ઉત્તર ભારતમાં ‘જળ પ્રલય’, યમુનાએ ભયનજક સપાટી વટાવતા પૂરનું એલર્ટ, હિમાચલમાં રેડ એલર્ટ

નવી દિલ્હી: હિમાચલ, ઉત્તરાખંડ, દિલ્હી, યુપી અને પંજાબમાં 6 દિવસથી સતત વરસાદ પડી રહ્યો છે. હિમાચલમાં 24 કલાકમાં 39 સ્થળોએ ભૂસ્ખલન થયું છે. બિયાસ નદીના વહેણને કારણે અનેક ઈમારતો ધોવાઈ ગઈ છે. છેલ્લા 72 કલાકમાં દેશના વિવિધ રાજ્યોમાં 42 લોકોએ જીવ ગુમાવ્યા છે. હિમાચલમાં 20, જમ્મુ-કાશ્મીરમાં 15, દિલ્હીમાં પાંચ અને રાજસ્થાન અને હરિયાણામાં એક-એકના મોત થયા છે. દિલ્હીમાં યમુના નદીનું જળસ્તર ખતરાના નિશાનને વટાવી ગયું છે. મંગળવારે સવારે 8 વાગ્યા સુધી નદીનું પાણી 206.32 મીટરે વહી રહ્યું હતું. 1978માં, સૌથી વધુ 207.49 મીટર સુધી ગયો.

હરિયાણામાં ટ્રેન વ્યવહારને અસર
હરિયાણાના કરનાલમાં ભારે વરસાદને કારણે અનેક ગામોમાં પાણી ભરાઈ ગયા છે. ભારે પાણી ભરાવાને કારણે લોકોને બોટ દ્વારા બહાર કાઢવામાં આવી રહ્યા છે. સાથે જ વરસાદને કારણે રેલ સુવિધા પર પણ અસર પડી છે. ભારે વરસાદને કારણે સનેહવાલ-અંબાલા રૂટ પરની ઘણી ટ્રેનોને અસર થઈ છે. ઉત્તર રેલવેના પીઆરઓએ જણાવ્યું કે રેલવે ટ્રેક પર પાણી ભરાઈ ગયા છે, જેના કારણે ટ્રેન નંબર 18102, 12266, 14034, 12414, 12446 અને 12426ને સનેહવાલ-અંબાલા રૂટ પર ડાયવર્ટ કરવામાં આવી છે.

યમુનાનું જળસ્તર જોખમી સ્તરને પાર પહોંચ્યું
દિલ્હીમાં છેલ્લા ત્રણ દિવસથી સતત પડી રહેલા વરસાદ વચ્ચે યમુના નદીમાંના જળસ્તરમાં વધારો થયો છે. રવિવારે (9 જુલાઈ)ના રોજ હરિયાણાના હથિનીકુંડ બેરેજમાંથી પાણી છોડવામાં આવ્યું ત્યારથી યમુનાનું જળસ્તર ઝડપથી વધી રહ્યું છે. દિલ્હીમાં યમુના ખતરાના નિશાનને પાર કરી ગઈ છે. ખતરાના નિશાનની મર્યાદા 205.33 મીટર છે અને યમુનામાં પાણીનું સ્તર 206.24 મીટરને સ્પર્શી રહ્યું છે. જ્યારે ભારે પૂરનું સ્તર 207.49 મીટર છે. એવામાં દિલ્હીમાં પૂરની સંભાવના વધી ગઈ છે, કારણ કે યમુના આ નિશાનથી માત્ર એક મીટર દૂર છે.

દિલ્હી બાદ હવે મથુરામાં એલર્ટ
પહાડી વિસ્તારોમાં અવિરત વરસાદ અને હથિની કુંડમાંથી છોડવામાં આવતા પાણીને જોતા મથુરામાં જિલ્લા વહીવટીતંત્રને એલર્ટ કરી દેવામાં આવ્યું છે. મથુરાના પ્રયાગ ઘાટ પર યમુનાનું જળસ્તર 164.06 મીટરે પહોંચી ગયું છે. યમુનાના જળસ્તરમાં સતત વધારાને ધ્યાનમાં રાખીને ગોકુલ બેરેજથી આગ્રા તરફ વધારાનું પાણી છોડવામાં આવી રહ્યું છે. જિલ્લા પ્રશાસને પૂરને પહોંચી વળવા એક્શન પ્લાન તૈયાર કર્યો છે. યમુનાને અડીને આવેલા વિસ્તારોમાં 40 ફ્લડ પોસ્ટ બનાવવામાં આવશે. યમુનાના જળસ્તરમાં વધારો થવાને કારણે મથુરામાં છટા, સદર, મંત અને મહાવન તાલુકા પ્રભાવિત થયા છે. જિલ્લા પ્રશાસને પૂર પ્રભાવિત ગામોને ત્રણ કેટેગરીમાં વહેંચ્યા છે. જેમાં નીચા પૂર, મધ્યમ પૂર અને ઉચ્ચ પૂર સ્તરે ગામોની પસંદગી કરવામાં આવી રહી છે.