'ડરાવવું અને ધમકાવવું કોંગ્રેસની જૂની પરંપરા છે', PM Modi એ વકીલોના પત્ર મુદ્દે કોંગ્રેસ પર સાધ્યું નિશાન

PM Modi on Lawyers Letter To CJI: લોકસભાની ચૂંટણીને આડે હવે થોડો જ સમય બાકી છે અને દેશનું રાજકીય તાપમાન ગરમાય રહ્યું છે. ઉમેદવારોના નામની જાહેરાતથી લઈને નોમિનેશનનો રાઉન્ડ ચાલી રહ્યો છે. આ દરમિયાન, વરિષ્ઠ વકીલ હરીશ સાલ્વે અને પિંકી આનંદ સહિત દેશના 600 થી વધુ વકીલોએ સુપ્રીમ કોર્ટના ચીફ જસ્ટિસ ડીવાય ચંદ્રચુડને પત્ર લખ્યો છે. એવું કહેવામાં આવી રહ્યું છે કે એક વિશેષ જૂથ દેશમાં ન્યાયતંત્રને નબળું કરવામાં લાગેલું છે. હવે વડાપ્રધાન નરેન્દ્ર મોદીએ આને લઈને કોંગ્રેસ પર નિશાન સાધ્યું છે.

બીજાને ડરાવવા એ કોંગ્રેસની જૂની સંસ્કૃતિ છે: PM Modi

હકીકતમાં, દેશના 600 થી વધુ વકીલોએ CJIને લખેલા પત્રમાં કહ્યું છે કે, આ વિશેષ જૂથનું કામ કોર્ટના નિર્ણયોને પ્રભાવિત કરવા માટે દબાણ લાવવાનું છે, ખાસ કરીને એવા કિસ્સાઓમાં કે જેમાં ક્યાં તો રાજકારણીઓ સામેલ હોય અથવા જેના પર આરોપો હોય. પત્રમાં કહેવામાં આવ્યું છે કે, તેમની પ્રવૃત્તિઓ દેશના લોકતાંત્રિક બંધારણ અને ન્યાયિક પ્રક્રિયામાં વિશ્વાસ માટે ખતરો છે. આ પત્ર પછી વડાપ્રધાન નરેન્દ્ર મોદીએ કોંગ્રેસ પર નિશાન સાધતા તેને સોશિયલ મીડિયા પ્લેટફોર્મ X પર પોસ્ટ કરી છે. તેમાં તેમણે લખ્યું હતું કે, બીજાઓને ડરાવવાએ કોંગ્રેસની વર્ષો જૂની સંસ્કૃતિ છે. માત્ર 5 દાયકા પહેલા તેઓએ "પ્રતિબદ્ધ ન્યાયતંત્ર" માટે હાકલ કરી હતી, તેઓ નિર્લજ્જતાથી તેમના સ્વાર્થ માટે અન્ય લોકો પાસેથી પ્રતિબદ્ધતા માંગે છે પરંતુ રાષ્ટ્ર પ્રત્યેની કોઈપણ પ્રતિબદ્ધતાને ટાળે છે. આશ્ચર્યની વાત નથી કે 140 કરોડ ભારતીયો તેને નકારી રહ્યા છે.

કોંગ્રેસની પ્રતિક્રિયા પણ આવી

પીએમના નિવેદન પર કોંગ્રેસે પણ પ્રતિક્રિયા આપી છે. કૉંગ્રેસના નેતા જયરામ રમેશે વળતો પ્રહાર કર્યો, આના પર લખ્યું, એવું સાબિત થયું છે કે બોન્ડ કંપનીઓને ભાજપને દાન આપવા દબાણ કરવા માટે ડર, બ્લેકમેલ અને ધાકધમકીનું બળજબરીનું સાધન હતું. MSPને કાનૂની ગેરંટી આપવાને બદલે વડા પ્રધાને ડર, બ્લેકમેઇલ અને ધાકધમકી આપી હતી. ભ્રષ્ટાચાર માટે કાનૂની ગેરંટી આપી છે. છેલ્લા દસ વર્ષમાં "વડાપ્રધાને જે કંઈ કર્યું છે તે વિભાજન, વિકૃત, વાળવા અને બદનામ કરવાનું છે. 140 કરોડ ભારતીયો ટૂંક સમયમાં જ યોગ્ય જવાબ આપે તેની રાહ જોઈ રહ્યા છે.