ગ્રીસથી સીધા બેંગલુરુ પહોંચ્યા PM મોદી, ISROના ‘ચંદ્રવિજયી’ વૈજ્ઞાનિકો સાથે કરશે મુલાકાત

PM Modi at ISRO: વડાપ્રધાન નરેન્દ્ર મોદી બે દેશોનો પ્રવાસ પૂર્ણ કરીને શનિવારે સ્વદેશ પરત ફર્યા છે. તેઓ ગ્રીસથી સીધા બેંગ્લોર પહોંચી ગયા છે. 40 વર્ષમાં ભારતીય વડાપ્રધાન દ્વારા ગ્રીસની આ પ્રથમ મુલાકાત હતી. પીએમ મોદી પહેલા ઈન્દિરા ગાંધીએ 1983માં જ્યારે તેઓ વડાપ્રધાન હતા ત્યારે ગ્રીસની મુલાકાત લીધી હતી. પીએમ મોદી દક્ષિણ આફ્રિકામાં BRICS સમિટમાં ભાગ લીધા બાદ ગ્રીસ પહોંચ્યા હતા. આ મુલાકાતનું આયોજન ગ્રીસના વડા પ્રધાન કિરિયાકોસ મિત્સોટાકિસના આમંત્રણ પર કરવામાં આવ્યું હતું.

હવે પીએમ મોદી કર્ણાટકના બેંગલુરુ પહોંચી ગયા છે. તેમનું પ્લેન સવારે 6 વાગ્યે HAL એરપોર્ટ પર લેન્ડ થયું હતું. અહીંથી પીએમ મોદી ISRO હેડક્વાર્ટર પહોંચ્યા હતા અને સવારે લગભગ 7 વાગ્યે ચંદ્રયાન-3 મોકલનાર વૈજ્ઞાનિકોની ટીમને મળશે. આ સિવાય પીએમ એરપોર્ટની બહાર ઇસરો સેન્ટરથી લગભગ 1 કિમી દૂર જલાહલ્લીમાં બીજેપી કાર્યકર્તાઓ સાથે પણ મુલાકાત કરશે.

પીએમ મોદીએ તેમના સોશિયલ મીડિયા એકાઉન્ટ પર બેંગલુરુમાં ઉતરાણની માહિતી પણ શેર કરી છે. તેમણે X (Twitter) પર લખ્યું: “બેંગલુરુમાં લેન્ડ થયા. અમારા ખાસ લોકો સાથે વાતચીત કરવા માટે આતુર છું. ISRO ચંદ્રયાન-3ની સફળતાથી ભારતને ગૌરવ અપાવનાર વૈજ્ઞાનિકો! તેમનું સમર્પણ અને જુસ્સો ખરેખરમાં અવકાશ ક્ષેત્રમાં આપણા દેશની સિદ્ધિઓ પાછળ પ્રેરક શક્તિ છે.”

પીએમ મોદીએ ભાજપના કાર્યકરો અને લોકોને સંબોધિત કર્યા

પીએમ મોદીએ એરપોર્ટથી બહાર આવીને ભાજપના કાર્યકરો અને લોકોને સંબોધિત કર્યા હતા. આ દરમિયાન તેમણે જય જવાન, જય વિજ્ઞાન, જય અનુસંધાનનો નારો પણ આપ્યો હતો. પીએમ મોદીએ પોતાના સંબોધનમાં કહ્યું કે જે દ્રશ્ય હું આજે બેંગલુરુમાં જોઈ રહ્યો છું, તે જ દ્રશ્ય મેં ગ્રીસમાં જોયું. જોહાનિસબર્ગમાં પણ દેખાયું. જ્યારે હું વિદેશમાં હતો ત્યારે મેં નક્કી કર્યું હતું કે જો હું ઈન્ડિયા જઈશ તો પહેલા બેંગ્લોર જઈશ. સૌથી પહેલા હું એ વૈજ્ઞાનિકોને નમન કરીશ. મેં અહીંના મુખ્યમંત્રી, નાયબ મુખ્યમંત્રી અને રાજ્યપાલને વિનંતી કરી હતી કે આટલી વહેલી સવારે આવવાની જરૂર નથી.