IPLનો સ્ટાર લગ્નના બંધનમાં બંધાયો, કાશ્મીરની યુવતીને પહેલી નજરમાં જ દિલ આપી બેઠો હતો

નવી દિલ્હી: ઈન્ડિયન પ્રીમિયર લીગ (IPL)ના સ્ટાર ખેલાડી સરફરાઝ ખાને લગ્ન કરી લીધા છે. મુંબઈમાં જન્મેલા 25 વર્ષીય સરફરાઝે એક કાશ્મીરી યુવતી સાથે લગ્ન કર્યા છે. સરફરાઝની દુલ્હનનું નામ રોમાના ઝહૂર છે. તેમના લગ્ન કાશ્મીરના શોપિયા જિલ્લાના પાશપોરા ગામમાં થયા હતા. સરફરાઝ ખાનના લગ્નના કેટલાક વીડિયો અને ફોટો સામે આવ્યા છે. સરફરાઝ ખાન ડોમેસ્ટિક ક્રિકેટનો સ્ટાર ખેલાડી છે. તેણે ઈન્ડિયન પ્રીમિયર લીગ (આઈપીએલ)માં પણ ધૂમ મચાવી છે. હાલમાં તે દિલ્હી કેપિટલ્સ તરફથી રમે છે. પરંતુ કમનસીબે સારું પ્રદર્શન કરવા છતાં સરફરાઝ ભારતીય ટીમમાં સ્થાન મેળવી શક્યો ન હતો.

સરફરાઝે હજુ સુધી આંતરરાષ્ટ્રીય ક્રિકેટમાં ડેબ્યુ કર્યું નથી. તે ભારતીય અંડર-19 ટીમ માટે ક્રિકેટ રમી ચૂક્યો છે. જ્યારે IPLમાં તે પંજાબ કિંગ્સ (PBKS) અને રોયલ ચેલેન્જર્સ બેંગ્લોર (RCB) તરફથી પણ રમી ચૂક્યો છે. સરફરાઝ લગ્ન દરમિયાન બ્લેક ડ્રેસમાં જોવા મળ્યો હતો. જ્યારે તેની દુલ્હનએ લાલ અને ગોલ્ડન રંગનો લહેંગા પહેર્યો હતો.

સ્ટાર ક્રિકેટર સરફરાઝે આ લગ્ન ગુપ્ત રીતે કર્યા છે. પરંતુ તેમના લગ્નના કેટલાક વીડિયો અને ફોટો સામે આવ્યા છે. એક વીડિયોમાં સરફરાઝ પહેલા તેની દુલ્હનનો પડદો ઉઠાવે છે. આ પછી, તેને વીંટી પણ પહેરવામાં આવે છે. આ દરમિયાન, સરફરાઝ તેની દુલ્હનના માથા પર ચુંબન કરે છે. આ પછી, તેની દુલ્હન, જે સુંદર લહેંગામાં જોવા મળી હતી, તે પણ વીંટી પહેરાવે છે.

સરફરાઝની લવસ્ટોરીની શરૂઆત આ રીતે થઈ હતી

રોમાના ઝહૂરના માતા-પિતા અને બહેનના કેટલાક વીડિયો પણ સામે આવ્યા છે. આ વીડિયોમાં તેના પિતા અને બહેને જણાવ્યું છે કે કેવી રીતે રોમાના સરફરાઝને દિલ્હીમાં મળી અને બંને વચ્ચે મિત્રતા અને પછી પ્રેમ થયો. આ પછી સરફરાઝના પરિવારજનોએ લગ્નનો પ્રસ્તાવ લઈને ગયા હતા. અહીંથી જ વાત બની અને બંને એકબીજાના બની ગયા.

રોમાનાની બહેને કહ્યું કે, અમને બિલકુલ અપેક્ષા નહોતી કે આટલો સારો સંબંધ આવશે. તેણે જણાવ્યું કે રોમાના દિલ્હીમાં MSC નો અભ્યાસ કરતી હતી. સરફરાઝનો પિતરાઈ ભાઈ પણ રોમાના સાથે ભણતો હતો. રોમાના એક વાર મેચ જોવા ગઈ. પિતરાઈ ભાઈએ જ સરફરાજને રોમાના સાથે પરિચય કરાવ્યો હતો. આ પછી સરફરાઝે પિતરાઈ ભાઈને સીધું જ કહી દીધું હતું કે તેને રોમાના સાથે લગ્ન કરવા છે. આ પછી મામલો પરિવાર સુધી પહોંચ્યો અને આ સંબંધ નક્કી થઈ ગયો.