોકે કપલે પોલીસ કમ્પલેન નોંધાવતા પોલીસે તપાસ હાથ ધરી હતી અને ગણતરીના દિવસોમાં લૂંટ આચરનાર ત્રણ આરોપીઓને પોલીસે ઝડપી પાડ્યા છે. પોલીસે તેઓને કોર્ટમાં રજૂ કરતા કોર્ટે એક દિવસના રિમાન્ડ મંજુર કર્યા છે. ઉલ્લેખનીય છે કે ઘણા કપલને આવા તત્વો દ્વારા જીવનમાં ન ભુલાય તેવા અનુભવો પણ થયા છે. હત્યા, મારામારી, લૂંટ, બ્લેક મેઈલિંગ, દુષ્કર્મ સહિતની ઘટનાઓની શક્યતાઓને કારણે જવાબદારી સાથે પગલા લેવા જ હિતાવહ રહે છે.