દેશમાં ફરી કોરોનાનું સંક્રમણ વધ્યું, છેલ્લા 24 કલાકમાં 15 લોકોએ ગુમાવ્યો જીવ

નવી દિલ્હી: ભારતમાં ફરી એકવાર કોરોના વાયરસનું સંક્રમણ ઝડપથી ફેલાઈ રહ્યું છે. દેશમાં દરરોજ કોરોનાના સેંકડો નવા કેસ સામે આવી રહ્યા છે, જેના કારણે સામાન્ય લોકોની સાથે સાથે સરકારની ચિંતા વધી ગઈ છે. સ્વાસ્થ્ય મંત્રાલય દ્વારા મંગળવારે જાહેર કરાયેલા આંકડા અનુસાર, ભારતમાં છેલ્લા 24 કલાકમાં કોરોનાના 5,676 નવા કેસ સામે આવ્યા છે. જેના કારણે દેશમાં સક્રિય કોરોના દર્દીઓની સંખ્યા વધીને 37,093 થઈ ગઈ છે.

છેલ્લા 24 કલાકમાં દેશમાં 3,761 લોકો સાજા થયા છે, જેના કારણે સાજા થયેલા લોકોની કુલ સંખ્યા વધીને 4,42,00,079 થઈ ગઈ છે. હાલમાં, દૈનિક પોઝિટીવીટી રેટ વધીને 2.88 ટકા થયો છે. આ સાથે વિકલી પોઝિટીવીટી રેટ 3.81 ટકા છે. આ દરમિયાન કોરોનામાંથી સાજા થવાનો દર 98.73 ટકા છે.

કોરોનાના નવા કેસ ડિટેક્ટ કરવા માટે અત્યાર સુધીમાં કુલ 92.30 કરોડ કોવિડ ટેસ્ટ કરવામાં આવ્યા છે. છેલ્લા 24 કલાકમાં 1,96,796 પરીક્ષણો કરવામાં આવ્યા હતા. રાષ્ટ્રવ્યાપી રસીકરણ અભિયાન હેઠળ, અત્યાર સુધીમાં કુલ 220.66 કરોડ રસીના ડોઝ  આપવામાં આવ્યા છે. છેલ્લા 24 કલાકમાં 358 ડોઝ આપવામાં આવ્યા હતા.છેલ્લા 24 કલાકમાં વધુ 15 દર્દીઓના મોત થયા છે. જેમાંથી 6 દર્દીઓ કેરળના હતા.

આ પણ વાંચો: ગેંગસ્ટર અતીક અહેમદને લઈ યુપી પોલીસના ફરી ગુજરાતમાં ધામા, જાણો શું છે મામલો

સોમવારે કોરોનાને લઈને કેટલીક હોસ્પિટલોમાં મોકડ્રીલ પણ યોજાઈ હતી અને કેન્દ્રીય સ્વાસ્થ્ય મંત્રીએ તૈયારીઓની સમીક્ષા પણ કરી હતી. કેટલીક રાજ્ય સરકારોએ લોકોને સાવચેત રહેવા અને સાવચેતી રાખવાની સલાહ પણ આપી છે. માસ્ક પહેરવા અને ભીડવાળી જગ્યાઓથી દૂર રહેવાની પણ સલાહ આપવામાં આવી રહી છે. હરિયાણા સરકારે જાહેર સ્થળોએ જ્યાં 100 થી વધુ લોકોનો મેળાવડો હોય, સરકારી કચેરીઓ, મોલ વગેરેમાં નાગરિકો માટે ફેસ માસ્ક પહેરવાનું ફરજિયાત બનાવ્યું છે. પુડુચેરીમાં, નાગરિકો માટે તાત્કાલિક અસરથી દરિયાકિનારા, રસ્તાઓ, ઉદ્યાનો અને થિયેટરો જેવા જાહેર સ્થળોએ માસ્ક પહેરવાનું ફરજિયાત કરવામાં આવ્યું છે.