જમ્મુ-કાશ્મીરમાં વૈષ્ણો દેવી દર્શને જઈ રહેલા યાત્રાળુઓની બસ ખીણમાં પડતા 10નાં મોત, અનેક ઈજાગ્રસ્ત

જમ્મુ-કાશ્મીર: જમ્મુ-કાશ્મીરમાં મંગળવારે સવારે એક મોટો અકસ્માત થયો હતો. એક બસ ઊંડી ખીણમાં પડી, જેમાં અનેક મુસાફરોના મોત થયા. તે જ સમયે, ઘણા લોકોને સારવાર માટે હોસ્પિટલમાં દાખલ કરવામાં આવ્યા છે. અત્યાર સુધીમાં 10 લોકોના મોત થયા છે. આ ઘટના જમ્મુ-શ્રીનગર નેશનલ હાઈવે પર બની હતી, જ્યારે મુસાફરોથી ભરેલી બસ ઊંડી ખીણમાં પડી હતી. અધિકારીઓના જણાવ્યા અનુસાર બસ અમૃતસરથી કટરા જઈ રહી હતી, જેમાં મોટાભાગના મુસાફરો વૈષ્ણોદેવીના દર્શન કરવા જઈ રહ્યા હતા. તમામ મુસાફરો બિહારના રહેવાસી હતા. પંચનામા બાદ મૃતદેહોને પોસ્ટમોર્ટમ માટે મોકલી આપવામાં આવ્યા છે. ત્યાં ઘાયલોની સારવાર ચાલી રહી છે. પોલીસે અકસ્માતની તપાસ શરૂ કરી છે.

પોલીસે જણાવ્યું કે, બસ અકસ્માત જમ્મુ જિલ્લાના કટરાથી લગભગ 15 કિમી દૂર ઝજ્જર કોટલી પાસે થયો હતો. જમ્મુના ડેપ્યુટી કમિશનર (DC) અવની લવાસાએ માહિતી આપી હતી કે, 10 લોકો માર્યા ગયા છે, અને 4 અન્ય લોકો ગંભીર રીતે ઘાયલ છે. બસ અમૃતસરથી કટરા તરફ જઈ રહી હતી.

ઇજાગ્રસ્તને જીએમસી જમ્મુમાં દાખલ કરવામાં આવ્યો
પોલીસે જણાવ્યું કે ગંભીર રીતે ઘાયલ લોકોને જીએમસી જમ્મુ લાવવામાં આવ્યા છે. અન્ય 12 લોકોને સ્થાનિક જાહેર આરોગ્ય કેન્દ્રમાં દાખલ કરવામાં આવ્યા છે. પોલીસે જણાવ્યું કે આ ઘટના કેવી રીતે બની, તેની જાણકારી હજુ મળી નથી. હાલ મામલો નોંધી વધુ તપાસ હાથ ધરી છે. જાગૃત મુસાફરોની પૂછપરછ કરવામાં આવી રહી છે. બસ સફેદ અને ગુલાબી રંગની હતી જેના પર પ્રિન્સ ટ્રાવેલ્સ લખેલું હતું.