‘મારી હત્યાનું કાવતરું નિષ્ફળ થયું, 13 ડિસેમ્બરે સંસદ પર હુમલાથી જવાબ આપીશ’, ખાલીસ્તાની આતંકીની ધમકી

Khalistani Terrorst Pannu: ખાલિસ્તાની આતંકવાદી ગુરપતવંત સિંહ પન્નુએ ફરી એકવાર ધમકી આપી છે. પન્નુએ ભારત પર હુમલાનો ધમકીભર્યો વીડિયો જાહેર કર્યો છે. પન્નુએ વીડિયોમાં કહ્યું કે, મારી હત્યાનું કાવતરું નિષ્ફળ ગયું. હું 13મી ડિસેમ્બરે સંસદ ભવન પર હુમલો કરીને જવાબ આપીશ. તમને જણાવી દઈએ કે 13 ડિસેમ્બર 2001ના રોજ સંસદ ભવન પર આતંકવાદી હુમલો થયો હતો.

વીડયો બનાવી ધમકી આપી

પન્નુએ વીડિયોમાં કહ્યું કે ભારતીય એજન્સીઓએ તેની હત્યા કરવાની યોજના બનાવી હતી, જે નિષ્ફળ રહી. હવે હુમલાના પ્લાનિંગના જવાબમાં તે 13 ડિસેમ્બરે સંસદ પર હુમલો કરશે. વીડિયોમાં પન્નુએ સંસદ ભવન હુમલાના દોષી અફઝલ ગુરુ સાથેનું એક પોસ્ટર પણ બહાર પાડ્યું છે, જેમાં લખ્યું છે કે ‘દિલ્હી બનશે પાકિસ્તાન’.

પન્નુનો નવો વીડિયો જોયા બાદ સુરક્ષા એજન્સીઓએ કહ્યું છે કે, પન્નુના વીડિયો સાંભળ્યા બાદ સ્પષ્ટ થાય છે કે પન્નુને આ સ્ક્રિપ્ટ પાકિસ્તાનની ગુપ્તચર એજન્સી ISIના K-2 ડેસ્ક દ્વારા આપવામાં આવી છે. વાસ્તવમાં, વીડિયોમાં એક તરફ પન્નુ ખાલિસ્તાનનો એજન્ડા ચલાવી રહ્યો છે, તો બીજી તરફ અફઝલ ગુરુનું નામ લઈને તે કાશ્મીરી આતંકવાદીઓ અને પાકિસ્તાનના કાશ્મીર એજન્ડાને પણ સમર્થન આપી રહ્યો છે. પન્નુના આ વીડિયો બાદ સુરક્ષા એજન્સીઓ હાઈ એલર્ટ પર છે.

પન્નુ અગાઉ પણ ધમકી આપી ચૂક્યા છે

આ પહેલા પણ ખાલિસ્તાની આતંકવાદી પન્નુ ધમકી આપી ચૂક્યો છે. પન્નુએ થોડા સમય પહેલા એક વીડિયો જાહેર કર્યો હતો. આમાં તેણે ધમકી આપી હતી કે 19 નવેમ્બરે શીખો એર ઈન્ડિયાની ફ્લાઈટમાં મુસાફરી ન કરે. આ વૈશ્વિક નાકાબંધી હશે. તેણે કહ્યું કે 19મી નવેમ્બરે એર ઈન્ડિયામાં મુસાફરી ન કરો, નહીં તો તમારો જીવ જોખમમાં મુકાઈ જશે. પન્નુએ વધુમાં દાવો કર્યો કે દિલ્હીનું ઈન્દિરા ગાંધી ઈન્ટરનેશનલ (IGI) એરપોર્ટ 19 નવેમ્બરે બંધ રહેશે અને તેનું નામ બદલવામાં આવશે.

અમેરિકન એજન્સીઓએ આ આરોપ લગાવ્યો હતો

તમને જણાવી દઈએ કે હાલમાં જ અમેરિકન એજન્સીઓએ ભારતીય વ્યક્તિની ધરપકડ કરીને પન્નુની હત્યાના કાવતરાને નિષ્ફળ બનાવ્યો હતો. અમેરિકન એજન્સીઓએ દાવો કર્યો હતો કે પકડાયેલ આરોપી ભારતીય એજન્સીઓના નિર્દેશ પર કામ કરતો હતો. જોકે, ભારતે આ આરોપોને સ્પષ્ટપણે નકારી કાઢ્યા છે. આ ઉપરાંત તપાસ માટે ઉચ્ચ સ્તરીય સમિતિની પણ રચના કરવામાં આવી છે.

કોણ છે આતંકવાદી પન્નુ?

ગુરપતવંત સિંહ પન્નુનો જન્મ પંજાબમાં થયો હતો. અભ્યાસ પણ અહીંથી જ કર્યો. હાલમાં વિદેશમાં છે. ક્યારેક તે કેનેડામાં રહે છે તો ક્યારેક અમેરિકામાં. ભારતમાં બહારથી આતંકવાદી હુમલા કરવાની ધમકી આપે છે. કેનેડામાં સ્થાયી થયેલા હિન્દુઓને ધમકી આપે છે. અને આ બધું તે ખુલ્લેઆમ કરે છે. પન્નુનો જન્મ 14 ફેબ્રુઆરી 1967ના રોજ થયો હતો. પન્નુના પિતા પંજાબમાં એક કંપનીમાં કામ કરતા હતા. તેનો એક ભાઈ પણ છે, જે વિદેશમાં રહે છે. તેના માતા-પિતા મૃત્યુ પામ્યા છે. પન્નુએ પંજાબ યુનિવર્સિટી, ચંદીગઢમાંથી કાયદાનો અભ્યાસ કર્યો છે. હાલમાં તેઓ અમેરિકામાં કાયદાની પ્રેક્ટિસ કરી રહ્યા છે. પન્નુએ 2007માં ‘શીખ ફોર જસ્ટિસ’ નામનું સંગઠન બનાવ્યું હતું. જુલાઈ 2020માં ભારતે પન્નુને આતંકવાદી જાહેર કર્યો હતો. પન્નુ આઈએસઆઈની મદદથી ખાલિસ્તાન અભિયાન ચલાવી રહ્યો છે.