આ સુપરસ્ટાર બનશે ભારતનો આગામી T20 કેપ્ટન, 2026 WC સુધી જવાબદારી, હાર્દિક રેસમાંથી બહાર!

Indian T20I Team: ભારતીય ક્રિકેટ ટીમને શ્રીલંકા પ્રવાસથી T20 ફોર્મેટમાં નવો કાયમી કેપ્ટન મળી શકે છે. પરંતુ હાર્દિક પંડ્યાને આ જવાબદારી નહીં મળે. મુખ્ય કોચ ગૌતમ ગંભીર અને મુખ્ય પસંદગીકાર અજીત અગરકર આ ઓલરાઉન્ડરની જગ્યાએ સૂર્યકુમાર યાદવને ભારતીય T20 ટીમનો કેપ્ટન બનાવી શકે છે. તેને આ જવાબદારી 2026ના T20 વર્લ્ડ કપ સુધી મળવાની આશા છે. ટી20 વર્લ્ડ કપ 2024માં હાર્દિક ભારતનો વાઇસ કેપ્ટન હતો. અગાઉ, તે 2022 ટી20 વર્લ્ડ કપ પછી ટીમનું નેતૃત્વ કરી રહ્યો હતો. આવી સ્થિતિમાં રોહિત શર્માની નિવૃત્તિ બાદ હાર્દિકને નવા કેપ્ટન તરીકે ગણવામાં આવી રહ્યો હતો પરંતુ હવે તે પાછળ છૂટતો હોય તેવું લાગી રહ્યું છે. સમાચાર એજન્સી PTIએ આ અહેવાલ આપ્યો છે.

ગંભીર-અગરકરે હાર્દિક સાથે વાત કરી?

PTIએ લખ્યું છે કે, ગંભીર અને અગરકર બંનેએ કેપ્ટન બનાવવાની યોજનામાં ફેરફારને લઈને પંડ્યા સાથે 16 જુલાઈની સાંજે વાત કરી હતી. તેને સમજાવવામાં આવ્યું કે, સ્થિરતા પ્રદાન કરવા માટે લાંબા ગાળાનો વિકલ્પ પસંદ કરવામાં આવ્યો છે.