હવે ભારતની અંજૂ ફેસબુક ફ્રેન્ડને મળવા માટે પાકિસ્તાન પહોંચી, ‘સીમા હૈદર’ જેવી છે સ્ટોરી

નવી દિલ્હી: એક તરફ સીમા હૈદર પ્રેમમાં પડીને સરહદ પાર કરીને ગેરકાયદેસર રીતે પાકિસ્તાનથી ભારત પહોંચી ગઈ છે. એ જ રીતે હવે ભારતની અંજુ પ્રેમના ચક્કરમાં વાઘા બોર્ડર પાર કરીને પાકિસ્તાન પહોંચી ગઈ છે. હવે તેની લવસ્ટોરીની પણ ખૂબ ચર્ચા થઈ રહી છે.

યુપીના કાલોરની રહેવાસી અંજુ તેના ફેસબુક ફ્રેન્ડ અને પ્રેમીને મળવા પાકિસ્તાન પહોંચી હતી. અંજુ પ્રેમી નસરુલ્લાને મળવા પાકિસ્તાનના ખૈબર પખ્તુનખ્વા પહોંચી છે. નસરુલ્લા ત્યાં રહે છે અને વ્યવસાયે તબીબી પ્રતિનિધિ છે.

અંજુના પાકિસ્તાનના વિઝાની વિગતો પણ સામે આવી છે, અંજુના પાકિસ્તાન જવા માટે પાકિસ્તાન દ્વારા 4 મેના રોજ વિઝા આપવામાં આવ્યા હતા. આ વિઝાની માન્યતા 90 દિવસની છે અને તે વાઘા બોર્ડરથી પાકિસ્તાનમાં પ્રવેશી છે. ભારતીય યુવતી અંજુ કહે છે કે તે નસરાલ્લાહને પ્રેમ કરે છે અને તેના વિના રહી શકતી નથી.

જે રીતે સુરક્ષા એજન્સીઓ અહીં સીમા હૈદરની તપાસ કરી રહી છે, તેવી જ રીતે અંજુ પાકિસ્તાન ગયા બાદ ત્યાંની એજન્સીઓ પણ તેની તપાસ કરી રહી છે. જણાવી દઈએ કે સીમા હૈદર અને અંજુની સ્ટોરી સમાન છે. પ્રેમમાં પડ્યા પછી બંનેએ પોતાના દેશની સરહદો પાર કરી છે.

સીમા હૈદર ગેરકાયદેસર રીતે ભારત આવી હતી
તમને જણાવી દઈએ કે સીમા હૈદરની લવસ્ટોરી ભારતથી લઈને પાકિસ્તાન સુધી ચર્ચાનો વિષય બની ગઈ છે. PUBG ગેમ રમતી વખતે ગ્રેટર નોઈડાના સચિન મીણાના પ્રેમમાં પડ્યા પછી, ચાર બાળકોની માતા સીમા હૈદર પોતાનો દેશ છોડી નેપાળ થઈને ગેરકાયદેસર રીતે ભારત આવી ગઈ.

યુપીમાં આવ્યા બાદ સીમા હૈદર હવે એટીએસની તપાસ અને પૂછપરછનો સામનો કરી રહી છે. આજતકને આપેલા એક ખાસ ઈન્ટરવ્યુમાં સીમા હૈદરે કહ્યું કે, હવે તે પાકિસ્તાનની નહીં પણ ભારતની વહુ છે. સીમાએ કહ્યું કે તે કોઈ એજન્ટ નથી અને હવે ભારત તેનો પોતાનો દેશ છે.