જંતર-મંતર પર અડધી રાત્રે હંગામો, વિનેશનો પોલીસ પર જીવલેણ હુમલાનો આરોપ, અમિત શાહને લખાયો પત્ર

દિલ્હી: દિલ્હીના જંતર-મંતર પર કુસ્તીબાજોના ચાલી રહેલા ધરણામાં 3જી અને 4મી મેએ અડધી રાત્રે હંગામો થયો હતો. કુસ્તીબાજોએ મારપીટનો પણ આક્ષેપ કર્યો છે. આ ઘટનામાં એક રેસલર ઘાયલ થયાના પણ સમાચાર છે. ઘટના બાદ દિલ્હી મહિલા આયોગના વડા સ્વાતિ માલીવાલ, દિલ્હી સરકારના મંત્રી સૌરભ ભારદ્વાજ, ધારાસભ્ય કુલદીપ અને અન્ય ઘણા નેતાઓ જંતર-મંતર પહોંચ્યા, જેમને દિલ્હી પોલીસે કસ્ટડીમાં લીધા હતા.

વાસ્તવમાં, જંતર-મંતર પર કુસ્તીબાજોના ચાલી રહેલા ધરણામાં સોમનાથ ભારતી ફોલ્ડિંગ બેડ લઈને પહોંચ્યા ત્યારે હંગામો શરૂ થયો હતો. સોમનાથ ભારતીએ આ માટે પરવાનગી લીધી ન હતી. આના પર દિલ્હી પોલીસે તેને રોક્યા હતા. પોલીસકર્મીઓ દ્વારા રોકવામાં આવ્યા બાદ ત્યાં હાજર સોમનાથ ભારતીના સમર્થકો ઉશ્કેરાઈ ગયા અને ટ્રકમાંથી બેડ બહાર કાઢવાનો પ્રયાસ કરવા લાગ્યા.

આ દરમિયાન પોલીસ અને સોમનાથ ભારતીના સમર્થકો અને કુસ્તીબાજો વચ્ચે ઉગ્ર બોલાચાલી થઈ હતી. દિલ્હી પોલીસે સોમનાથ ભારતીને અન્ય બે લોકો સાથે કસ્ટડીમાં લીધા છે. આ અંગે કુસ્તીબાજોનું કહેવું છે કે પાણી ભરાઈ ગયું છે. સૂવાની જગ્યા નથી. ધર્મેન્દ્ર (પોલીસમેન) ધક્કો મારવા લાગ્યો. અન્ય પોલીસકર્મી દારૂ પી રહ્યો છે. શું આ દિવસ જોવા માટે મેડલ લાવ્યા હતા?

વિનેશ ફોગાટની દિલ્હીના પોલીસ કમિશનરને ફરિયાદ
મહિલા રેસલરે પત્ર લખીને પોલીસકર્મીઓ પર જીવલેણ હુમલાનો આરોપ લગાવ્યો છે. વિનેશે પોલીસ કમિશનરને કરેલી ફરિયાદમાં આરોપ લગાવ્યો છે કે વરિષ્ઠ ACP ધર્મેન્દ્રએ જંતર-મંતર ખાલી કરવા માટે વિરોધ કરી રહેલા કુસ્તીબાજોને પણ ધમકી આપી હતી. વિનેશે સિનિયર એસીપી ધર્મેન્દ્ર પર પોતાની સાથે દુર્વ્યવહાર કરવાનો આરોપ પણ લગાવ્યો છે અને પોલીસ કમિશનરને તમામ પોલીસકર્મીઓ સામે કાર્યવાહી કરવાની માંગ કરી છે.

બજરંગ પુનિયાએ ગૃહમંત્રીને પત્ર લખ્યો
તો, બજરંગ પુનિયાએ ગૃહમંત્રી અમિત શાહને પત્ર લખ્યો છે. બજરંગ પુનિયાએ ગૃહમંત્રી અમિત શાહને પત્ર લખીને તેમની સામે ચાર માંગણીઓ મૂકી છે. બજરંગ પુનિયાએ ગૃહમંત્રી પાસે કુસ્તીબાજો પર હુમલો કરનારા પોલીસકર્મીઓ સામે કાર્યવાહી કરવા, વોટરપ્રૂફ ટેન્ટ લગાવવાની મંજૂરી આપવાની પણ માંગ કરી છે.

કુસ્તીબાજોનું એમ પણ કહેવું છે કે મારવા હોય તો એમ જ મારી નાખો. બ્રિજભૂષણ જેવા લોકો ખુલ્લામાં ફરે છે. જંતર-મંતર પર હાજર કુસ્તીબાજોએ દરેકને સવારે ધરણાં સ્થળ પર પહોંચવાની અપીલ કરી છે. આ ઘટના બાદ દિલ્હીની સત્તારૂઢ આમ આદમી પાર્ટીએ કેન્દ્રમાં રહેલી ભારતીય જનતા પાર્ટી (BJP) વિરુદ્ધ મોરચો ખોલી દીધો છે.

જંતર-મંતર પર પહોંચેલી સ્વાતિ માલીવાલ કસ્ટડીમાં લેવાઈ
કુસ્તીબાજોના પ્રદર્શન દરમિયાન મધ્યરાત્રિના હંગામા પછી, દિલ્હી મહિલા આયોગના વડા સ્વાતિ માલીવાલે ટ્વિટ કર્યું કે તે જંતર-મંતર પહોંચી રહી છે. સ્વાતિ માલીવાલને ધરણા સ્થળ પહેલા જ દિલ્હી પોલીસે રોકી હતી. દિલ્હી પોલીસે સ્વાતિ માલીવાલને કસ્ટડીમાં લીધા છે.

જલ્દી તૂટશે ભાજપનો ઘમંડ-સૌરભ
દિલ્હી સરકારના મંત્રી સૌરભ ભારદ્વાજે જંતર-મંતર ખાતેની ઘટનાને લઈને કેન્દ્ર પર પ્રહારો કર્યા હતા અને કહ્યું હતું કે સરકારે મહિલા કુસ્તીબાજો સાથે યોગ્ય વર્તન કર્યું નથી. તેમણે કહ્યું કે શું આપણી બહેન-દીકરીઓ કાદવમાં સૂઈ જશે? શું તેમની પાસે ફોલ્ડિંગ બેડ પણ નહીં હોય? સૌરભ ભારદ્વાજે કહ્યું કે ભાજપનું અભિમાન ટૂંક સમયમાં તૂટી જશે.

જંતર-મંતર ખાતે મધરાતે બનેલી ઘટના બાદ રાજકારણ તેજ બન્યું છે. દિલ્હીની સત્તાધારી આમ આદમી પાર્ટીના ઘણા નેતાઓ જંતર-મંતર પહોંચ્યા. દિલ્હી પોલીસે કોઈને પણ વિરોધ સ્થળ પર પહોંચવા દીધા ન હતા. દિલ્હી સરકારના મંત્રી સૌરભ ભારદ્વાજ અને ધારાસભ્ય કુલદીપ પણ તેમના સમર્થકો સાથે વિરોધ સ્થળ પર પહોંચ્યા હતા.