MP Election: BJPએ ટિકિટ કાપતા પૂર્વ મંત્રીને હાર્ટ એટેક આવી ગયો, Congressના નેતાઓ ખબર પૂછવા પહોંચ્યા

MP Assembly Elections 2023: ભોપાલના દક્ષિણ-પશ્ચિમ વિધાનસભા સીટથી દાવેદારી કરી રહેલા પૂર્વ મંત્રી અને વરિષ્ઠ ભાજપના નેતા ઉમાશંકર ગુપ્તાને ટિકિટ ન મળી, ત્યારે તેઓ આઘાતમાં સરી પડ્યા. આ પછી તેમને હાર્ટ એટેક આવ્યો હતો. તેમની ભોપાલની હોસ્પિટલમાં સારવાર ચાલી રહી છે. ઉમાશંકર ગુપ્તાની તબિયત જાણવા માત્ર ભાજપ જ નહીં કોંગ્રેસના નેતાઓ પણ હોસ્પિટલ પહોંચ્યા હતા.

હાલ કેવી છે પૂર્વ મંત્રીની તબિયત?

જેમાં પૂર્વ મુખ્યમંત્રી દિગ્વિજય સિંહ પણ સામેલ હતા. ભારતીય જનતા પાર્ટીએ તેની પાંચમી યાદીમાં પૂર્વ મંત્રી ઉમાશંકર ગુપ્તાને ટિકિટ આપી ન હતી, જેઓ ભોપાલ દક્ષિણ પશ્ચિમથી દાવેદારી કરી રહ્યા હતા અને ભગવાન દાસ સબનાનીને ત્યાંના ઉમેદવાર બનાવ્યા હતા. આ પછી પૂર્વ મંત્રી ઉમાશંકર ગુપ્તાને હાર્ટ એટેક આવ્યો હતો. પાર્ટીના સૂત્રો પાસેથી મળેલી માહિતી મુજબ ઉમાશંકર ગુપ્તાના હૃદયની એન્જિયોપ્લાસ્ટી કરવામાં આવી છે. તેમાં બે સ્ટેન્ટ નાખવામાં આવ્યા છે. તબીબોએ તેમની હાલત ખતરાની બહાર જાહેર કરી છે.

ઉમાશંકર ગુપ્તા ટિકિટ મળવાનો દાવો કરી રહ્યા હતા

ઉમાશંકર ગુપ્તાને મળવા માટે ભાજપના અનેક નેતાઓ હોસ્પિટલ પહોંચ્યા હતા. પૂર્વ મુખ્યમંત્રી દિગ્વિજય સિંહે પણ તેમની ખબર પૂછી હતી. ઉમાશંકર ગુપ્તા દક્ષિણ-પશ્ચિમ બેઠક પરથી સતત બે ટર્મથી ધારાસભ્ય રહી ચૂક્યા છે. ઉમાશંકર ગુપ્તા પણ ભાજપ સરકારમાં ગૃહમંત્રી રહી ચૂક્યા છે. 2018ની ચૂંટણીમાં ગુપ્તાને કોંગ્રેસના ઉમેદવાર પીસી શર્માએ હરાવ્યા હતા. આ વખતે પણ તેઓ દક્ષિણ પશ્ચિમ બેઠક પરથી દાવો કરી રહ્યા હતા.

પૂર્વ મંત્રી ઉમાશંકર ગુપ્તા હોસ્પિટલમાં સ્વસ્થ થઈ રહ્યા છે, તો બીજી તરફ તેમના સમર્થકો સતત ભાજપના નેતાઓના બંગલાઓ પર ઘેરાવ કરી રહ્યા છે. ટિકિટ રદ્દ થયા બાદ ગુપ્તા સમર્થકો ભાજપના પ્રદેશ અધ્યક્ષ વીડી શર્માને પણ મળ્યા હતા અને ટિકિટ બદલવાની માંગણી કરી હતી.