આ ભારતીય બિઝનેસમેને લંડનમાં બીજું સૌથી મોંઘું ઘર ખરીદ્યું, મુકેશ અંબાણીને પણ પાછળ છોડ્યા

Adar Poonawala London House: સીરમ ઈન્સ્ટિટ્યૂટ ઓફ ઈન્ડિયાના સીઈઓ અદાર પૂનાવાલાએ લંડનમાં બીજું સૌથી મોંઘું ઘર ખરીદીને ઈતિહાસ રચ્યો છે. આ આલીશાન ઘર ગયા વર્ષે વેચવામાં આવ્યું હતું. તેની કિંમત 1,446 કરોડ રૂપિયા છે. પૂનાવાલા પરિવારનું આ ઘર તેમની યુકે સ્થિત સબસિડિયરી સીરમ લાઈફ સાયન્સે ખરીદ્યું છે. 42 વર્ષીય અબજોપતિ અદાર પૂનાવાલાએ હાઇડ પાર્ક પાસે લગભગ એક સદી જૂનું એબરકોનવે હાઉસ ખરીદ્યું છે. આ ઘર પોલેન્ડના સૌથી ધનિક વ્યક્તિ અને દિવંગત ઉદ્યોગપતિ જાન કુલ્ઝિકની પુત્રી ડોમિનિકા કુલ્ઝિકનું હતું. જોકે, સૂત્રોનું કહેવું છે કે પૂનાવાલા પરિવારનો કાયમી ધોરણે બ્રિટન જવાનો કોઈ ઈરાદો નથી. આ ઘર કંપની અને પરિવાર માટે યુકેમાં રહેવા માટે છે.

આ ઘર લંડનમાં વેચાયેલું બીજું સૌથી મોંઘું ઘર બની ગયું છે. સૌથી મોંઘું ઘર 2-8A રટલેન્ડ ગેટ છે જે જાન્યુઆરી 2020માં રૂ. 19,000 કરોડમાં વેચાયું હતું. ફાઈનાન્સિયલ ટાઈમ્સ અનુસાર, આ ઘર સાઉદી અરેબિયાના પૂર્વ ક્રાઉન પ્રિન્સ સુલતાન બિન અબ્દુલ અઝીઝની એસ્ટેટમાંથી એવરગ્રાન્ડના સ્થાપક અને ચેરમેન હુઈ કા યાનને વેચવામાં આવ્યું હતું.

કોણ છે અદાર પૂનાવાલા?

અદાર પૂનાવાલા સાયરસ પૂનાવાલાના પુત્ર છે. સાયરસ પૂનાવાલાની કુલ સંપત્તિ લગભગ 1.8 લાખ કરોડ રૂપિયા છે. અદારે પોતાની આગવી ઓળખ બનાવી છે. તેમણે કેન્ટરબરીની પ્રતિષ્ઠિત સેન્ટ એડમન્ડ સ્કૂલ, પૂણેની બિશપ્સ સ્કૂલ અને છેલ્લે વેસ્ટમિંસ્ટર યુનિવર્સિટીમાં અભ્યાસ કર્યો. લંડનમાં રહીને તેમણે બાયોટેકનોલોજી અને મેનેજમેન્ટમાં ડિગ્રી મેળવી. 2011 માં, અદાર પૂનાવાલાને સીરમ ઇન્સ્ટિટ્યૂટ ઓફ ઇન્ડિયાના CEO નિયુક્ત કરવામાં આવ્યા હતા. આનાથી કંપનીને એક નવી દિશા મળી. અદારે COVID-19 મહામારી દરમિયાન વૈશ્વિક સ્તરે મહત્વપૂર્ણ ભૂમિકા ભજવી હતી. SII આ પ્રયાસનો અભિન્ન ભાગ હતો. અદારે વૈશ્વિક રોગચાળા દરમિયાન 70 દેશોમાં COVID-19 રસીના ડોઝ પૂરા પાડવામાં SIIનું નેતૃત્વ કર્યું.

લંડનમાં ઘણા ભારતીય ઉદ્યોગપતિઓના ઘરો

ઘણા ભારતીય ઉદ્યોગપતિઓ પાસે લંડનમાં વૈભવી મકાનો છે. રિલાયન્સ ઈન્ડસ્ટ્રીઝના ચેરમેન મુકેશ અંબાણીની સ્ટોક પાર્કમાં આલીશાન હોટેલ છે. 49 બેડરૂમની આ હોટલમાં 13 ટેનિસ કોર્ટ, 14 એકર ખાનગી બગીચા અને 27 હોલનો ગોલ્ફ કોર્સ છે. આ હોટેલ મુકેશ અંબાણીએ 2020માં 529 કરોડ રૂપિયામાં ખરીદી હતી.

એવી જ રીતે લક્ષ્મી મિત્તલના પણ લંડનના પોશ વિસ્તારોમાં ઘણા બંગલા છે. કહેવાય છે કે બિશપ એવન્યુમાં આવેલો સમર પેલેસ તેમની મિલકત છે. તેમણે 2004માં કેન્સિંગ્ટન પેલેસ ગાર્ડન્સમાં 630 કરોડ રૂપિયામાં 12 બેડરૂમનું આલીશાન ઘર ખરીદ્યું હતું. તેમાં 20 કાર માટે પાર્કિંગની સુવિધા પણ હતી. જો કે, લાઈવ મિન્ટ અનુસાર, લક્ષ્મી મિત્તલે 2013માં આ ઘર વેચવાનો નિર્ણય લીધો હતો.