World News: જાપાનમાં ફરી એકવાર બે વિમાન વચ્ચે ટક્કર, 289 મુસાફરોના જીવ તાળવે ચોંટયા

japan plane crash: જાપાનમાં ફરી બે વિમાન વચ્ચે ટક્કર થઈ છે. આ દુર્ઘટના જાપાનના ઉત્તરી દ્વીપ હોક્કાઇડોમાં સ્થિત ન્યુ ચિટોઝ એરપોર્ટ પર બની. અકસ્માત સમયે કેથે પેસિફિક એરવેઝનું વિમાન એરપોર્ટ પર પાર્ક હતું. આ દરમિયાન ત્યાં ઉતરી રહેલું કોરિયન એરલાઈન્સનું પ્લેન તેની સાથે અથડાયું. કોરિયન એરલાઇન્સના વિમાનમાં 289 મુસાફરો સવાર હતા. જો કે આ અકસ્માતમાં કોઈ જાનહાનિ કે ઈજાના સમાચાર નથી. નોંધનીય છે કે જાપાનમાં બે અઠવાડિયામાં આ બીજી વિમાન દુર્ઘટના છે.

બે વિમાન વચ્ચે ટક્કર

કેથે પેસિફિકે અકસ્માતની પુષ્ટિ કરી છે. નિવેદનમાં કહેવામાં આવ્યું છે કે તેનું એક વિમાન કોરિયન એરલાઈન્સના વિમાન સાથે અથડાયું હતું. આ મુજબ, કેથે પેસિફિક વિમાનમાં ન તો કોઈ મુસાફરો કે ક્રૂ મેમ્બર સવાર હતા. આ દરમિયાન ત્યાં લેન્ડિંગ કરી રહેલું કોરિયન એર A330 તેની સાથે અથડાયું હતું. જાપાની મીડિયા અનુસાર, જ્યારે કોરિયન એરલાઈન્સનું પ્લેન કેથે પેસિફિક પ્લેન સાથે અથડાયું ત્યારે તેમાં 289 મુસાફરો સવાર હતા. કોરિયન એરલાઈન્સે પણ પુષ્ટિ કરી છે કે અકસ્માત દરમિયાન કોઈને ઈજા થઈ નથી.

બે અઠવાડિયા પહેલા પણ આ પ્રકારની ઘટના બની હતી

નોંધનીય છે કે લગભગ બે અઠવાડિયા પહેલા જાપાનના હનેડા એરપોર્ટ પર બે વિમાનો વચ્ચે જોરદાર ટક્કર થઈ હતી. તે સમયે જાપાન એરલાઈન્સનું પ્લેન કોસ્ટ ગાર્ડ પ્લેન સાથે અથડાયું હતું. આ દરમિયાન પ્લેનમાં જોરદાર આગ ફાટી નીકળી હતી. જોકે, વિમાનના તમામ મુસાફરોનો આબાદ બચાવ થયો હતો. જાપાનના આ પ્રયાસની વિશ્વભરમાં પ્રશંસા થઈ હતી. આગની જ્વાળાઓમાં ઘેરાયેલા લોકોને વિમાનમાંથી ઉતારી લેવાનો વીડિયો પણ સોશિયલ મીડિયા પર વાયરલ થયો હતો.