નિત્યાનંદનું કૈલાસ આપી રહ્યું છે હિંદુઓને નાગરિકતા, નાગરિકતા મેળવવા માટે માત્ર આ કામ કરવું પડશે

નવી દિલ્હી : ભારતમાંથી ભાગીને પોતાનો દેશ બનાવવાનો દાવો કરનાર નિત્યાનંદ હવે પોતાના દેશની નાગરિકતા વહેંચી રહ્યો છે. તેમણે હિંદુ ધર્મમાં માનતા લોકોને સોશિયલ મીડિયા પર એક પછી એક પોસ્ટ કરીને ઈ-સિટીઝનશિપ લેવાની અપીલ કરી છે. તેણે તેની પ્રક્રિયા પણ સમજાવી છે.આ દિવસોમાં બળાત્કારના આરોપમાં ફરાર નિત્યાનંદ પોતાના કહેવાતા દેશ કૈલાસની નાગરિકતા વહેંચી રહ્યો છે. આ માટે લોકોને વેરિફાઈડ સોશિયલ મીડિયા એકાઉન્ટ્સ દ્વારા પોસ્ટ શેર કરીને નાગરિકતા લેવા માટે અપીલ કરવામાં આવી રહી છે. આમાં લોકોને કહેવામાં આવી રહ્યું છે કે, જો તમે હિંદુ ધર્મનું પાલન કરો છો અથવા હિંદુ વિચારધારા સાથે કોઈ જૂથમાં જોડાવા માંગો છો, તો તમે કૈલાસની ઈ-સિટીઝનશિપ મફતમાં લઈ શકો છો.

કૈલાશના અધિકારીક એકાઉન્ટ પરથી નાગરિકતા અંગે ટ્વીટ કરવામાં આવ્યા
આ સાથે તમે વૈશ્વિક હિંદુ પરિવારનો હિસ્સો બની શકો છો. કૈલાસના ઓફિશિયલ એકાઉન્ટ પરથી નાગરિકતા અંગે અનેક ટ્વિટ કરવામાં આવી છે. નાગરિકતા માટે આપેલી લિંક પર ક્લિક કર્યા પછી, એક પેજ ખુલે છે. આમાં, પ્રથમ કોલમમાં નામ, પછી ઈ-મેલ, સરનામું, શહેર, રાજ્ય, દેશ, વ્યવસાય અને પછી ફોન નંબર જેવા વિકલ્પો છે. નાગરિકતા લેવા માટે આ તમામ માહિતી માંગવામાં આવી રહી છે. કૈલાસના પેજ પર દાવો કરવામાં આવી રહ્યો છે કે આ રીતે કૈલાસની નાગરિકતા લઈ શકાય છે. જો કે, નાગરિકતા લીધા પછી કૈલાસમાં કેવી રીતે પહોંચી શકાય અને ત્યાં કોઈ સ્થાયી થઈ શકે કે કેમ તે અંગે કોઈ માહિતી આપવામાં આવી નથી?

નાગરિક બનવા માટે આ ખાસ જરૂરિયાતો પુર્ણ કરવી જોઇએ
શું તમે એક પ્રેક્ટિસ અથવા મહત્વાકાંક્ષી હિંદુ છો જે સમાન વિચારધારા ધરાવતા સમુદાય સાથે જોડાવા માગે છે? #કૈલાસા ફ્રી ઈ-સિટીઝનશિપમાં જોડાઓ અને પ્રબુદ્ધ હિંદુ સમુદાયના વૈશ્વિક પરિવારનો ભાગ બનો 2023 કૈલાસ બનાવવાની જરૂર કેમ પડી? નિત્યાનંદ બળાત્કારનો આરોપ લાગ્યા બાદ ડરીને દેશ છોડીને ભાગી ગયો. તેને ભાગેડુ જાહેર કરવામાં આવ્યો હતો. આ પછી, તે દક્ષિણ અમેરિકાના એક્વાડોર દેશમાં ગયો અને જમીનનો ટુકડો ખરીદ્યો અને તેને પોતાનો દેશ જાહેર કર્યો. દેશનું નામ ‘કૈલાસ’ હતું. નિત્યાનંદ તેને ‘હિંદુ રાષ્ટ્ર’ કહે છે. કૈલાસની વેબસાઈટનો દાવો છે કે આ દેશમાં અત્યાચાર ગુજારાયેલા હિન્દુઓને દુનિયાભરમાંથી સુરક્ષા આપવામાં આવે છે.

અહીં દરેક હિંદુ જાતી-લિંગના ભેદભાવ વગર શાંતિથી રહી શકે છે
અહીં રહેતા હિંદુઓ જાતિ, લિંગના ભેદભાવ વગર શાંતિથી રહે છે. કૈલાસા તેની પોતાની રિઝર્વ બેંક, પોતાનું ચલણ અને પોતાનું અલગ બંધારણ હોવાનો પણ દાવો કરે છે. આખરે આ નિત્યાનંદ કોણ છે? નિત્યાનંદનો જન્મ 1 જાન્યુઆરી, 1978ના રોજ તમિલનાડુમાં થયો હતો. તેમના પિતાનું નામ અરુણાચલમ અને માતાનું નામ લોકનાયકી છે. નિત્યાનંદે 1992માં શાળાનો અભ્યાસ પૂરો કર્યો. 1995માં મિકેનિકલ એન્જિનિયરિંગનો અભ્યાસ કર્યો. એવો દાવો કરવામાં આવે છે કે 12 વર્ષની ઉંમરથી તેણે રામકૃષ્ણ મઠમાં શિક્ષણ લેવાનું શરૂ કર્યું હતું. 1 જાન્યુઆરી 2003ના રોજ, નિત્યાનંદે બેંગ્લોર નજીક બિદાડીમાં તેમનો પહેલો આશ્રમ ખોલ્યો. તે પછી તેણે ઘણા આશ્રમો ખોલ્યા. 2010માં નિત્યાનંદ વિરુદ્ધ છેતરપિંડી અને અશ્લીલતાનો કેસ નોંધવામાં આવ્યો હતો. તેની એક સેક્સ સીડી સામે આવી હતી. આ કેસમાં નિત્યાનંદની ધરપકડ પણ કરવામાં આવી હતી, પરંતુ થોડા જ દિવસોમાં તેમને જામીન મળી ગયા હતા.

બળાત્કારની અનેક ફરિયાદો નોંધવામાં આવી ચુકી છે
વર્ષ 2012માં નિત્યાનંદ વિરુદ્ધ બળાત્કારનો કેસ નોંધવામાં આવ્યો હતો. આ પછી, ફરીથી નવેમ્બર 2019 માં, તેની સામે બે છોકરીઓનું અપહરણ કરીને તેમને બંદી બનાવી રાખવાનો કેસ નોંધવામાં આવ્યો. 2019માં દેશ છોડીને ભાગી ગયેલા નિત્યાનંદ 2010માં પહેલીવાર વિવાદમાં આવ્યો. જ્યારે તેનો એક વાંધાજનક વીડિયો વાયરલ થયો. આ વીડિયોમાં નિત્યાનંદ તમિલ અભિનેત્રી સાથે વાંધાજનક સ્થિતિમાં જોવા મળ્યા હતા. તમિલનાડુના એક દંપતીએ નિત્યાનંદ પર આરોપ લગાવ્યો હતો કે તેણે તેમના બાળકોનો ગેરકાયદેસર કબજો લીધો હતો. તેને લઈને નિત્યાનંદ અમદાવાદમાં તેના આશ્રમમાં ગયો છે. આ પછી પોલીસે નિત્યાનંદ વિરુદ્ધ અપહરણ, બાળકોના ગેરકાયદેસર કબજાની કલમો હેઠળ કેસ નોંધ્યો હતો. વર્ષ 2019માં તે ભારત છોડીને ફરાર થઈ ગયો હતો. આ પછી તેણે એક વીડિયો જાહેર કરીને દાવો કર્યો હતો કે તેના જીવ પર હુમલો કરવામાં આવ્યો હતો, જેના કારણે તેને દેશ છોડવાની ફરજ પડી હતી. નિત્યાનંદે દાવો કર્યો હતો કે ભારતમાં તેમની હત્યાના અનેક પ્રયાસો થયા હતા.