સાવધાન મુંબઈ! ભારેથી અતિભારે વરસાદની આગાહી, આગામી 24 કલાક માટે રેડ એલર્ટ જાહેર

Mumbai Rain Alert: મુંબઈ સહિત આસપાસના શહેરોમાં રાતથી ભારે વરસાદ પડી રહ્યો છે. દિવસભર વરસાદના વધારાને કારણે શહેરના આસપાસના વિસ્તારોમાં નદીઓ અને નાળાઓ બેકાંઠે થયા છે. હવામાન વિભાગે માહિતી આપી છે કે આવતીકાલે એટલે કે શુક્રવાર સુધી વરસાદ ચાલુ રહેશે. હવામાન વિભાગની માહિતી અનુસાર, મુંબઈ સહિત વિસ્તારોમાં ભારે વરસાદની ચેતવણી આપવામાં આવી છે. વરસાદ માટે રેડ એલર્ટ આપવામાં આવ્યું છે. આ સમયગાળા દરમિયાન ભારેથી અતિ ભારે વરસાદ પડશે.

મુંબઈમાં જુલાઈનો બીજો સૌથી વધુ વરસાદ

દેશના અનેક રાજ્યોમાં મુશળધાર વરસાદ અને પૂરના કારણે સ્થિતિ ગંભીર છે. મહારાષ્ટ્રમાં તેની મોટી અસર જોવા મળી રહી છે. મુંબઈ, પુણે, થાણે, પાલઘર સહિત મહારાષ્ટ્રના અનેક શહેરોમાં ભારે વરસાદ ચાલુ છે. જેના કારણે રસ્તાઓ અને રેલવે ટ્રેક પર પાણી ભરાઈ ગયા છે. જેના કારણે ટ્રાફિક જામ છે અને ફ્લાઈટ અને ટ્રેનની કામગીરીમાં વિલંબ થઈ રહ્યો છે. સતત વરસાદને કારણે અનેક તળાવો છલોછલ ભરાઈ ગયા છે. પુણે અને કોલ્હાપુર વિસ્તારમાં સ્થિતિ ગંભીર છે, જેના કારણે સામાન્ય જનજીવન પ્રભાવિત થયું છે. મુંબઈમાં પણ વરસાદ આફત બની ગયો છે. જુલાઈમાં અત્યાર સુધીનો બીજો સૌથી વધુ વરસાદ નોંધાયો છે અને એકંદરે 150 સેમીથી વધુ વરસાદ થયો છે.

આગામી 24 કલાક મુંબઈ માટે ભારે!

આગામી 24 કલાકમાં મુંબઈ શહેર અને આસપાસના વિસ્તારોમાં ભારેથી અતિભારે વરસાદની આગાહી કરાઈ છે. હવામાન વિભાગે કેટલીક જગ્યાએ ભારે વરસાદની આગાહી પણ કરી છે. આ દરમિયાન 60-70 કિમી પ્રતિ કલાકની ઝડપે પવન ફૂંકાવાની શક્યતા છે. આ સમયગાળા દરમિયાન મહત્તમ અને લઘુત્તમ તાપમાન અનુક્રમે 27 ડિગ્રી સેલ્સિયસથી 24 ડિગ્રી સેલ્સિયસની આસપાસ રહેશે.

નવી મુંબઈમાં ચાલુ છે ભારે વરસાદ

મંગળવાર રાતથી મુંબઈ અને આસપાસના વિસ્તારોમાં ભારે વરસાદ થઈ રહ્યો છે. જેના કારણે નીચાણવાળા વિસ્તારોમાં પાણી જમા થવા લાગ્યા છે. થાણે, કલ્યાણ, ડોમ્બિવલી, ઉલ્હાસનગર, અંબરનાથ, બદલાપુર વિસ્તારોમાં ભારે વરસાદ થઈ રહ્યો છે. ત્યારે વસઈ, વિરારમાં પણ વરસાદે દસ્તક આપી છે. નવી મુંબઈમાં પણ ભારે વરસાદ ચાલુ છે.

પ્રાચીન શિવ મંદિરના ગર્ભગૃહમાં પાણી

અંબરનાથના પ્રાચીન શિવ મંદિરના ગર્ભગૃહમાં પાણી જમા થઈ ગયું છે. મંદિરની બાજુમાં વહેતી વાલધુની નદીમાં પૂરના કારણે ગર્ભગૃહમાં ઘૂંટણ સમા પાણી ભરાયા છે. તેના કારણે ભગવાન ભોલેનાથનો અભિષેક પાણીમાં જ કરવામાં આવ્યો છે. આ પછી ગર્ભગૃહને ભક્તો માટે બંધ કરી દેવામાં આવ્યું છે. ભક્તો હાલમાં તેમના દર્શન કરીને પૂજા કરી રહ્યા છે.

ચેતવણીના સ્તરને વટાવી ગઈ ઉલ્હાસ નદી

બીજી તરફ ઉલ્હાસ નદીએ ચેતવણીનું સ્તર વટાવી દીધું છે. નદીમાં ગાબડું પડવાને કારણે નદી કાંઠાના ગામોને એલર્ટ કરી દેવામાં આવ્યા છે. કલ્યાણ-નગર હાઈવે પર આવેલ રાયત પુલ પાણીમાં ગરકાવ થઈ ગયો છે. જેના કારણે કલ્યાણ-નગર રોડ પર વાહન વ્યવહાર થંભી ગયો છે.

વાલ્કાસ બ્રિજ બે દિવસથી પાણીમાં ગરકાવ

દર વર્ષની જેમ આ વર્ષે પણ થાણે જિલ્લામાં વલકાસ નદી પર બનેલો પુલ પાણીમાં ગરકાવ થઈ ગયો છે અને ગ્રામજનો અને મજૂરો બે દિવસથી ગામમાં ફસાયેલા છે.

રાજ્યમાં ક્યાં ક્યાં વરસાદ પડશે?

કોંકણના વિવિધ જિલ્લાઓમાં ભારેથી અતિભારે વરસાદની શક્યતા મધ્ય મહારાષ્ટ્રના જિલ્લાઓના ઘાટ વિસ્તારમાં છૂટાછવાયા સ્થળોએ ભારેથી અતિ ભારે વરસાદની સંભાવના છે. મધ્ય મહારાષ્ટ્ર અને મરાઠવાડાના જિલ્લાઓમાં છૂટાછવાયા સ્થળોએ ભારે વરસાદની સંભાવના છે. વિદર્ભના જિલ્લાઓમાં છૂટાછવાયા સ્થળોએ વાવાઝોડું, ભારે પવન અને ભારે વરસાદની સંભાવના છે.