મુંબઈના ‘લાલબાગ કા રાજા’ની દાનપેટી ખુલી, પહેલા દિવસના દાનનો આંકડો સાંભળીને દંગ રહી જશો

Lalbagh Ka Raja: દેશભરમાં ગણેશોત્સવની ઉજવણી થઈ રહી છે. 19 સપ્ટેમ્બરથી શરૂ થયેલી ગણેશ ચતુર્થી 28 સપ્ટેમ્બર સુધી દેશભરમાં ધામધૂમથી ઉજવવામાં આવશે. તમને દરેક શેરી અને વિસ્તારમાં બાપ્પા હાજર જોવા મળશે. દરેક વ્યક્તિ આ તહેવારને ખૂબ જ આનંદથી ઉજવે છે કારણ કે આખું વર્ષ રાહ જોયા પછી, ગણપતિ બાપ્પા આપણને મળવા આવે છે. આવી સ્થિતિમાં મુંબઈના લાલાબાગના રાજાના દરબારમાં ભક્તોની ભારે ભીડ જોવા મળી રહી છે. હવે જ્યારે ભક્તોની આટલી મોટી ભીડ આવે ત્યારે અર્પણ કરવામાં આવતી ભેટ પણ વધુ હોય. બુધવારે લાલબાગના રાજાની દાનપેટીમાં અર્પણ કરાયેલી ભેટની પ્રથમ દિવસની રકમની ગણતરી કરવામાં આવી હતી.

ભક્તોએ ખૂબ જ પ્રસાદ ધરાવ્યો હતો

પ્રથમ દિવસે ભક્તોએ કેટલું દાન આપ્યું તે જાણવા માટે લાલબાગના રાજાની દાનપેટી ખોલવામાં આવી હતી. જ્યારે દાનપેટીમાં રાખેલા પૈસાની ગણતરી કરવામાં આવી તો રકમ 42 લાખ પર પહોંચી ગઈ. આ ઉપરાંત ભક્તો તેમના પ્રિય બાપ્પાને સોનું અને ચાંદી પણ ચઢાવે છે. તમને જણાવી દઈએ કે ભક્તોએ 198.55 ગ્રામ સોનું અને 5440 ગ્રામ ચાંદી પણ ચઢાવી છે.

ભેટમાં કોઈએ ચાંદીના મોદક, તો કોઈએ સોનાની ગદા આપી

બાપ્પાને ચડાવેલી આ ભેટમાં કોઈએ પોતાની માનતા પૂરી થવા પર ચાંદીનો મોદક અર્પણ કર્યો છે, તો કોઈએ સોનાની ગદા અને ગણપતિની પ્રતિમા અર્પણ કરી છે. મોટી સંખ્યામાં દાનપેટીમાંથી ભેટ નીકળતા લોકો પણ દંગ રહી ગયા હતા.

આ ભવ્ય ઉત્સવ 28મી સપ્ટેમ્બર સુધી ચાલશે

ગણેશ ઉત્સવ 19મી સપ્ટેમ્બરથી ભવ્ય રીતે શરૂ થયો છે જે 10 દિવસ સુધી ચાલશે. એટલે કે આ તહેવાર 28 સપ્ટેમ્બર સુધી ચાલશે. આ 10 દિવસ સુધી દેશના ખૂણે-ખૂણે આ તહેવારનો ઉત્સાહ જોવા મળશે, પરંતુ સૌથી વધુ ઉત્સાહ મહારાષ્ટ્રમાં જોવા મળી રહ્યો છે. મહારાષ્ટ્રમાં પણ મુંબઈના લાલબાગના રાજા સૌથી લોકપ્રિય ગણેશ મંડળ છે. લાલબાગના રાજાના દર્શન કરવા દેશ-વિદેશમાંથી લાખો લોકો આવે છે. લાલબાગના રાજા ગણેશ મંડળના અધિકારીઓ પાસેથી પ્રાપ્ત માહિતી અનુસાર, ગણેશ ઉત્સવ દરમિયાન લગભગ 1 કરોડ લોકો અહીં દર્શન માટે આવે છે.