આ વર્ષે દેશમાં ચોમાસું મોડું બેસશે, હવામાન વિભાગે હજુ ગરમી વધવાની આગાહી આપી

અમદાવાદ: આ વર્ષે કેરળમાં દક્ષિણ-પશ્ચિમ ચોમાસાના આગમનમાં થોડો વિલંબ થવાની સંભાવના છે. હવામાન વિભાગે મંગળવાર (16 મે)ના રોજ એક નિવેદનમાં જણાવ્યું હતું કે, ચોમાસું 4 જૂને પહોંચે તેવી શક્યતા છે. ચોમાસું ગયા વર્ષે 29 મે, 2021માં 3 જૂન અને 2020માં 1 જૂને દક્ષિણ રાજ્યમાં પહોંચ્યું હતું. IMDએ ગયા મહિને કહ્યું હતું કે, અલ નીનોની સ્થિતિ હોવા છતાં, ભારતમાં ચોમાસા દરમિયાન સામાન્ય વરસાદ થવાની ધારણા છે.

ભારત પર દક્ષિણ-પશ્ચિમ ચોમાસાનું આગમન કેરળમાં ચોમાસાનો આરંભ માનવામાં આવે છે. જેમ જેમ ચોમાસું ઉત્તર તરફ આગળ વધે છે તેમ, આ પ્રદેશોને ઉનાળાની ગરમીથી રાહત મળે છે. જો કે દેશના અનેક રાજ્યોમાં આકરી ગરમીનો પ્રકોપ યથાવત રહેશે.

“હીટવેવની અપેક્ષા નથી, પરંતુ તાપમાન વધશે”
IMDના અધિકારી કુલદીપ શ્રીવાસ્તવે જણાવ્યું હતું કે, મેના પહેલા બે અઠવાડિયામાં હીટવેવની સ્થિતિ પશ્ચિમી વિક્ષેપને કારણે ઓછી ગંભીર હતી, જેની ઉત્તર-પશ્ચિમ ભારતના કેટલાક ભાગમાં અસર થઈ હતી. આગામી વેસ્ટર્ન ડિસ્ટર્બન્સ ઉત્તર-પશ્ચિમ ભારતની નજીક આવી રહ્યું હોવાથી, આગામી 7 દિવસ સુધી, આપણે ત્યાં હીટવેવની સ્થિતિની અપેક્ષા નથી, પરંતુ તાપમાન 40 ડિગ્રી સેલ્સિયસની આસપાસ રહેશે.

ભારે પવન ફૂંકાઈ રહ્યો છે
તેમણે કહ્યું કે હરિયાણા, દિલ્હી-એનસીઆર, પશ્ચિમી ઉત્તર પ્રદેશ અને ઉત્તર-પૂર્વ રાજસ્થાનમાં ધૂળવાળા પવનો ફૂંકાઈ રહ્યા છે. તેની પાછળનું મુખ્ય કારણ એ છે કે વેસ્ટર્ન ડિસ્ટર્બન્સ પસાર થઈ ગયું છે અને જોરદાર પવન ફૂંકાઈ રહ્યા છે. શ્રીવાસ્તવે કહ્યું કે આ સિવાય ગયા અઠવાડિયે તાપમાન ઘણું વધારે હતું, મોટાભાગના ભાગોમાં તે 40 ડિગ્રી સેલ્સિયસ અથવા તેનાથી વધુ હતું. વાતાવરણ ગરમ છે અને 40-45 કિમી પ્રતિ કલાકની ઝડપે ફૂંકાતા પવનો સપાટી પરથી ધૂળ ઉપાડીને વાતાવરણમાં વિખેરી રહ્યા છે. મુખ્યત્વે તેઓ 1-2 કિમીની ઉંચાઈ સુધી ફેલાય છે.

ચોમાસું સમયસર ક્યારે હતું
ચોમાસું 2018માં 29 મે, 2019માં 8 જૂન, 2020માં 1 જૂન, 2021માં 3 જૂન અને 2022 એટલે કે ગયા વર્ષે 29 મેના રોજ કેરળ પહોંચ્યું હતું. IMD છેલ્લા 18 વર્ષથી ભારતમાં ચોમાસાના આગમનની આગાહી કરી રહ્યું છે. આ આગાહી કુલ 6 પેરામીટર પર કરવામાં આવી છે. તેમાં ઉત્તર-પશ્ચિમ ભારતનું લઘુત્તમ તાપમાન પણ સામેલ છે.