બેબી ફૂડમાં Nestle ભેળવી રહી છે ખાંડ? રિપોર્ટ બાદ સરકારના નિશાને આવી કંપની

Nestle Baby Food: Nestle કંપની ભારત સરકારના રડારમાં આવી ગઈ છે. સરકારે ભારતમાં વેચાતા શિશુઓના ફૂડમાં ખાંડની કથિત ભેળસેળના અહેવાલોની તપાસ કરવા જણાવ્યું છે. એક રિપોર્ટમાં સામે આવ્યું છે કે Nestle ભારતમાં વેચાતા બેબી ફૂડમાં ખાંડ ઉમેરી રહી છે, જેના પછી આ કંપની સરકારના નિશાના પર આવી ગઈ છે.

સરકારે Nestleની તપાસ કરશે

એક ટોચના સરકારી અધિકારીએ બિઝનેસ ટુડે ટીવીને જણાવ્યું કે, અમે Nestle અંગેના અહેવાલની નોંધ લીધી છે અને મામલાની તપાસ કરીશું. રિપોર્ટમાં વધુમાં જણાવાયું છે કે, સરકાર ગ્રાહક સુરક્ષા કાયદાની જોગવાઈઓને અનુસરીને નેસ્લેના બેબી ફૂડના સેમ્પલની તપાસ કરવા માટે સેન્ટ્રલ કન્ઝ્યુમર પ્રોટેક્શન ઓથોરિટી (CCPA)ને કહેશે. ઉપરાંત, ગ્રાહક બાબતોના વિભાગ અને આરોગ્ય અને પરિવાર કલ્યાણ મંત્રાલય (MoHFW) ના વરિષ્ઠ અધિકારીઓ ટૂંક સમયમાં આ બાબતે ચર્ચા કરશે.

કેટલા ગ્રામ ખાંડ ઉમેરવામાં આવે છે

રિપોર્ટ અનુસાર, 2022 દરમિયાન ભારતમાં નેસ્લેનું વેચાણ $250 મિલિયનને પાર થઈ ગયું હતું. તેના તમામ સેરેલેક બેબી અનાજમાં સરેરાશ 3 ગ્રામ પ્રતિ સર્વિંગ ખાંડ હોય છે. આ પેટર્ન દક્ષિણ આફ્રિકા, આફ્રિકાના પ્રાથમિક માર્કેટમાં પણ સ્પષ્ટ છે, જ્યાં તમામ સેરેલેક બેબી સીરીયલ ઉત્પાદનોમાં દરેક સર્વિંગ દીઠ 4 ગ્રામ અથવા વધુ ઉમેરવામાં આવેલી ખાંડ હોય છે. તેવી જ રીતે, 2022માં લગભગ $150 મિલિયનના વેચાણ સાથે વિશ્વનું બીજા ક્રમનું સૌથી મોટું બજાર બ્રાઝિલમાં, ત્રણ ચતુર્થાંશ સેરેલેક બેબી અનાજ (જેને મ્યુસિલોન તરીકે ઓળખાય છે) માં પ્રતિ સર્વિંગ સરેરાશ 3 ગ્રામ ખાંડ છે.

ભારત અને બ્રાઝિલમાં સૌથી વધુ વેચાણ

રિપોર્ટ અનુસાર નેસ્લે એશિયાઈ દેશોમાં અમેરિકા અને યુરોપની સરખામણીમાં અલગ-અલગ માત્રામાં ખાંડ ઉમેરી રહી છે. યુરોમોનિટર ઇન્ટરનેશનલના જણાવ્યા મુજબ, સેરેલેક એ વૈશ્વિક સ્તરે ટોચની બેબી ફૂડ બ્રાન્ડ છે, જેનું વેચાણ 2022 માં $1 બિલિયનને વટાવી ગયું હતું. આ વેચાણનો સૌથી મોટો હિસ્સો, લગભગ 40 ટકા, બ્રાઝિલ અને ભારતમાંથી આવે છે.