અમેરિકાના ફર્સ્ટ લેડી ઝિલ બાઇડેનનો કોરોના પોઝિટિવ, 2 દિવસ બાદ ભારત આવવાના હતા

Jill Bidon News: અમેરિકી રાષ્ટ્રપતિ જો બાઇડેન અને ફર્સ્ટ લેડી ઝિલ બાઇડેન બે દિવસ બાદ ભારતમાં જી-20 સમિટમાં ભાગ લેવાના હતા. આ પહેલા બંનેનો કોવિડ રિપોર્ટ આવી ગયો છે. જેમાં ફર્સ્ટ લેડી ઝિલ બાઇડેન કોરોના સંક્રમિત જોવા મળી છે. તે જ સમયે, રાષ્ટ્રપતિ બાઇડેનનો રિપોર્ટ નેગેટિવ આવ્યો છે.

જોકે ફર્સ્ટ લેડી ઓફિસનું કહેવું છે કે તેમનામાં કોવિડના કોઈ લક્ષણો નથી. આ દરમિયાન, તે ડેલાવેરમાં તેમના નિવાસસ્થાને રહેશે. તેમના કોમ્યુનિકેશન ડિરેક્ટરે એક નિવેદનમાં કહ્યું કે વ્હાઇટ હાઉસ મેડિકલ યુનિટે નજીકના લોકોને આ અંગે જાણ કરી છે.

સાઉથ કેરોલિનામાં રાષ્ટ્રપતિ સાથે વેકેશન દરમિયાન 16 ઓગસ્ટના રોજ 71 વર્ષીય ઝિલ બાઇડેન પ્રથમ વખત કોવિડ પોઝીટીવ હોવાનું જાણવા મળ્યું હતું. તે 5 દિવસથી ક્વોરેન્ટાઈનમાં હતા. કોવિડ રિપોર્ટ આવ્યા બાદ તે રાષ્ટ્રપતિ સાથે જોડાવા માટે રવાના થઈ ગઈ.

7 સપ્ટેમ્બરે ભારત આવવાના હતા ફર્સ્ટ લેડી

રાષ્ટ્રપતિ બાઇડેન અને ફર્સ્ટ લેડી જીલ બાઇડેન 7 સપ્ટેમ્બરે G-20 સમિટમાં ભાગ લેવા ભારત આવવાના હતા. વ્હાઇટ હાઉસ દ્વારા કહેવામાં આવ્યું હતું કે, રાષ્ટ્રપતિ બાઇડેન 8 સપ્ટેમ્બરે વડાપ્રધાન મોદી સાથે દ્વિપક્ષીય વાતચીત કરશે. તેઓ G-20ના નેતૃત્વ માટે મોદીની પ્રશંસા કરશે. આ ઉપરાંત, તે 9-10 સપ્ટેમ્બરના રોજ G-20 સંમેલનમાં ભાગ લેશે, જ્યાં તે અન્ય G-20 ભાગીદારો સાથે સ્વચ્છ ઉર્જા અને જળવાયુ પરિવર્તન જેવા ઘણા વૈશ્વિક મુદ્દાઓ પર ચર્ચા કરશે.

વ્હાઇટ હાઉસે કહ્યું કે, તે યુક્રેનમાં રશિયાના રાષ્ટ્રપતિ પુતિનના યુદ્ધની આર્થિક અને સામાજિક અસરોને ઘટાડવાનો પ્રયાસ કરશે અને ગરીબી સામે વધુ સારી રીતે લડવા માટે વિશ્વ બેંક સહિત બહુપક્ષીય વિકાસ બેંકોની ક્ષમતા વધારવા પર ચર્ચા કરી શકાય છે.

બાઇડેન ભારતથી સીધા વિયેતનામ જવા રવાના થશે

આ પછી બાઇડેન 10 સપ્ટેમ્બરે વિયેતનામ જવા રવાના થશે. તેઓ વિયેતનામના હનોઈમાં જનરલ સેક્રેટરી ગુયેન ફુ ટ્રોંગ અને અન્ય અગ્રણી નેતાઓ સાથે ચર્ચા કરશે. આ દરમિયાન અમેરિકા અને વિયેતનામ વચ્ચે સહયોગ વધારવા પર ચર્ચા થશે.