IND vs ENG Test: ભારતીય ટીમને મોટો ઝટકો લાગ્યો... ત્રીજી ટેસ્ટમાંથી આ સ્ટાર પ્લેયર બહાર થયો

KL Rahul, IND vs ENG Rajkot Test: ઈંગ્લેન્ડ સામેની ત્રીજી ટેસ્ટ મેચ પહેલા ભારતીય ક્રિકેટ ટીમને વધુ એક મોટો ફટકો પડ્યો છે. આ ઝટકો સ્ટાર ખેલાડી કેએલ રાહુલે આપ્યો છે. ઈજાથી પરેશાન રાહુલ ત્રીજી ટેસ્ટમાં પણ નહીં રમે. તમને જણાવી દઈએ કે ભારત અને ઈંગ્લેન્ડ વચ્ચે ત્રીજી ટેસ્ટ મેચ 15 ફેબ્રુઆરીથી રાજકોટમાં રમાશે. કેએલ રાહુલની જગ્યાએ દેવદત્ત પડિકલને ટીમમાં સામેલ કરવામાં આવી શકે છે.

ભારતીય ટીમ અને ઈંગ્લેન્ડ વચ્ચે રમાઈ રહેલી આ 5 મેચની ટેસ્ટ સિરીઝ હાલમાં 1-1 થી બરાબર છે. કેએલ રાહુલે પ્રથમ ટેસ્ટ રમી હતી, જેમાં તે ઈજાગ્રસ્ત થયો હતો. પ્રથમ ટેસ્ટ દરમિયાન રાહુલે જમણી જાંઘમાં દુખાવાની ફરિયાદ કરી હતી. આ પછી તે બીજી ટેસ્ટમાંથી બહાર થઈ ગયો હતો. હવે ત્રીજી ટેસ્ટમાં પણ નહીં રમે.

રાહુલ અને જાડેજાએ ફિટનેસ સાબિત કરવાની રહેશે

તાજેતરમાં, ભારતીય ક્રિકેટ કંટ્રોલ બોર્ડ (BCCI) એ ઈંગ્લેન્ડ સામેની આ શ્રેણીની છેલ્લી 3 ટેસ્ટ મેચો માટે તેની 17 સભ્યોની ટીમની જાહેરાત કરી હતી. તેમાં વિરાટ કોહલીનું નામ નહોતું, જેણે અંગત કારણોસર બ્રેક લીધો છે.

BCCIએ સ્પષ્ટ કહ્યું હતું કે, રાહુલ અને રવીન્દ્ર જાડેજા ઈજા બાદ પરત ફરી રહ્યા છે. તેમણે પોતાની ફિટનેસ સાબિત કરવી પડશે, તો જ તે મેચ રમી શકશે. આશા છે કે તે ચોથી ટેસ્ટમાં રમી શકશે.

રાહુલ ફિટનેસ ટેસ્ટ પાસ કરી શક્યો ન હતો

તમને જણાવી દઈએ કે મોટાભાગના ભારતીય ખેલાડીઓ ત્રીજી ટેસ્ટ મેચ માટે 12 ફેબ્રુઆરીએ રાજકોટ પહોંચ્યા હતા અને ટ્રેનિંગ શરૂ કરી હતી. 13મી ફેબ્રુઆરીએ પ્રેક્ટિસ સેશન થશે. સૂત્રોના જણાવ્યા અનુસાર રાહુલ ફિટનેસ ટેસ્ટ પાસ કરી શક્યો નથી.

BCCIની મેડિકલ ટીમે પસંદગીકારોને કહ્યું છે કે, રાહુલને ઓછામાં ઓછા એક સપ્તાહ સુધી ઓબ્ઝર્વેશનમાં રહેવું પડશે. આ પછી જ તે ચોથી ટેસ્ટમાં રમી શકશે કે કેમ તે અંગે નિર્ણય લેવામાં આવશે.

છેલ્લી ત્રણ ટેસ્ટ મેચ માટે ભારતીય ટીમઃ

રોહિત શર્મા (કેપ્ટન), જસપ્રિત બુમરાહ (વાઈસ-કેપ્ટન), યશસ્વી જયસ્વાલ, શુભમન ગિલ, કેએલ રાહુલ*, રજત પાટીદાર, સરફરાઝ ખાન, ધ્રુવ જુરેલ (વિકેટકીપર), કેએસ ભરત (વિકેટકીપર), આર અશ્વિન, રવિન્દ્ર જાડેજા*, અક્ષર પટેલ, વોશિંગ્ટન સુંદર, કુલદીપ યાદવ, મોહમ્મદ સિરાજ, મુકેશ કુમાર, આકાશ દીપ.

ભારત Vs ઈંગ્લેન્ડ ટેસ્ટ શ્રેણી શેડ્યૂલ

1લી ટેસ્ટ: 25-29 જાન્યુઆરી, હૈદરાબાદ (ઇંગ્લેન્ડ 28 રનથી જીત્યું)
બીજી ટેસ્ટ: 2-6 ફેબ્રુઆરી, વિશાખાપટ્ટનમ (ભારત 106 રનથી જીત્યું)
ત્રીજી ટેસ્ટ: 15-19 ફેબ્રુઆરી, રાજકોટ
4થી ટેસ્ટ: 23-27 ફેબ્રુઆરી, રાંચી
5મી ટેસ્ટ: 7-11 માર્ચ, ધર્મશાલા