શું Rohit Sharma વનડે અને ટેસ્ટ ક્રિકેટને પણ કહેશે અલવિદા? હિટમેને નિવૃત્તિ પર તોડ્યું મૌન

Rohit Sharma reveals retirement plans: રોહિત શર્માના નેતૃત્વમાં ભારતીય ટીમે ગયા મહિને T20 વર્લ્ડ કપ 2024નો ખિતાબ જીત્યો હતો. 29 જૂને કેન્સિંગ્ટન ઓવલ, બ્રિજટાઉનમાં રમાયેલી ફાઈનલ મેચમાં ભારતે દક્ષિણ આફ્રિકાને 7 રનથી હરાવ્યું હતું. ભારતીય ટીમે બીજી વખત T20 વર્લ્ડ કપ જીત્યો. આ પહેલા તેણે 2007ની સીઝનમાં પણ આ ખિતાબ જીત્યો હતો. ભારતની ટાઈટલ જીત્યા બાદ કેપ્ટન રોહિત શર્માએ T20 ઈન્ટરનેશનલમાંથી નિવૃત્તિ જાહેર કરી દીધી હતી. હવે T20 ઈન્ટરનેશનલમાંથી નિવૃત્તિ લીધા બાદ રોહિત શર્માના વનડે અને ટેસ્ટ કરિયરની પણ વાત થઈ રહી છે. રોહિત શર્માની ઉંમર 37 વર્ષથી વધુ છે, તેથી સૌથી મોટો પ્રશ્ન એ છે કે તે હજુ કેટલા વર્ષ આંતરરાષ્ટ્રીય ક્રિકેટ રમી શકશે. રોહિત વેસ્ટ ઈન્ડિઝમાં વર્લ્ડ કપ જીત્યા બાદ બ્રેક પર છે અને શ્રીલંકા સામે ત્રણ વનડે મેચ રમશે નહીં.

રોહિત શર્માએ નિવૃત્તિ વિશે શું કહ્યું?

 
જો કે, હવે રોહિતે સ્પષ્ટ કર્યું છે કે તે ટૂંક સમયમાં કોઈપણ સમયે નિવૃત્તિ લેવાનો નથી અને ચાહકો તેને હવે રમતા જોશે. રવિવારે ડલાસમાં એક કાર્યક્રમ દરમિયાન રોહિતને નિવૃત્તિ સંબંધિત પ્રશ્ન પૂછવામાં આવ્યો હતો. ભારતીય કેપ્ટને કહ્યું કે તે એવી વ્યક્તિ નથી જે બહુ આગળ વિચારે છે, પરંતુ તેનામાં હજુ ઘણું બાકી છે. રોહિત શર્માએ ક્રિકેટ અંગે કહ્યું કે, હું એવો વ્યક્તિ નથી કે જે ભવિષ્ય અંગે વધુ વિચાર કરે. ક્રિકેટરે 2024 T20 વર્લ્ડ કપમાં ભારતનું નેતૃત્વ કર્યા બાદ T20 ક્રિકેટમાંથી નિવૃત્તિ જાહેર કરી દીધી હતી. રોહિતના થોડા સમય પહેલા વિરાટ કોહલીએ T20 ઈન્ટરનેશનલમાંથી નિવૃત્તિ લીધી હતી, બાદમાં રવિન્દ્ર જાડેજા પણ આ ફોર્મેટમાંથી નિવૃત્તિ લેનારાઓની યાદીમાં સામેલ થયો હતો.

રોહિત શર્માનું ટેસ્ટ કર્યું

રોહિત શર્માએ અત્યાર સુધી 59 ટેસ્ટ મેચમાં 45.46ની એવરેજથી 4137 રન બનાવ્યા છે. જ્યારે હિટમેને 262 ODI મેચોમાં 49.12ની એવરેજથી 10709 રન બનાવ્યા છે. રોહિતે તેની T20 આંતરરાષ્ટ્રીય કારકિર્દીની 159 મેચોમાં 4231 રન બનાવ્યા છે. આંતરરાષ્ટ્રીય ક્રિકેટમાં રોહિતના નામે 12 વિકેટ પણ છે. રોહિત શર્માએ IPL 2024ની 14 મેચોમાં 150ના સ્ટ્રાઈક રેટ અને 32.08ની એવરેજથી 417 રન બનાવ્યા છે. રોહિતે IPLની કુલ 257 મેચમાં 6628 રન બનાવ્યા છે. આ સમયગાળા દરમિયાન તેની એવરેજ 29.72 અને સ્ટ્રાઈક રેટ 131.14 છે.

રોહિત શર્માની T20 આંતરરાષ્ટ્રીય કારકિર્દી

• 159 મેચ, 4231 રન, 32.05 એવરેજ
• 5 સદી, 32 અડધી સદી, 140.89 સ્ટ્રાઈક રેટ
• 383 ચોગ્ગા, 205 છગ્ગા

રોહિત શર્માની ODI આંતરરાષ્ટ્રીય કારકિર્દી

• 262 મેચ, 10709 રન, 49.12 એવરેજ
• 31 સદી, 55 અડધી સદી, 91.97 સ્ટ્રાઈક રેટ
• 994 ચોગ્ગા, 323 છગ્ગા

રોહિત શર્માની ટેસ્ટ કારકિર્દી

• 59 મેચ, 4137 રન, 45.46 એવરેજ
• 12 સદી, 17 અડધી સદી, 57.05 સ્ટ્રાઈક રેટ
• 452 ચોગ્ગા, 84 છગ્ગા