ICC Ranking News: ટીમ ઈન્ડિયા વન-ડે, ટી-20 અને ટેસ્ટમાં નં.1, ટોપ-10 રેન્કિંગમાં ભારતીય ખેલાડીઓ છવાયા

ODI World Cup 2023: ODI વર્લ્ડ કપ 2023માં (ODI World Cup 2023) અત્યાર સુધીની તમામ 8 મેચો જીતીને સેમિફાઇનલમાં પહોંચેલી ભારતીય ટીમે ICC રેન્કિંગમાં પણ હલચલ મચાવી દીધી છે. માત્ર ટીમ જ નહીં પરંતુ ભારતીય ખેલાડીઓએ પણ તમામને હરાવીને નંબર-1નું સ્થાન કબજે કર્યું છે.

હકીકતમાં, ટેસ્ટ હોય, ODI હોય કે T20… ભારતીય ટીમ ત્રણેય ફોર્મેટમાં ICC રેન્કિંગમાં ટોચ પર છે. ઇંગ્લેન્ડ ટી-20માં બીજા સ્થાને ઘણું પાછળ છે. જ્યારે ODIમાં બીજા સ્થાને રહેલું ઓસ્ટ્રેલિયા પણ તેની આસપાસ નથી. જો કે ટેસ્ટમાં ભારત અને ઓસ્ટ્રેલિયાના 118 પોઈન્ટ છે, પરંતુ ઓછી મેચ રમવાના આધારે ભારતીય ટીમ ટોપ પર છે.

ભારતીય ટીમે અત્યાર સુધી વર્લ્ડ કપમાં ઓસ્ટ્રેલિયા, ન્યુઝીલેન્ડ, ઈંગ્લેન્ડ, પાકિસ્તાન, બાંગ્લાદેશ, શ્રીલંકા, દક્ષિણ આફ્રિકા અને અફઘાનિસ્તાનને હરાવ્યા છે. આ તમામ જીત સાથે, રોહિત શર્માની કપ્તાની હેઠળની ભારતીય ટીમે પોઈન્ટ ટેબલમાં 16 પોઈન્ટ સાથે પોતાનું ટોચનું સ્થાન નિશ્ચિત કરી લીધું છે. એટલે કે વર્લ્ડ કપમાં પણ ભારત નંબર-1 છે.

ICC રેન્કિંગમાં ભારતીય ટીમ અને ખેલાડીઓ

નંબર-1 ODI ટીમ: ભારત
નંબર-1 ટેસ્ટ ટીમઃ ભારત
નંબર-1 T20 ટીમ: ભારત

નંબર-1 ODI બેટ્સમેનઃ શુભમન ગિલ
નંબર-1 T20 બેટ્સમેનઃ સૂર્યકુમાર યાદવ

નંબર-1 ODI બોલરઃ મોહમ્મદ સિરાજ
નંબર-1 ટેસ્ટ બોલરઃ રવિચંદ્રન અશ્વિન

નંબર-1 ટેસ્ટ ઓલરાઉન્ડરઃ રવિન્દ્ર જાડેજા

શુભમન ગિલ અને સિરાજ ODI રેન્કિંગમાં ચમક્યા

ટીમ સિવાય ભારતીય બેટ્સમેનો અને બોલર્સે પણ દરેક ફોર્મેટની રેન્કિંગમાં પોતાનો દબદબો જાળવી રાખ્યો છે. બુધવારે (8 નવેમ્બર) જ સ્ટાર ઓપનિંગ બેટ્સમેન શુભમન ગિલ (830 પોઈન્ટ) પાકિસ્તાની કેપ્ટન બાબર આઝમ (824 પોઈન્ટ)ને હરાવીને નંબર-1 ODI રેન્કિંગ હાંસલ કરી છે. વનડેમાં બેટ્સમેનોની રેન્કિંગમાં વિરાટ કોહલી નંબર-4 અને કેપ્ટન રોહિત શર્મા નંબર-6 પર છે.

બીજી તરફ, ODI બોલરોની રેન્કિંગમાં મોહમ્મદ સિરાજ (709 પોઈન્ટ) એ પાકિસ્તાનના સ્ટાર ફાસ્ટ બોલર શાહીન આફ્રિદીને હરાવીને નંબર-1નું સ્થાન મેળવ્યું છે. જ્યારે ODIમાં બોલરોની રેન્કિંગમાં કુલદીપ યાદવ નંબર-4, જસપ્રિત બુમરાહ નંબર-8 અને મોહમ્મદ શમી નંબર-10 પર છે.

ODI રેન્કિંગમાં ભારતીય ટીમ અને ખેલાડીઓ:

નંબર-1 ટીમ – ભારત
નંબર-1 બેટ્સમેનઃ શુભમન ગિલ
નંબર-1 બોલરઃ મોહમ્મદ સિરાજ

નંબર-4 બેટ્સમેનઃ વિરાટ કોહલી
નંબર-4 બોલર: કુલદીપ યાદવ

નંબર-6 બેટ્સમેનઃ રોહિત શર્મા

નંબર-8 બોલરઃ જસપ્રીત બુમરાહ
નંબર-10 બોલરઃ મોહમ્મદ શમી
નંબર-10 ઓલરાઉન્ડરઃ રવિન્દ્ર જાડેજા

સૂર્યકુમાર T20 રેન્કિંગમાં નંબર 1 પર યથાવત

બીજી તરફ, સૂર્યકુમાર યાદવ T20 બેટિંગ રેન્કિંગમાં નંબર-1 પર યથાવત છે. તેના સિવાય બેટ્સમેન અને બોલિંગમાં ટોપ-10માં અન્ય કોઈ ભારતીય નથી. બેટ્સમેનોની ટેસ્ટ રેન્કિંગમાં પણ માત્ર રોહિત શર્મા 759 પોઈન્ટ સાથે 10મા સ્થાને છે. રવિચંદ્રન અશ્વિન ટેસ્ટ બોલિંગ રેન્કિંગમાં નંબર-1 પર છે. રવિન્દ્ર જાડેજા ત્રીજા નંબરે અને જસપ્રિત બુમરાહ 10માં નંબરે છે. જ્યારે ટેસ્ટ ઓલરાઉન્ડરોમાં રવિન્દ્ર જાડેજા ટોપ પર છે. અશ્વિન નંબર-2 અને અક્ષર પટેલ નંબર-5 પર છે.