9 લોકોના જીવ લેનારા તથ્ય પટેલ પર ગાળિયો કસાયો, હવે RTO વિભાગ પર મોટી કાર્યવાહી કરશે

તથ્ય પટેલનું લાઈસન્સ રદ કરાશે
બેફામ રીતે વાહન હંકારીને અકસ્માત કરનારા તથ્ય પટેલનું ડ્રાઈવિંગ લાઈસન્સ રદ કરવાની તજવીજ હાથ ધરવામાં આવી છે. અમદાવાદ RTO દ્વારા ટ્રાફિક પોલીસ પાસે ઓન પેપર તમામ વિગતો મગાવવામાં આવી છે. આ વિગતો મળ્યા બાદ RTO વિભાગ હિયરિંગ કરીને તથ્ય પટેલનું લાઈસન્સ રદ કરશે.

ત્રીજા અકસ્માતની વિગતો સામે આવતા નોંધાઈ વધુ એક FIR
તો ગઈકાલે જ તથ્ય પટેલ સામે અકસ્માત કેસમાં ત્રીજી FIR પણ નોંધાઈ છે. આ અકસ્માતની વિગતો મુજબ, સાંતેજ પોલીસ સ્ટેશનમાં તથ્ય પટેલ સામે વધુ એક FIR નોંધાઈ છે. જે મુજબ, વાંસજડા ગામના પૂર્વ સરપંચે આ ફરિયાદ નોંધાવી છે. ફરિયાદમાં કહેવાયું છે કે, 1લી જાન્યુઆરી 2023ના રોજ 3થી 5 વાગ્યાના અરસામાં એક કાર ચાલકે ગામના ભાગોળે મેઈન રોડ પર સાણંદ તરફ જતા બળીયાદેવ મંદિરના આગળના સાઈડના પિલ્લરને નુકસાન કર્યું હતું, જેથી મંદિરના ધાબાનો ભાગ નમી ગયો હતો અને મંદિરને રૂ.20,000નું નુકસાન કર્યું હતું. તાજેતરમાં સમાચાર પત્રોમાં વાંચતા જાણવા મળ્યું કે આ કાર ચાલક તથ્ય પટેલ હતો.