મહેસાણાઃ ચાઈનીઝ દોરીનો ઘસરકો અને માંના ખોળે 4 વર્ષની દીકરીનું મોત, ગુજરાતમાં બે પરિવારમાં માતમ છવાયો

વડોદરાના જુવાન જોધ યુવકનું મોત
વડોદરાના છાણી સોખડા રોડ વિસ્તારમાં આવેલા નંદનગરમાં રહેતા 35 વર્ષીય યુવકને દશરથ બ્રિજ પરથી પસાર થતા વખતે પતંગની દોરી ગળે આવી ગઈ હતી. ગળાના ભાગેથી કપાઈ જતા યુવકનું મોત નિપજ્યું હતું. 35 વર્ષના આશાસ્પદ યુવકનું મોત થતા પરિવારમાં આક્રંદ છવાઈ ગયો છે. આ તરફ વિસનગરમાં એક પરિવારની માત્ર ચાર જ વર્ષની બાળકીનું ચાઈનીઝ દોરીથી મોત થયું છે. વિસનગરના કડી દરવાજા વિસ્તારની આ ઘટના છે જેમાં ચાર વર્ષની બાળકીનું મોત તેની માતાની આંખો સામે જ થયું છે.

બાળકીને તપાસતા જ ડોક્ટરે કહ્યું ‘સોરી’
વિસનગરના કડી દરવાજા નજીકથી એક માતા પોતાની ચાર વર્ષની દીકરીને તેડીને લઈ જઈ રહી હતી. દરમિયાન બાળકીના ગળામાં ચાઈનીઝ દોરી અટવાઈ ગઈ, બાળકની નાજુક ત્વચા અને નસો પર તેના કારણે ગંભીર ઈજાઓ થઈ હતી. બસ પછી તેની મદદ કરવા ઘણા આવ્યા અને આખરે તેને સારવાર માટે હોસ્પિટલ પણ લઈ જવાઈ હતી. જોકે ત્યાં હાજર ડોક્ટરે તપાસ તા જ બાળકીને મૃત જાહેર કરી હતી. માતા માટે અને આ વિસનગરના પરિવાર માટે આ કેટલી કરુણતા ભર્યો દિવસ છે તે કલ્પના માત્ર ધ્રુજાવનારી છે.