લોન લઈને ચૂંટણી લડી, BJP-કોંગ્રેસના ઉમેદવારોને હરાવ્યા, મજૂરનો દીકરો બાઈકથી વિધાનસભા પહોંચ્યો

MP Ratlam News: મધ્યપ્રદેશ વિધાનસભા ચૂંટણી 2023ના (MP Assembly Election 2023) પરિણામો ચોંકાવનારા રહ્યા. આ ઉપરાંત કેટલાક નામ એવા છે જેમણે ચૂંટણી જીતીને બધાને ચોંકાવી દીધા છે. તેમાંથી એક નામ કમલેશ ડોડિયારનું (Kamlesh Dodiyar) છે, જેમણે રતલામની સાયલાણા બેઠક પરથી જીતીને સૌને ચોંકાવી દીધા હતા.

12 લાખની લોન લઈને ચૂંટણી લડી

વાસ્તવમાં, કમલેશ ડોડિયારે ભારત આદિવાસી પાર્ટીમાંથી (BAP) ચૂંટણી લડતા કોંગ્રેસના ઉમેદવાર હર્ષ વિજયને હરાવ્યા છે. ખાસ વાત એ છે કે કમલેશ ડોડિયારે 12 લાખ રૂપિયાની લોન લઈને વિધાનસભાની ચૂંટણી લડી હતી અને તેમના માતા-પિતા બંને મજૂરી કામ કરે છે. નબળી આર્થિક સ્થિતિને કારણે ધારાસભ્ય કમલેશને રતલામથી ભોપાલ વિધાનસભા સુધી 350 કિમીની મુસાફરી બાઇક પર કરવી પડી.

બાઈકથી 350 કિમીની મુસાફરી કરી

ગુરુવારે મધ્ય પ્રદેશની રાજધાની ભોપાલ વિધાનસભા ભવન પહોંચેલા ભારત આદિવાસી પાર્ટીના ધારાસભ્ય કમલેશ ડોડિયારે કહ્યું કે, તેમની પાસે પૈસા નથી અને તેમણે લોન લઈને ચૂંટણી લડી છે, તેથી તેમની આર્થિક સ્થિતિ નબળી છે. બસ અને ટ્રેનમાં મુસાફરી કરવામાં ઘણો સમય લાગે છે, તેથી તેમણે બાઇક દ્વારા 350 કિલોમીટરની મુસાફરી કરી.

વિધાનસભામાં MLA લખેલું બાઈક જોઈ અધિકારી ચોંક્યા

કમલેશ ડોડિયાર જ્યારે વિધાનસભામાં પોતાના દસ્તાવેજો જમા કરાવવા ભોપાલ પહોંચ્યા ત્યારે તેમને જોઈને વિધાનસભા બિલ્ડિંગના કર્મચારીઓ આશ્ચર્યચકિત થઈ ગયા. વાસ્તવમાં કમલેશ ડોડિયાર કાળા રંગની સ્પ્લેન્ડર બાઇક પર વિધાનસભા ભવન પહોંચ્યા હતા. ધારાસભ્યને બાઇક પર આવતા જોઈ કર્મચારીઓ આશ્ચર્યચકિત થઈ ગયા હતા. કમલેશની બાઇક પર અંગ્રેજીમાં MLA લખેલું હતું.

ભાજપ-કોંગ્રેસના ઉમેદવારોને હરાવ્યા

સાંભળવામાં અને જોવામાં અજીબ લાગે છે, પરંતુ કમલેશ્વર ડોડિયાર 12 લાખની લોન લઈને ચૂંટણી લડ્યા છે, તેમણે કોંગ્રેસના ઉમેદવાર હર્ષ વિજય ગેહલોતને 4618 મતોથી હરાવ્યા છે. કમલેશ્વરને 71,219 વોટ અને હર્ષ વિજયને 66,601 વોટ મળ્યા. ભાજપના સંગીતા ચારેલ ત્રીજા ક્રમે રહ્યા હતા. રાજ્યમાં સૌથી વધુ મતદાન આ બેઠક પર (90.08%) નોંધાયું હતું.