‘ઊભો થઈ જા અને રમ, હું બે વખત ડેંગ્યૂમાં રમ્યો છું’, IND-PAK મેચ પહેલા યુવરાજે ગિલને ફોન કર્યો

Yuvraj Singh Calls Gill: ODI વર્લ્ડ કપ 2023માં ભારતની આગામી મેચ પાકિસ્તાન સાથે છે. ભારતીય ટીમ સાત વર્ષ બાદ ઘરઆંગણે પાકિસ્તાન સામે રમી રહી છે. વિશ્વભરના ક્રિકેટ ચાહકો આ મેચ જોવા માટે ઉત્સાહિત છે. અમદાવાદના સ્ટેડિયમમાંથી એક લાખથી વધુ દર્શકો મેચ નિહાળશે. આ મેચ માટે બંને ટીમો અમદાવાદ પહોંચી છે અને પ્રેક્ટિસ કરી રહી છે. ભારતીય ઓપનિંગ બેટ્સમેન શુભમન ગિલ આ મેચ રમી શકે છે. ડેન્ગ્યુના કારણે તે ભારત માટે પ્રથમ બે મેચ રમી શક્યો નહોતો. આવી સ્થિતિમાં યુવરાજ સિંહે તેને ફોન કરીને મેચ રમવા માટે કહ્યું.

યુવરાજે ગિલને ફોન કર્યો

યુવરાજે એક ઈન્ટરવ્યુમાં જણાવ્યું કે, તેણે શુભમન ગિલને ફોન કરીને પાકિસ્તાન સામે રમવા માટે કહ્યું. યુવીએ ગિલને એમ પણ કહ્યું કે, તે પોતાની કારકિર્દીમાં બે વખત ડેન્ગ્યુથી સંક્રમિત હોવા છતાં રમ્યો હતો. આ પછી ગિલે ગુરુવારે અમદાવાદમાં એક કલાક પ્રેક્ટિસ પણ કરી હતી. હવે તેના પાકિસ્તાન સામેની મેચમાં રમવાની શક્યતાઓ ઘણી વધારે છે.

ગિલને મેચ રમવા માટે પ્રોત્સાહિત કર્યો

યુવરાજે ગિલને કહ્યું કે, પાકિસ્તાન સામેની મેચ મહત્વપૂર્ણ છે અને તેણે આ મેચ રમવી જોઈએ. યુવીએ કહ્યું, “મેં તેને ફોન કર્યો અને કહ્યું, ‘હું બે વખત ડેન્ગ્યુ સાથે રમ્યો છું, વર્લ્ડ કપમાં પણ મારી તબિયત સારી નહોતી. તો ઊભો થઈ જા અને રમ, કારણ કે આ ખૂબ જ મહત્વપૂર્ણ મેચ છે. આમ પણ જો તેને સારું લાગ્યું હોત તો તે રમ્યો હોત. પરંતુ વાયરલ કે ડેન્ગ્યુમાંથી સાજા થવું ખરેખર મુશ્કેલ છે. તે તમારા શરીરમાંથી બધું ચૂસી લે છે. મને લાગે છે કે તે ખરેખર મેચ રમવા માટે ઉત્સુક છે.”

આ દરમિયાન યુવરાજે ટીમ ઈન્ડિયાના ખૂબ વખાણ કર્યા. તેણે કહ્યું કે, ભારતે ઓસ્ટ્રેલિયા સામેની મેચ બે રનમાં ત્રણ વિકેટ ગુમાવીને જીતી લીધી હતી. આ સાથે જ આગલી મેચમાં રોહિતે એકતરફી જીત મેળવી હતી. ભારતીય ટીમ પણ દબાણની પરિસ્થિતિ માટે તૈયાર છે અને તમામ ખેલાડીઓ રન બનાવી રહ્યા છે. તેણે કહ્યું કે સેમિફાઇનલ અને ફાઇનલ મેચમાં દબાણ રહેશે. ટીમ આ માટે તૈયાર છે, તે સારી વાત છે.