સરકારી મકાન લેવાની લાલચ પડી ભારે: એક-બે નહીં 78 લોકો સાથે લાખોની ઠગાઈ, સુરત પોલીસે આરોપીને ઝડપ્યો

PM આવાસમાં મકાનના નામે છેતરપિંડી

વડાપ્રધાન આવાસમાં મકાન મેળવવા માટે એક વ્યક્તિએ સુરત શહેરના 78 જેટલા લોકો પાસેથી 12 લાખ 60 હજાર રૂપિયા લીધા હતા, પરંતુ આ 78 લોકોને ન તો મકાન મળ્યું કે ન તો મકાનના નામે આપેલા પૈસા. અંતે પીડિતોએ પોલીસ સ્ટેશનનો સંપર્ક કર્યો અને પ્રધાનમંત્રી આવાસ યોજના હેઠળ સરકારી મકાન અપાવવાના નામે છેતરપિંડી કરનાર શખ્સ સામે  ગુનો નોંધાવ્યો. પોલીસે આ મામલે તત્પરતા દાખવી આરોપીની ધરપકડ કરી છે.

78 લોકોને જાળમાં ફસાવ્યા

સુરત ACP ચિરાગ પટેલે જણાવ્યું કે, સુરતના ઉધના પોલીસની ટીમે ઝડપાયેલા આ શખ્સનું નામ ઉપેન્દ્ર ઉર્ફે હરિઓમ જુરિયા વિસોઈ છે. 7 જાન્યુઆરી, 2013થી 5 જાન્યુઆરી, 2015 સુધી આ શખ્સે ગરીબ અને મધ્યમ વર્ગના લોકોને પ્રધાનમંત્રી આવાસ યોજના હેઠળ ઘર અપાવવાની લાલચ આપી હતી. તેની લાલચમાં વર્ષ 2013થી 2015 દરમિયાન સુરતના એક-બે નહીં પરંતુ 78 જેટલા લોકો ફસાઈ ગયા હતા અને મકાન મેળવવા માટે આ શખ્સને 12 લાખ 60 હજાર રૂપિયા એડવાન્સ પણ આપ્યા હતા. 

પોલીસે ઠગની કરી ધરપકડ

તેમણે કહ્યું કે, ઘણા વર્ષો વીતી ગયા હોવા છતાં ધરપકડ કરાયેલા આરોપી ઉપેન્દ્ર ઉર્ફે હરિઓમ જુરિયા વિસોઈએ ન તો લોકોને વડા પ્રધાનના આવાસમાં મકાનો આપ્યા હતા અને ન તો લોકો પાસેથી લીધેલા પૈસા પાછા આપ્યા. લગભગ 10 વર્ષ વીતી ગયા પછી છેતરપિંડીનો ભોગ બનેલા લોકોએ પોલીસનો સંપર્ક કર્યો અને મકાન અપાવવાના બહાને પૈસા પડાવી લેનારા આરોપી ઉપેન્દ્ર સામે ગુનો નોંધાવ્યો. સુરત ઉધના પોલીસની ટીમે ઉપેન્દ્ર વિસોઈની ધરપકડ કરી છે.

રિપોર્ટઃ સંજયસિંહ રાઠોડ, સુરત