મણિપુર હિંસા: સુપ્રીમ કોર્ટનો લેખિત આદેશ સામે આવ્યો, પોલીસ અધિકારીઓની ભૂમિકા પણ શંકામાં

Manipur Violence: મણિપુર હિંસાની તપાસ પર સુપ્રીમ કોર્ટનો લેખિત આદેશ સામે આવ્યો છે. 7 ઓગસ્ટે જ કોર્ટે મહારાષ્ટ્રના પૂર્વ ડીજીપી દત્તાત્રેય પતસાલગિકરને તપાસની દેખરેખની જવાબદારી સોંપવાની જાહેરાત કરી હતી. 10 ઓગસ્ટ જારી કરાયેલા લેખિત આદેશમાં જણાવાયું છે કે પતસાલગિકર, સીબીઆઈ અને એસઆઈટીની કામગીરી પર દેખરેખ રાખવા ઉપરાંત, મણિપુરના કેટલાક પોલીસ અધિકારીઓએ હિંસામાં ભૂમિકા ભજવી હોવાના આરોપની પણ તપાસ કરશે. પતસાલગિકર બે મહિનામાં સુપ્રીમ કોર્ટમાં રિપોર્ટ સોંપશે.

હાઈકોર્ટના પૂર્વ જજોની સમિતિએ બે મહિનામાં રિપોર્ટ સોંપવો પડશે
સુપ્રીમ કોર્ટે રાજ્યમાં રાહત અને પુનર્વસન કાર્યની દેખરેખ માટે 3 ભૂતપૂર્વ હાઇકોર્ટ જજોની એક સમિતિ બનાવવાની પણ વાત કરી હતી. હવે જારી કરાયેલા લેખિત આદેશમાં આ સમિતિને બે મહિનામાં તેનો રિપોર્ટ કોર્ટમાં રજૂ કરવા પણ કહેવામાં આવ્યું છે. કમિટીની અધ્યક્ષતા જમ્મુ-કાશ્મીર હાઈકોર્ટના પૂર્વ મુખ્ય ન્યાયાધીશ ગીતા મિત્તલને આપવામાં આવી છે.

તેના બાકીના બે સભ્યો બોમ્બે હાઈકોર્ટના ભૂતપૂર્વ ન્યાયાધીશ જસ્ટિસ શાલિની ફણસાલકર જોશી અને દિલ્હી હાઈકોર્ટના નિવૃત્ત ન્યાયાધીશ આશા મેનન છે. આ સમિતિ ટૂંક સમયમાં રાજ્યની મુલાકાત લેશે. કોર્ટે રાજ્ય સરકારને તેમને જરૂરી સુરક્ષા આપવા જણાવ્યું છે.

તપાસમાં બહારના અધિકારીઓને પણ સામેલ કરવામાં આવશે
અગાઉ જે 11 કેસ સીબીઆઈને સોંપવામાં આવ્યા હતા, જેમાં 2 મહિલાઓને નગ્ન પરેડ કરાવવાનો કેસ પણ સીબીઆઈ દ્વારા જ તપાસવામાં આવશે. કોર્ટે કહ્યું છે કે લોકોનો વિશ્વાસ પુનઃસ્થાપિત કરવા માટે રાજ્ય બહારના અધિકારીઓને પણ તપાસમાં સામેલ કરવામાં આવશે. સીબીઆઈની ટીમમાં ડેપ્યુટી એસપી અથવા એસપી રેન્કના પાંચ અધિકારીઓને પણ રાખવામાં આવશે. આ અધિકારીઓને રાજસ્થાન, મધ્યપ્રદેશ, ઓડિશા, ઝારખંડ અને દિલ્હીથી લેવામાં આવશે.

સુનાવણી દરમિયાન, રાજ્ય સરકારે વિવિધ પ્રકારના ગુનાઓની તપાસ માટે કુલ 42 સ્પેશિયલ ઇન્વેસ્ટિગેશન ટીમ (SIT) ની રચના કરવાની દરખાસ્ત કરી હતી. આને મંજૂર કરતાં કોર્ટે કહ્યું છે કે કેન્દ્ર સરકારે રાજસ્થાન, એમપી, ઓડિશા, ઝારખંડ અને દિલ્હીમાંથી 1-1 ઇન્સ્પેક્ટર રેન્કના અધિકારીને SITમાં સામેલ કરવા મોકલવા જોઈએ. ઉપરાંત, મણિપુરની બહારના ઓછામાં ઓછા 14 એસપી રેન્કના અધિકારીઓને પણ ત્યાં મોકલવા જોઈએ. આ અધિકારીઓ SITનો હવાલો સંભાળશે. દત્તાત્રેય પતસાલગિકર SIT તપાસની દેખરેખ રાખશે.