દુબઈથી 47 વખત લૉગ-ઈન થયું મહુઆ મોઈત્રાનું ‘સંસદીય એકાઉન્ટ’, 14 વિદેશ યાત્રાઓનો હિસાબ નથી આપ્યો

Mahua Moitra: સંસદમાં પ્રશ્નો પૂછવા માટે પૈસા લેવાના આરોપોનો સામનો કરી રહેલા તૃણમૂલ કોંગ્રેસના સાંસદ મહુઆ મોઇત્રાની મુશ્કેલીઓ વધી રહી છે. મહુઆને આજે લોકસભાની એથિક્સ કમિટી સમક્ષ હાજર થવાનું છે, પરંતુ તે પહેલા તેમના સંસદ એકાઉન્ટને લઈને મોટો ખુલાસો થયો છે. ભારતીય જનતા પાર્ટી (BJP)ના નજીકના સૂત્રોએ ઈન્ડિયા ટુડેને જણાવ્યું કે, તૃણમૂલ કોંગ્રેસ (TMC)ના લોકસભા સાંસદ મહુઆ મોઈત્રાનું ‘સંસદીય ખાતું’ દુબઈથી 47 વખત એક્સેસ કરવામાં આવ્યું હતું.

આ ખુલાસો લોકસભાની એથિક્સ કમિટી સમક્ષ ટીએમસી નેતાની નિર્ધારિત રજૂઆતના એક દિવસ પહેલા થયો હતો. મહુઆ સુપ્રીમ કોર્ટના વકીલ જય અનંત દેહાદ્રાય દ્વારા લગાવાયેલા “કેશ ફોર ક્વેરી” ના આરોપોનો સામનો કરી રહી છે.

કેશ-ફોર-ક્વેરી વિવાદ પછી ઈન્ડિયા ટુડે સાથે વિશેષ રીતે વાત કરતા, મહુઆ મોઈત્રાએ સ્વીકાર્યું કે તેણે તેના લાંબા સમયથી નજીકના મિત્ર, બિઝનેસમેન દર્શન હિરાનંદાની સાથે તેના લોગ-ઈન ક્રેડેન્શિયલ્સ શેર કર્યા છે. જો કે, તેનો હેતુ આર્થિક લાભ મેળવવાનો હતો તેવો તેણે સખત ઇનકાર કર્યો હતો.

14 વિદેશ પ્રવાસ

સૂત્રોએ એમ પણ જણાવ્યું કે, મહુઆ મોઇત્રાએ સાંસદ તરીકે 14 વિદેશ યાત્રાઓ કરી હતી, જેનો કોઈ હિસાબ નથી. સૂત્રોના જણાવ્યા અનુસાર, આ મુલાકાતો માટે સ્પીકરના કાર્યાલયને જરૂરી માહિતી આપવામાં આવી ન હતી.

આ કથિત પ્રવાસો ઘણા દેશોમાં કરવામાં આવ્યા હતા, જેમાં મહુઆ મોઇત્રા 10 મે, 2022ના રોજ યુકે, 20 નવેમ્બર, 2022ના રોજ યુએઈ, 13 મે, 2023ના રોજ યુ.એસ., 13 જૂન, 2023ના રોજ ફ્રાન્સ, ફરીથી 11 ઓગસ્ટ, 2023ના રોજ યુએઈ, અને 1 સપ્ટેમ્બર, 2023 ના રોજ ફરી એકવાર ફ્રાન્સની મુલાકાત લીધી.

વધુમાં, તેમની આંતરરાષ્ટ્રીય મુલાકાતોમાં 13 ફેબ્રુઆરી, 2019ના રોજ UK, 2 સપ્ટેમ્બર, 2019ના રોજ US, 8 ઓક્ટોબર, 2019ના રોજ બાંગ્લાદેશ અને 12 જાન્યુઆરી, 2020ના રોજ UKનો સમાવેશ થાય છે. વધુમાં, તેમણે ફરીથી 13 ફેબ્રુઆરી, 2023 ના રોજ યુએસ, 6 માર્ચ, 2020 ના રોજ નેપાળ, 1 ઓક્ટોબર, 2020 ના રોજ યુકે અને 7 નવેમ્બર, 2021 ના ​​રોજ યુએઈની મુલાકાત લીધી.

દેહદરાયના આરોપના આધારે, બીજેપી સાંસદ નિશિકાંત દુબેએ લોકસભાના સ્પીકર ઓમ બિરલાને અને પછી એથિક્સ પેનલને પત્ર લખીને કહ્યું કે, TMC સાંસદે બિઝનેસમેન દર્શન હિરાનંદાનીના નિર્દેશો અનુસાર તેમના સંસદીય ખાતાનો ઉપયોગ કર્યો હતો. દુબેએ પોતાના પત્રમાં જણાવ્યું હતું કે તેણે કથિત રીતે હિરાનંદાની પાસેથી નાણાકીય લાભ અને અન્ય લાભોના બદલામાં આ કર્યું હતું. હિરાનંદાની દુબઈ સ્થિત એક અગ્રણી બિઝનેસ ફેમિલી સાથે સંબંધ ધરાવે છે.

નિશિકાંત દુબેએ એવો પણ આક્ષેપ કર્યો છે કે હિરાનંદાનીએ લોકસભામાં વડા પ્રધાન નરેન્દ્ર મોદી અને ગૌતમ અદાણી સામે પ્રશ્નો ઉઠાવવા માટે મહુઆ મોઇત્રાને રોકડ આપી હતી, જે આરોપને તૃણમૂલ નેતાએ સ્પષ્ટપણે નકારી કાઢ્યો છે. તેમણે મહુઆને તાત્કાલિક અસરથી ગૃહમાંથી સસ્પેન્ડ કરવાની પણ માંગ કરી હતી. સ્પીકરને લખેલા તેમના પત્રમાં નિશિકાંત દુબેએ કહ્યું હતું કે મોઇત્રાએ તાજેતરમાં સંસદમાં પૂછેલા 61 પ્રશ્નોમાંથી 50 અદાણી જૂથ પર કેન્દ્રિત હતા.