ભારત આવતું માલવાહક જહાજ મધદરિયે હેલિકોપ્ટરથી હાઈજેક કરાયું, 25 ક્રૂ મેમ્બરને બંધક બનાવ્યા

Ship hijacked: યમનના વિદ્રોહી સંગઠન હુતીએ રેડ સીમાં એક માલવાહક જહાજનું અપહરણ કરી લીધું છે. આ આંતરરાષ્ટ્રીય માલવાહક જહાજ તુર્કીથી ભારત જઈ રહ્યું હતું. જહાજમાં 25 યુક્રેનિયન, બલ્ગેરિયન, ફિલિપિનો અને મેક્સીકન સભ્યો છે. હુતીઓએ તેમને પણ બંધક બનાવી લીધા છે. વાસ્તવમાં આ જહાજ બ્રિટિશ કાર્ગો કંપનીનું છે. પરંતુ તેનું ઈઝરાયેલ કનેક્શન પણ સામે આવ્યું છે. વાસ્તવમાં આ જહાજ ઈઝરાયેલના એક બિઝનેસમેનનું છે. જોકે, તેમાં કોઈ ઈઝરાયલી નાગરિક નથી.

હમાસના સમર્થનમાં હુતી સંગઠન

ઈઝરાયેલની સેનાએ પણ જહાજને હાઈજેક કર્યાની પુષ્ટિ કરી છે. ઈઝરાયેલે તેને ઈરાની આતંકવાદનું બીજું જીવંત ઉદાહરણ ગણાવ્યું હતું. હમાસ અને ઈઝરાયલ વચ્ચે ભીષણ યુદ્ધ ચાલી રહ્યું છે ત્યારે હુતીએ આ જહાજનું અપહરણ કર્યું છે. હુતી વિદ્રોહીઓ પણ આ યુદ્ધમાં હમાસને સાથ આપી રહ્યા છે. હુતી લડવૈયાઓ પણ ઇઝરાયલ પર મિસાઇલો છોડી રહ્યા છે. આવી સ્થિતિમાં હમાસે જહાજને હાઇજેક કરવા બદલ હુતીનો આભાર માન્યો છે.

જહાજનું ઈઝરાયલ સાથે કનેક્શન નીકળ્યું

ઈઝરાયેલની સેનાએ કહ્યું કે, આ જહાજ તુર્કીથી ભારત જઈ રહ્યું હતું. જહાજમાં કોઈ ઈઝરાયેલ નાગરીકો સવાર ન હતા. જો કે, યુક્રેનિયન, બલ્ગેરિયન, ફિલિપિનો અને મેક્સીકન સહિત વિવિધ રાષ્ટ્રીયતાના 25 ક્રૂ સભ્યો હતા. ઈઝરાયેલે કહ્યું કે, આ જહાજ બ્રિટિશ કંપનીની માલિકીનું છે અને તેનું સંચાલન જાપાની કંપની કરે છે. ઈઝરાયેલની સેનાએ સ્પષ્ટતા કરી છે કે આ જહાજ ઈઝરાયેલનું નથી.

જો કે, મેરીટાઇમ સિક્યોરિટી કંપની એમ્બ્રેએ જણાવ્યું હતું કે, કાર્ગો જહાજ ‘રે કાર કેરિયર’ તરીકે સૂચિબદ્ધ છે, તેની મૂળ કંપની ઇઝરાયેલના ઉદ્યોગપતિ અબ્રાહમ રામી ઉંગારની માલિકીની છે. હારેટ્ઝના જણાવ્યા અનુસાર, અબ્રાહમ ઇઝરાયેલના સૌથી ધનિક વ્યક્તિઓમાંના એક છે, જેની કુલ સંપત્તિ $2 બિલિયનથી વધુ છે. તેઓ ઇઝરાયેલના સૌથી મોટા મોટર વાહન આયાતકારોમાંના એક છે.

શું મોસાદ દરિયામાં ઓપરેશન કરશે?

યુદ્ધની વચ્ચે હુતી સંગઠન દ્વારા રેડ સીમાં જહાજનું અપહરણ કરવું એ ઈઝરાયેલ માટે સીધો પડકાર માનવામાં આવી રહ્યો છે. આવી સ્થિતિમાં સવાલ એ ઉઠી રહ્યો છે કે શું હમાસ, હિઝબુલ્લાહ અને હુતી સહિતના તમામ મોરચે યુદ્ધ ચલાવી રહેલું ઈઝરાયેલ જહાજને અપહરણકારોથી મુક્ત કરાવવા માટે આગળ આવશે. કોઈપણ રીતે, ઈઝરાયેલની જાસૂસી સંસ્થા મોસાદ પાસે આ પ્રકારની કાર્યવાહી કરવાનો ઈતિહાસ છે.

મોસાદે 44 વર્ષ પહેલા આવું જ એક ઓપરેશન કર્યું હતું

આ પહેલા 27 જૂન 1976ના રોજ એક વિમાને ઈઝરાયેલની રાજધાની તેલ અવીવથી ગ્રીસની રાજધાની એથેન્સ માટે ઉડાન ભરી હતી. ફ્લાઇટમાં 246 મુસાફરો અને ક્રૂ મેમ્બર હાજર હતા. આ પ્લેનને પેલેસ્ટિનિયન આતંકવાદીઓએ હાઇજેક કર્યું હતું. આ વિમાનને યુગાન્ડા લઈ જવામાં આવ્યું હતું. ઇઝરાયેલની ગુપ્તચર એજન્સી અને કમાન્ડોએ પોતાના નાગરિકોને બચાવવા માટે ‘ઓપરેશન થંડરબોલ્ટ’ હાથ ધર્યું હતું. અપહરણના 7 દિવસની અંદર 4 જુલાઈના રોજ 4000 કિલોમીટર દૂર યુગાન્ડા જઈને ઈઝરાયલી કમાન્ડોએ આતંકવાદીઓને તો ખતમ કર્યા જ, પરંતુ એરપોર્ટ પર પાર્ક કરેલા યુગાન્ડાના તમામ ફાઈટર પ્લેનનો પણ નાશ કર્યો અને તેના નાગરિકોને સુરક્ષિત બહાર કાઢ્યા. આ ઓપરેશનમાં ઈઝરાયેલના વડાપ્રધાન બેન્જામિન નેતન્યાહુ પણ સામેલ હતા. તેમના ભાઈ યોનાથન નેતન્યાહૂએ આ ઓપરેશનમાં જીવ ગુમાવ્યો હતો. આ ઓપરેશન માટે મોસાદની વિશ્વભરમાં પ્રશંસા થઈ હતી.

હુતીઓ કોણ છે?

હુતીએ 2014માં યમનની રાજધાની સના પર કબજો કર્યો હતો. હુતી સરકારને ઈરાનનું સમર્થન છે. 1980ના દાયકામાં યમનના ઉત્તરીય પ્રદેશમાં શિયા મુસ્લિમોનું સૌથી મોટું આદિવાસી સંગઠન હુતીઓ ઉભરી આવ્યું હતું. હમાસ અને ઈઝરાયેલ વચ્ચે ચાલી રહેલા યુદ્ધમાં ઈરાને આ સંગઠનનું સમર્થન કર્યું છે, જે બાદ તેના લડવૈયાઓએ રેડ સીમાં ઈઝરાયેલ તરફ મિસાઈલ છોડી હતી. પરંતુ ઈઝરાયેલે તેને હવામાં જ નિષ્ફળ બનાવી દીધો. ઈઝરાયેલે તેનો નાશ કરવા માટે પ્રથમ વખત એરો સિસ્ટમનો ઉપયોગ કર્યો છે. એરો ડિફેન્સ સિસ્ટમ ઈઝરાયેલ અને અમેરિકાનો સંયુક્ત પ્રોજેક્ટ છે.

હુતીઓએ જહાજને કેવી રીતે હાઇજેક કર્યું?

હુતી દ્વારા જહાજના અપહરણનો વીડિયો પણ જાહેર કરવામાં આવ્યો છે. એવું જોવા મળે છે કે અચાનક જહાજની ઉપર એક હેલિકોપ્ટર દેખાય છે. થોડી જ ક્ષણોમાં, બંદૂકો લઈને આવેલા હુતી બળવાખોરો નીચે ઉતરીને પોઝીશન લઈ લે છે. આ લોકો જહાજના એન્ટ્રી ગેટ પર પહોંચે છે અને ફાયરિંગ શરૂ કરે છે. વીડિયોમાં જોવા મળી રહ્યું છે કે પહેલા ડ્રાઈવરને બંધક બનાવવામાં આવે છે. બાદમાં તેઓ વહાણને આગળ લઈ જાય છે. કેટલીક બોટ પણ નજીકમાં જતી જોવા મળે છે.