હમાસ-ઈઝરાયલના યુદ્ધ વચ્ચે ચીનમાં ઈઝરાયલના રાજદૂત પર જીવલેણ હુમલો, છરીથી વાર કરાયો

Isreal Diplomate Attacked: ઈઝરાયેલ અને હમાસ વચ્ચે ચાલી રહેલા યુદ્ધ વચ્ચે ચીનમાં ઈઝરાયેલના રાજદ્વારી પર ઘાતક હુમલો થયો છે. ઈઝરાયેલના રાજદ્વારી પર ચાકુ વડે હુમલો કરવામાં આવ્યો છે. ઈઝરાયેલના વિદેશ મંત્રાલયે હુમલાની પુષ્ટિ કરી છે. મંત્રાલય દ્વારા કહેવામાં આવ્યું છે કે રાજદ્વારીની હોસ્પિટલમાં સારવાર ચાલી રહી છે અને તેમની સ્થિતિ સ્થિર છે. આ પહેલા ઇજિપ્તમાં એક પોલીસ અધિકારીએ ઇઝરાયલી પ્રવાસીઓ પર ગોળીબાર કર્યો હતો. આ ગોળીબારમાં બે ઈઝરાયેલી પ્રવાસીઓ અને એક ઈજિપ્તીયન નાગરિક માર્યા ગયા હતા.

વિદેશ મંત્રાલયે કહ્યું કે, બેઇજિંગમાં ઇઝરાયેલી દૂતાવાસના રાજદ્વારી પર શુક્રવારે હુમલો કરવામાં આવ્યો હતો. જોકે હુમલાનું કારણ બહાર આવ્યું નથી.

હમાસ અને ઇઝરાયેલ વચ્ચે યુદ્ધ ચાલુ છે

ચીનમાં ઈઝરાયેલ પર આ હુમલો એવા સમયે થયો છે જ્યારે ઈઝરાયેલ અને હમાસ વચ્ચે ભીષણ યુદ્ધ ચાલી રહ્યું છે. પેલેસ્ટાઈનના સંગઠન હમાસે 7 ઓક્ટોબરે ગાઝા પટ્ટીમાંથી ઈઝરાયેલ પર હજારો રોકેટ છોડ્યા હતા. આટલું જ નહીં, હમાસના હુમલાખોરોએ ઈઝરાયેલની સીમામાં ઘૂસીને નરસંહાર કર્યો હતો. આ હુમલાઓમાં 1200 લોકોના મોત થયા છે. આ હુમલાના જવાબમાં ઈઝરાયેલ ગાઝા પટ્ટીમાં હમાસના સ્થાનો પર બોમ્બમારો કરી રહ્યું છે. ઈઝરાયેલના હુમલામાં અત્યાર સુધીમાં 1500 લોકો માર્યા ગયા છે.

ઈઝરાયલ અને હમાસ વચ્ચે ચાલી રહેલા યુદ્ધને કારણે દુનિયાના તમામ દેશો બે જૂથમાં વહેંચાઈ ગયા છે. જ્યાં અમેરિકા, બ્રિટન, ફ્રાન્સ, જર્મની સહિત ઘણા યુરોપિયન દેશોએ હમાસને આતંકવાદી સંગઠન ગણાવીને ઈઝરાયેલની કાર્યવાહીને યોગ્ય ઠેરવી છે. તે જ સમયે, ઈરાન અને સાઉદી સહિત તમામ આરબ દેશો ઈઝરાયેલની કાર્યવાહીને ખોટી ગણાવી રહ્યા છે.

આ બધાની વચ્ચે અમેરિકા, બ્રિટન, ઓસ્ટ્રેલિયા, ફ્રાન્સ, કેનેડાથી લઈને યુરોપ સુધીના ઘણા દેશોમાં પેલેસ્ટાઈન અને ઈઝરાયેલના સમર્થનમાં વિરોધ પ્રદર્શન થઈ રહ્યા છે.