મણીપુરમાં ફરી હિંસા ભડકી, ઉપદ્રવીઓએ રાજ્ય મંત્રીનું ઘર સળગાવી માર્યું

ઈમ્ફાલ: મણિપુરમાં ગત 3 મેથી શરૂ થયેલી હિંસા અટકવાનું નામ નથી લઈ રહી. 14 જૂનના રોજ, કેટલાક ઉપદ્રવીઓએ ઇમ્ફાલ પશ્ચિમના લામ્ફેલ વિસ્તારમાં રાજ્ય મંત્રી નેમચા કિપગેનના ઘરને આગ ચાંપી દીધી હતી. આ ઘટના સાંજે સાડા છ વાગ્યાની આસપાસ બની હતી.

અગાઉ 13 જૂને કાંગપોકપી જિલ્લામાં મોડી રાત્રે હિંસા ફાટી નીકળી હતી. જેમાં આધુનિક હથિયારોથી સજ્જ બદમાશો દ્વારા ગોળીબાર અને આગચંપી કરવામાં 9 લોકોના મોત થયા હતા, જ્યારે 10 લોકો ગંભીર રીતે ઘાયલ પણ થયા હતા, જેમને હોસ્પિટલમાં દાખલ કરવામાં આવ્યા છે. અહેવાલો અનુસાર, બદમાશોએ ખમેનલોક ગામમાં ઘણા ઘરોને આગ લગાવી દીધી હતી.

પૂર્વોત્તર રાજ્યમાં સ્થિતિ તંગ છે. કાયદો અને વ્યવસ્થા જાળવવા માટે સુરક્ષાકર્મીઓ અસરગ્રસ્ત વિસ્તારોમાં સતત પેટ્રોલિંગ કરી રહ્યા છે. દરમિયાન, છેલ્લા 24 કલાકમાં ટેંગ્નૌપાલ અને ઇમ્ફાલ પૂર્વ જિલ્લાઓમાંથી અનેક ફાયર આર્મ્સ અને દારૂ-ગોળો મળી આવ્યો છે.

ઇમ્ફાલ પૂર્વમાં કર્ફ્યુનો સમય ઘટાડાયો
મણિપુરના સુરક્ષા સલાહકાર કુલદીપ સિંહના જણાવ્યા અનુસાર અત્યાર સુધીમાં કુલ 1040 હથિયારો, 13,601 દારૂગોળો અને 230 પ્રકારના બોમ્બ મળી આવ્યા છે. દરમિયાન, ઇમ્ફાલ પૂર્વના જિલ્લા પ્રશાસને પણ 14 જૂને એક નોટિસ જારી કરી છે, જે મુજબ કર્ફ્યુનો સમય સવારે 5 વાગ્યાથી ઘટાડીને 9 વાગ્યા સુધીનો કરવામાં આવ્યો છે. અગાઉ કર્ફ્યુનો સમય સવારે 5 થી સાંજે 6 સુધીનો હતો.

હિંસા 3 મેના રોજ શરૂ થઈ હતી
તમને જણાવી દઈએ કે મેઇતેઈ સમુદાયની અનુસૂચિત જનજાતિ (ST)નો દરજ્જો આપવાની માંગના વિરોધમાં 3 મેના રોજ પહાડી જિલ્લાઓમાં ‘આદિવાસી એકતા માર્ચ’નું આયોજન કરવામાં આવ્યા બાદ પૂર્વોત્તર રાજ્યમાં હિંસા ફાટી નીકળી હતી. એક મહિના પહેલા જાતિય હિંસા ફાટી નીકળ્યા પછી, 100 થી વધુ લોકોએ જીવ ગુમાવ્યો છે અને 300 થી વધુ લોકો ઘાયલ થયા છે. આરક્ષિત જંગલની જમીનમાંથી કુકી ગ્રામવાસીઓની હકાલપટ્ટી અંગેના તણાવને કારણે અગાઉની અથડામણો થઈ હતી, જેના કારણે અનેક નાના આંદોલનો થયા હતા.

મૈતેઈ સમુદાય વસ્તીના 53 ટકા છે
નોંધપાત્ર રીતે, મણિપુરની વસ્તીના લગભગ 53 ટકા મૈતેઇ છે અને મોટાભાગે ઇમ્ફાલ ખીણમાં રહે છે. આદિવાસી નાગાઓ અને કુકીઓની વસ્તી 40 ટકા છે, જેઓ પહાડી જિલ્લાઓમાં રહે છે. રાજ્યમાં શાંતિ જાળવવા માટે સેના અને આસામ રાઈફલ્સના લગભગ 10,000 જવાનોને તૈનાત કરવામાં આવ્યા છે.