ખુલ્લા વીજતારથી એક પરિવારના ત્રણ સભ્યો મોતની ચાદર ઓઢી ગયાઃ તાપીમાં કરુણ બનાવ

પોતાના જ ફેલાવેલા વીજતારમાં પરિવારને લાગ્યો કરંટ
તાપીના વલોડ તાલુકાના મોરદેવી ગામે બુધવારે અહીંના ખેડૂત ધીરુભાઈ કૂતરાભાઈ ચૌધરીના ઘરમાંથી વીજ કનેક્શન લઈને ખેતરની આસપાસ વીજ તાર ફરતા મુક્યા હતા. આ વીજ તાર એટલે મુક્યા હતા કે ત્યાં જંગલી ભૂંડથી પાકને નુકસાન થાય નહીં. પરંતુ અહીં ઘટના કાંઈક જુદી જ ઘટી ગઈ હતી. દરમિયાન ધિરુભાઈ તેમની પત્ની ક્રિષ્નાબેન અને પુત્ર દેવરામ ઉર્ઓફે શૈલેષ પણ અહીં જ રહે છે. રાત્રે પાણી વાળવા જતા પહેલા આમ તો તેઓ હંમેશા તારની સ્વીચ ઓફ કરીને જાય છે પરંતુ આજે જાણે કાળ બોલાવી રહ્યો હોય તેમ તેમનો પુત્ર સ્વીચ પાડવાનું ભૂલી ગયો. વહેલી સવારે ધીરુભાઈ પાણી વાળવા જાય છે ત્યાં જ જમીનના ભેજને કારણે તેમને કરંટ લાગે છે.

ગામમાં અરેરાટી વ્યાપી
ધીરુભાઈને કરંટ લાગ્યો અને તે તેમના પત્ની ક્રિષ્નાબેન જોઈ ગયા અને તેઓ તુરંત દોટ લગાવી તેમની પાસે પહોંચ્યા. તેમણે ઘણી બુમો પણ પાડી તો તેમનો પુત્ર પણ દોડ્યો. ક્રિષ્નાબેન તેમના પતિને બચાવવા ગયા અને તેમને પણ ત્યાં કરંટ લાગી ગયો તે પછી તેમને બચાવવા આવેલા પુત્રને પણ કરંટ લાગી ગયો હતો. આ કારણે ત્યાં જ તે ત્રણેય સભ્યોના મોત નિપજ્યા હતા. એક સાથે પરિવારના ત્રણ વ્યક્તિના મોતથી આખા ગામમાં એક અરેરાટીનો માહોલ ઊભો થયો હતો. પોલીસે ઘટના સ્થળે પહોંચી વધુ કાર્યવાહી શરૂ કરી છે.