15 ઓગસ્ટ પહેલા ડોડામાં આતંકીઓનું કાવતરું, સેનાના સર્ચ ઓપરેશનમાં કેપ્ટન શહીદ; 4 આતંકી ઠાર

Doda encounter: જમ્મુ-કાશ્મીરના ડોડા જિલ્લામાં આતંકવાદીઓ અને સુરક્ષાદળો વચ્ચે અથડામણ ચાલી રહી છે. જેમાં ચાર આતંકવાદીઓ ઠાર મરાયા હોવાના પણ અહેવાલ સામે આવી રહ્યા છે. જોકે, સેના દ્વારા આ અંગે સત્તાવાર નિવેદન આપવામાં આવ્યું નથી અને ભારતીય સેનાએ પુષ્ટિ કરી છે કે, એન્કાઉન્ટર દરમિયાન સેનાનો એક અધિકારી શહીદ થયા છે. સંરક્ષણ અધિકારીએ જણાવ્યું કે ભારતીય સેનાની 48 રાષ્ટ્રીય રાઈફલ્સનો એક કેપ્ટન શહીદ થયા છે. તમને જણાવી દઈએ કે ડોડા વિસ્તારમાં હજુ પણ સેનાનું ઓપરેશન ચાલુ છે. સેનાએ ડોડા વિસ્તારમાં આતંકવાદ વિરોધી ઓપરેશન હાથ ધર્યું હતું, જે દરમિયાન એમ-4 રાઈફલ અને ત્રણ બેગ મળી આવી હતી.

સેના-આતંકવાદીઓ વચ્ચે અથડામણ

ગયા મહિને ડોડા જિલ્લામાં સેના અને આતંકવાદીઓ વચ્ચે અથડામણ થઈ હતી. આ એન્કાઉન્ટર ત્યારે થઈ જ્યારે રાષ્ટ્રીય રાઈફલ્સ અને જમ્મુ અને કાશ્મીર પોલીસના સ્પેશિયલ ઓપરેશન્સ ગ્રુપ (SOG) ના સૈનિકોએ ડોડા શહેરથી લગભગ 55 કિમી દૂર દેસા જંગલ વિસ્તારમાં ધારી ગોટે ઉરારબાગીમાં સંયુક્ત સર્ચ ઓપરેશન શરૂ કર્યું. થોડીવારના ગોળીબાર બાદ આતંકીઓએ ભાગવાનો પ્રયાસ કર્યો હતો. અધિકારીઓએ જણાવ્યું કે આ અથડામણમાં પાંચ જવાન ગંભીર રીતે ઘાયલ થયા છે, જેમને સારવાર માટે હોસ્પિટલમાં દાખલ કરવામાં આવ્યા છે.

કઠુઆમાં આતંકીઓએ ઓચિંતો કર્યો હતો હુમલો 

ડોડાના ગઢી ભગવા વિસ્તારમાં 9 જુલાઈની સાંજે શરૂ થયેલા એન્કાઉન્ટરમાં સેના અને આતંકવાદીઓ તરફથી સતત ગોળીબાર થઈ રહ્યો હતો. આ વિસ્તારમાં 2-3 આતંકીઓ ફસાયા હોવાની આશંકા હતી. જોકે, તેઓ ભાગવામાં સફળ રહ્યા હતા. 8 જુલાઈએ જમ્મુ અને કાશ્મીરના કઠુઆ જિલ્લામાં આતંકવાદીઓએ સેનાની બે ટ્રકો પર હુમલો કરીને હુમલો કર્યો હતો, જેમાં એક જુનિયર કમિશન્ડ ઓફિસર (JCO) સહિત 5 જવાનો શહીદ થયા હતા. બપોરના 3.30 વાગ્યા હતા અને કઠુઆથી લગભગ 123 કિલોમીટર દૂર લોહાઈ મલ્હાર બ્લોકના મચ્છેડી વિસ્તારમાં લગભગ 12 સેનાના જવાન બે ટ્રકમાં બદનોટા જઈ રહ્યા હતા. આતંકવાદીઓએ ઓચિંતો હુમલો કર્યો અને પહેલા આર્મી ટ્રક પર ગ્રેનેડ ફેંક્યો અને પછી ગોળીબાર કર્યો. સેનાના જવાનોએ ફરીથી નિયંત્રણ મેળવ્યું અને જવાબી ગોળીબાર શરૂ કર્યો ત્યાં સુધીમાં આતંકવાદીઓ જંગલમાં ભાગવામાં સફળ થયા હતા. કાશ્મીર ટાઈગર્સે પણ આ હુમલાની જવાબદારી લીધી હતી. જેમાં 3 થી 4 આતંકવાદીઓ સામેલ હોવાનું બહાર આવ્યું હતું, જેઓ અદ્યતન હથિયારોથી સજ્જ હતા. આ હુમલામાં સ્થાનિક ગાઇડે આતંકીઓને મદદ કરી હતી. 6 જુલાઈના રોજ સુરક્ષા દળોએ કુલગામ જિલ્લામાં બે અલગ-અલગ એન્કાઉન્ટરમાં છ આતંકવાદીઓને ઠાર કર્યા હતા. આ દરમિયાન બે જવાનો શહીદ થયા હતા.