કિમ જોંગની તાનાશાહી, જાહેરમાં એક સાથે 30 વિદ્યાર્થીઓને મોતને ઘાટ ઉતાર્યા, હતી નાની ભૂલ

Kim Jong Un : ઉત્તર કોરિયામાં કિમ જોંગ ઉનની તાનાશાહીનો વધુ એક કિસ્સો સામે આવ્યો છે. અહેવાલ છે કે ઉત્તર કોરિયાની સરકારે જાહેરમાં 30 સગીર વિદ્યાર્થીઓને ગોળી મારી દીધી હતી. આ વિદ્યાર્થીઓનો એક માત્ર દોષ એ હતો કે તેમણે દક્ષિણ કોરિયામાં બનેલા નાટકો જોયા હતા, જેને કોરિયન ડ્રામા અથવા કે-ડ્રામા પણ કહેવામાં આવે છે. કિમ જોંગની સરકારે તેમના દેશમાં દક્ષિણ કોરિયાના નાટકો અને ફિલ્મો જોવા પર પ્રતિબંધ મૂક્યો છે. દક્ષિણ કોરિયાના ન્યૂઝ આઉટલેટ ચોસુન ટીવી અને કોરિયા જોંગએંગ ડેલીના અહેવાલમાં આ દાવો કરવામાં આવ્યો છે.

મીડિયા રિપોર્ટ્સ અનુસાર, ગયા અઠવાડિયે લગભગ 30 વિદ્યાર્થીઓને ડ્રામા જોવાનો આરોપ લગાવીને ગોળી મારી દેવામાં આવી હતી. રિપોર્ટમાં એમ પણ કહેવામાં આવ્યું હતું કે તેમની ઉંમર 19 વર્ષથી ઓછી હતી. જોંગએંગ ડેઇલી અનુસાર, આ ઘટના ગયા અઠવાડિયે બની હતી. ચોસુન ટીવીના જણાવ્યા અનુસાર, વિદ્યાર્થીઓએ પેન ડ્રાઈવમાં મળી આવેલા ઘણા દક્ષિણ કોરિયન નાટકો જોયા હતા. આ પેન ડ્રાઈવને ગયા મહિને જ બલૂન મારફતે ઉત્તર કોરિયા મોકલવામાં આવી હતી.

મૃત્યુદંડની છે જોગવાઈ

મીડિયા રિપોર્ટ્સમાં કહેવામાં આવ્યું છે કે ઉત્તર કોરિયામાં જાપાનીઝ, કોરિયન અને અમેરિકન ડ્રામા જોવા પર પ્રતિબંધ છે. માત્ર રશિયન સિનેમા અથવા સરકાર જે પણ યોગ્ય માને છે તે ત્યાં બતાવવામાં આવે છે. સરકારે ડિસેમ્બર 2020માં આ અંગેનો કાયદો લાગુ કર્યો હતો. જે અંતર્ગત દર્શકોને મૃત્યુદંડ અને 15 વર્ષ સુધીની જેલની જોગવાઈ છે. પુસ્તકો, ગીતો અને ફોટોગ્રાફ્સ પણ તેના દાયરામાં આવે છે. ગત મહિને પણ 17 વર્ષથી ઓછી ઉંમરના 30 સગીરોને આજીવન કેદ અને મૃત્યુદંડની સજા ફટકારવામાં આવી હતી.

BBCના અહેવાલ મુજબ, આ વર્ષે જાન્યુઆરીમાં બે સગીર કોરિયન વીડિયો કબજામાં જોવા મળ્યા હતા, ત્યારબાદ તેમને 12 વર્ષની સખત મજૂરીની સજા ફટકારવામાં આવી હતી.

દાયકાઓથી છે તણાવ

આ સમયે ઉત્તર કોરિયા અને દક્ષિણ કોરિયા વચ્ચે ખૂબ જ તણાવ ચાલી રહ્યો છે. વર્ષની શરૂઆતમાં કિમ જોંગે દક્ષિણ કોરિયાને પોતાનો દુશ્મન જાહેર કર્યો હતો કે-ડ્રામા ઉત્તર કોરિયામાં પ્રસારિત થઈ શકતા નથી, પરંતુ તે ખૂબ જ લોકપ્રિય છે. તેથી આ પેન ડ્રાઇવ દ્વારા ગેરકાયદેસર રીતે પહોંચાડવામાં આવે છે.