ગુજરાતમાં ઠંડીનો ચમકારો, બનાસકાંઠામાં ખેતરોમાં બરફની ચાદર છવાઈ, આબુમાં પાણી થીજી ગયું

બનાસકાંઠામાં ખેતરમાં બરફ જોઈ ખેડૂતો અચરજમાં
બનાસકાંઠા જિલ્લાના થરાદ તાલુકામાં આવેલા દુધવા, ડેલનકોટ તથા સુઈગામ તાલુકાના લીંબોળી ગામોમાં ખેતરમાં બરફ જામી ગયો છે. ખેતરમાં રાયડો, દિવેલા સહિતના પાકો પર રીતસરની બરફની ચાદર છવાઈ ગઈ હતી. કાતિલ ઠંડીના કારણે ખેડૂતોને જીરું, વરિયાળી, રાયડો સહિતના પાકોને પણ નુકસાનની ભીતિ સેવાઈ રહી છે. બનાસકાંઠામાં છેલ્લા 3 દિવસોથી હાડ થીજાવતી ઠંડી પડી રહી છે.

નલિયામાં 10 વર્ષમાં પહેલીવાર 1 ડિગ્રી જેટલું તાપમાન
ઉત્તરપૂર્વીય પવન ફૂંકાવાના કારણે મોટાભાગના શહેરોમાં 10 ડિગ્રીથી ઓછું તાપમાન નોંધાઈ રહ્યું છે. બીજી તરફ રાજ્યના નલિયામાં 10 વર્ષમાં પહેલીવાર તાપમાન 1 ડિગ્રી જેટલું નીચું નોંધાયું છે. ઠંડીથી બચવા માટે લોકો તાપણાનો સહારો લઈ રહ્યા છે. બીજી તરફ દિવસે પણ ઠંડીના કારણે સ્વેટર અને જેકેટ જેવા ગરમ કપડા પહેરવા પડે તેવી સ્થિતિ સર્જાઈ છે.

(વિથ ઈનપુટ: ધનેશ પરમાર અને શક્તિ રાજપૂત)