ગર્લફ્રેન્ડને ભગાડવા જતા પરિજનો પાછળ પડ્યા, પાકિસ્તાની યુવક બોર્ડર ક્રોસ કરીને ભારતમાં ઘુસી ગયો

Pakistani Citizen Crosses Border: બાડમેરમાં સરહદ પારથી ભારતમાં ઘૂસેલા પાકિસ્તાની નાગરિકે સુરક્ષા એજન્સીઓને ઘૂસણખોરી માટે જે કારણ આપ્યું છે તે ચોંકાવનારું છે. પાકિસ્તાની નાગરિકે જણાવ્યું કે તેની ગર્લફ્રેન્ડના પરિવારના સભ્યો તેની પાછળ દોડ્યા આથી તે ભાગીને ભારતીય સરહદમાં ઘૂસી ગયો.

પાકિસ્તાની નાગરિકે જણાવ્યું કે, મોડી રાત્રે ભાગતી વખતે તે ખોવાઈ ગયો અને ભારતીય સરહદની અંદર 15 કિલોમીટર અંદર આવેલા ઝડપા ગામમાં પહોંચ્યો. સવારે જ્યારે ગ્રામજનોએ તેને જોયો અને તેના વિશે પૂછપરછ કરી તો તેણે પાકિસ્તાનના થરપારકર જવા માટે બસનું ઠેકાણું પૂછવાનું શરૂ કર્યું. આ પછી ગામલોકોએ તેને બીએસએફને સોંપી દીધો.

ગર્લફ્રેન્ડના પરિજનો પાછળ દોડતા ભારતમાં ઘુસી ગયો

બાડમેરના એસપી નરેન્દ્ર સિંહ મીણાએ જણાવ્યું કે, ભારતીય વિસ્તારમાં ઘૂસેલા પાકિસ્તાની નાગરિકનું નામ જગસી પુત્ર પરશુરામ છે. 24 ઓગસ્ટની રાત્રે તે પોતાની ગર્લફ્રેન્ડને મળવા માટે પાકિસ્તાન બોર્ડર પરના એક ગામમાં પહોંચ્યો હતો. જ્યારે તેની ગર્લફ્રેન્ડના પરિવારને આ વાતની જાણ થઈ ત્યારે તે ત્યાંથી ભાગી ગયો હતો. પાકિસ્તાની નાગરિક 24 ઓગસ્ટે સવારે લગભગ 2:48 વાગ્યે BSF કેમેરામાં જોવા મળ્યો હતો. એસપીના જણાવ્યા અનુસાર, પાકિસ્તાની નાગરિકના કબજામાંથી 2 સિમ અને એક ડાયરી સાથેનો મોબાઈલ ફોન મળી આવ્યો છે.

ઘૂસણખોર પાકિસ્તાનના ખરોરાનો રહેવાસી

છેલ્લા 3 દિવસથી IB, CIDCB, BSF સહિત અનેક સુરક્ષા એજન્સીઓ પાકિસ્તાની નાગરિકની પૂછપરછ કરી રહી છે. છેવટે, ભારતમાં પ્રવેશવાનો તેનો ઈરાદો શું હતો? 21 વર્ષીય પાકિસ્તાની નાગરિક જગસી પાકિસ્તાનના થરપારકર જિલ્લાના ખરોરાનો રહેવાસી છે. આ ગામ પાકિસ્તાનમાં ભારતીય સરહદથી 35 કિલોમીટર દૂર છે.

ગર્લફ્રેન્ડનું ગામ ભારતીય સરહદથી 7 કિમી દૂર

પાકિસ્તાની નાગરિકની 17 વર્ષની ગર્લફ્રેન્ડનું ગામ ઘોરમારી ભારતની નવાતાલા બોર્ડરથી માત્ર 7 કિલોમીટર દૂર છે. બંને વચ્ચે 2020 થી પ્રેમસંબંધ ચાલી રહ્યો છે. 24મી ઓગસ્ટની રાત્રે જગસી તેની પ્રેમિકાને મળવા ગયો હતો. ત્યાં પહોંચ્યા બાદ તેણે તેની ગર્લફ્રેન્ડને ભાગી જવાનો આગ્રહ કર્યો. પરંતુ, પ્રેમિકાએ સ્પષ્ટ ના પાડી દીધી. દરમિયાન પ્રેમિકાના પરિવારજનોને આ વાતની જાણ થતા પાકિસ્તાની નાગરિક જગસી ત્યાંથી ભાગી ગયો.

દિલ તૂટતા આત્મહત્યાનો પ્રયાસ કર્યો

પોલીસ પૂછપરછ દરમિયાન, પાકિસ્તાની નાગરિકે જણાવ્યું કે જ્યારે તેની ગર્લફ્રેન્ડે તેની સાથે ભાગવાનો ઇનકાર કર્યો ત્યારે તેનું દિલ તૂટી ગયું અને તેણે આત્મહત્યા કરવાનો નિર્ણય કર્યો. તે તેની ગર્લફ્રેન્ડના ઘરેથી તેનો દુપટ્ટો લઈ ગયો અને ત્યાંથી ચાલ્યો ગયો, દુપટ્ટાથી ફાંસો બનાવ્યો અને તેને ઝાડ પર લટકાવવાનો પ્રયાસ કર્યો. પરંતુ, ઝાડની ડાળી તૂટી જતાં તે બચી ગયો. જ્યારે તેની ગર્લફ્રેન્ડના પરિવારના સભ્યો તેનો પીછો કરવા લાગ્યા ત્યારે તે ભારતીય વાડ પાસે પહોંચી ગયો.