Ram Mandir: દેશના પાંચ રાજ્યમાં 22 જાન્યુઆરીએ પ્રાણ પ્રતિષ્ઠાના દિવસે જાહેર કરાઈ રજા

Ram Mandir Pran Pratishtha: અયોધ્યામાં રામ મંદિરના પ્રાણ પ્રતિષ્ઠા સમારોહને હવે ગણતરીના દિવસો જ રહ્યા છે. જેને લઈ સમગ્ર દેશમાં રામનામનો વાયરો ચાલી રહ્યો છે. એવામાં કેટલાક રાજ્યોએ તો આ ઉજવણીના દિવસે જાહેર રજા જાહેર કરી છે. 22 જાન્યુઆરીએ વડાપ્રધાન નરેન્દ્ર મોદી રામલલાની પ્રતિમાનું ઉદ્ઘાટન કરશે. આ દિવસે અયોધ્યામાં ભવ્ય સમારોહનું આયોજન કરવામાં આવશે.

મહેમાનો માટે સંભારણું તરીકે મંદિરમાંથી આદરણીય ‘રામ રાજ મિટ્ટી’ મુખ્ય આકર્ષણ છે. આ પવિત્ર ભેટ, દૈવી કૃપાનું પ્રતીક છે, તેનો ઉપયોગ ઘરના બગીચા અથવા ફૂલના કુંડામાં કરી શકાય છે, આધ્યાત્મિક વાતાવરણમાં વધારો કરે છે. જેઓ પ્રાણ પ્રતિષ્ઠા કાર્યક્રમમાં હાજર રહી શકતા નથી તેઓ પણ ભવિષ્યમાં આ સાર્થક ભેટ મેળવી શકે છે. દેશના ઘણા રાજ્યોએ આ ઐતિહાસિક અવસરના સાક્ષી બનવા રજા જાહેર કરી છે.

આ પાંચ રાજ્યમાં રહેશે રજા

ઉત્તર પ્રદેશ: 22 જાન્યુઆરીએ મુખ્યમંત્રી યોગી આદિત્યનાથના આદેશ અનુસાર, રામ મંદિર ‘પ્રાણ પ્રતિષ્ઠા’ સમારોહને ધ્યાનમાં રાખીને ઉત્તર પ્રદેશમાં શૈક્ષણિક સંસ્થાઓ બંધ રહેશે. તેમજ સમગ્ર રાજ્યમાં દારૂની દુકાનો પણ બંધ રાખવાના નિર્દેશ આપવામાં આવ્યા છે.

મધ્યપ્રદેશ: મુખ્યમંત્રી મોહન યાદવે 22 જાન્યુઆરીના રોજ શાળાઓમાં રજા જાહેર કરી છે. તેમજ દારૂની દુકાનો બંધ રાખવાનો આદેશ જારી કરતી વખતે મોહન યાદવે રાજ્યમાં 22 જાન્યુઆરીને ‘ડ્રાય ડે’ તરીકે પણ જાહેર કર્યો છે.

ગોવા: ગોવા સરકારે અયોધ્યામાં રામ જન્મભૂમિ મંદિરમાં પ્રાણ પ્રતિષ્ઠા સમારોહને ધ્યાનમાં રાખીને 22 જાન્યુઆરીએ સરકારી કર્મચારીઓ અને શાળાઓમાં રજાની પણ જાહેરાત કરી છે.

છત્તીસગઢ: અયોધ્યામાં રામ મંદિરમાં મૂર્તિના અભિષેક સમારોહની ઉજવણી માટે છત્તીસગઢ સરકારે રાજ્યની તમામ સરકારી શાળાઓ અને કોલેજોમાં 22 જાન્યુઆરીએ રજા જાહેર કરી છે. મુખ્યમંત્રી વિષ્ણુદેવ સાંઈએ સોશિયલ મીડિયા પર આની જાહેરાત કરી હતી.

હરિયાણા: હરિયાણા સરકારે પણ રામ મંદિર પ્રાણ પ્રતિષ્ઠાને ધ્યાનમાં રાખીને 22 જાન્યુઆરીએ શાળાઓ બંધ રાખવાની જાહેરાત કરી છે. ઉપરાંત, પ્રાણ પ્રતિષ્ઠા સમારોહના દિવસે રાજ્યમાં દારૂબંધી રહેશે.