‘ગાજામાં ઈઝરાયલે બોમ્બમારો ન રોક્યો તો તેની આગમાં અમેરિકા પણ નહીં બચે’, ઈરાને આપી ધમકી

Iran Warns US: ઇઝરાયેલ અને હમાસ વચ્ચે યુદ્ધ શરૂ થયાને 20 દિવસથી વધુ સમય થઈ ગયો છે. યુદ્ધમાં બંને તરફથી ભારે વિનાશ થયો છે. દુનિયા બે જૂથોમાં વહેંચાઈ ગઈ છે. અમેરિકા આ ​​યુદ્ધમાં હમાસ વિરુદ્ધ ઈઝરાયેલને ખુલ્લેઆમ સમર્થન આપી રહ્યું છે. આવી સ્થિતિમાં ઈરાને ફરી એકવાર અમેરિકાને ચેતવણી આપી છે.

ઈરાનના વિદેશ મંત્રી હુસૈન અમીર અબ્દુલ્લહાનિયાએ કહ્યું છે કે, જો ઈઝરાયેલ સરકાર ગાઝામાં પેલેસ્ટાઈનીઓનો નરસંહાર ચાલુ રાખશે તો અમેરિકા પણ તેની આગમાંથી બચશે નહીં.

ગાજામાં નરસંહાર રોકવા ઈરાનની અમેરિકાને ચીમકી

તેમણે કહ્યું કે, હું અમેરિકન સરકારને કહેવા માંગુ છું જે પેલેસ્ટાઈનમાં નરસંહારની દેખરેખ કરી રહી છે. અમે પ્રદેશમાં યુદ્ધ નથી ઈચ્છતા, પરંતુ જો ગાઝામાં નરસંહાર ચાલુ રહેશે તો અમેરિકા પણ આ આગમાંથી બચશે નહીં. અમેરિકાએ શાંતિ અને સલામતી માટે કામ કરવું જોઈએ અને લોકોને યુદ્ધની આગમાં ન ફેંકવા જોઈએ.

તેમણે કહ્યું કે, ગાઝા પર હુમલો કરવા માટે રોકેટ, ટેન્ક અને બોમ્બ મોકલવાને બદલે અમેરિકાએ આ નરસંહારનું સમર્થન કરવાનું બંધ કરવું જોઈએ. અમેરિકા ત્રણ અઠવાડિયાથી ઓછા સમયમાં 7000થી વધુ નાગરિકોની હત્યાનું સાક્ષી છે. વ્હાઇટ હાઉસ ઇઝરાયેલ સરકારને આર્થિક અને રાજકીય રીતે સંપૂર્ણ સમર્થન આપી રહ્યું છે. ગુરુવારે સંયુક્ત રાષ્ટ્ર મહાસભાની વિશેષ બેઠક દરમિયાન અમીરે આ નિવેદન આપ્યું હતું.

તમને જણાવી દઈએ કે આ યુદ્ધ પહેલા અમેરિકાએ ઈરાનને ઈઝરાયલ વિરૂદ્ધ નિવેદનબાજીને લઈને ધમકી પણ આપી હતી. અમેરિકી વિદેશ મંત્રી એન્ટની બ્લિંકને કડક શબ્દોમાં કહ્યું હતું કે, અમે ઈરાન સાથે યુદ્ધ નથી ઈચ્છતા, પરંતુ જો ઈરાન અથવા તેના પ્રતિનિધિઓ ક્યાંય પણ અમેરિકન કર્મચારીઓ પર હુમલો કરે છે તો અમે (અમેરિકા) જાણીએ છીએ કે અમારા લોકોની સુરક્ષા કેવી રીતે કરવી.

તેમણે કહ્યું હતું કે, અમે અમારી ચેનલો દ્વારા ઈરાની અધિકારીઓને સતત કહ્યું છે કે અમેરિકા ઈરાન સાથે કોઈપણ પ્રકારનું યુદ્ધ વધારવા માંગતું નથી. પરંતુ જો ઈરાન કોઈ ભૂલ કરશે તો અમે અમારા લોકોની સુરક્ષા કરીશું.

અમેરિકા પહેલાથી જ લશ્કરી જહાજ મોકલી ચૂક્યું છે

7 ઓક્ટોબરે હમાસ દ્વારા ઈઝરાયેલ પર આતંકવાદી હુમલો થયો ત્યારથી જ અમેરિકા ઈઝરાયેલની પાછળ ઢાલ બનીને ઉભું છે. હમાસના હુમલા બાદ જ્યારે ઈઝરાયેલે ગાઝામાં ભારે બોમ્બમારો શરૂ કર્યો ત્યારે ઈરાને પણ આ યુદ્ધમાં કૂદી પડવાની ચેતવણી આપી હતી. ઈરાનની આ ધમકીઓ બાદ અમેરિકન યહૂદી નેતાઓએ અમેરિકી રાષ્ટ્રપતિ જો બાઇડન સાથે મુલાકાત કરી હતી. આ બેઠકમાં બાઇડને ઈરાનને ચેતવણી આપી હતી કે ઈઝરાયેલ નજીક અમેરિકન વિમાનો અને સૈન્ય જહાજોની તૈનાતીને ઈરાન માટે સંકેત તરીકે જોવામાં આવે.