બોલિવૂડ એક્ટ્રેસની કારનો ઈટલીમાં અકસ્માત, લેમ્બોર્ગિની કારે ફેરારીને ટક્કર મારતા દંપતીનું થયું મોત

Actress Gayatri Joshi Accident: શાહરૂખ ખાનની ફિલ્મ ‘સ્વદેશ’થી ડેબ્યૂ કરનાર બોલિવૂડ અભિનેત્રી ગાયત્રી જોશીની કારને ઈટાલીમાં અકસ્માત નડ્યો હતો. આ દરમિયાન તે તેના પતિ વિકાસ ઓબેરોય સાથે લેમ્બોર્ગિનીમાં મુસાફરી કરી રહી હતી. જોકે, બંને જણ નાસી છૂટ્યા હતા. પરંતુ આ અકસ્માતમાં ફેરારી કારમાં મુસાફરી કરી રહેલા સ્વિસ કપલનું મોત થયું હતું.

ઘટનાની જાણ થતા પોલીસ ઘટના સ્થળે પહોંચી આગળની કાર્યવાહી હાથ ધરી હતી. કહેવામાં આવી રહ્યું છે કે, અભિનેત્રી અને તેનો પતિ લક્ઝરી કાર્સ સાથે રેસ કરી રહ્યા હતા.

ટક્કર બાદ કાર રોડ પરથી ઉતરી ગઈ હતી

અહેવાલો અનુસાર, આ દુર્ઘટના ઇટાલીના સાર્ડિનિયાના એક વિસ્તારમાં બની હતી. ઘટના સમયે ગાયત્રી અને તેનો પતિ તેમની લેમ્બોર્ગિનીમાં મુસાફરી કરી રહ્યા હતા. તેની કારની પાછળ બીજી ઘણી લક્ઝરી કાર પણ દોડી રહી હતી. આ સમય દરમિયાન, એક મીની ટ્રકને ઓવરટેક કરતી વખતે, તેની કાર ફેરારી સાથે અથડાઈ હતી, જે બાજુમાં ચાલી રહેલી મીની ટ્રક સાથે અથડાઈ હતી. આ અથડામણને કારણે મિની ટ્રક પલટી ગઈ અને ફેરારીમાં આગ લાગી, જેના કારણે તેમાં મુસાફરી કરી રહેલા કપલનું મોત થયું.

મૃતક દંપતી સ્વિત્ઝર્લેન્ડના રહેવાસી હતા

મૃતકોની ઓળખ 63 વર્ષીય મેલિસા ક્રાઉટલી અને 67 વર્ષીય માર્કસ ક્રાઉટલી તરીકે થઈ છે, બંને સ્વિત્ઝર્લેન્ડના છે. ગાયત્રીએ એક ન્યૂઝ વેબસાઈટને જણાવ્યું કે વિકાસ અને હું ઈટાલીમાં છીએ. અમે અહીં એક અકસ્માત (મલ્ટી-કાર અથડામણ) નો શિકાર થયા છીએ. ભગવાનની કૃપાથી અમે બંને એકદમ ઠીક છીએ.

અકસ્માતનો એક વીડિયો પણ સામે આવ્યો છે, જે પાછળથી જઈ રહેલા વાહનના ડેશબોર્ડ પર લાગેલા કેમેરામાં રેકોર્ડ થયો છે. આ વીડિયોમાં સ્પષ્ટપણે જોઈ શકાય છે કે વીડિયો રેકોર્ડ કરી રહેલા વાહનને એક પછી એક કેટલા લક્ઝરી વાહનો ઓવરટેક કરે છે. ત્યાર બાદ થોડે આગળ જતાં એક મીની ટ્રકને ઓવરટેક કરતી વખતે તેને ટક્કર મારી હતી, જેના કારણે કાર અને ટ્રક બંને પલટી ગયા હતા.

માત્ર એક ફિલ્મ બાદ બોલિવૂડથી દૂરી

તમને જણાવી દઈએ કે ગાયત્રી જોશીએ 2004માં ફિલ્મ ‘સ્વદેશ’થી બોલિવૂડમાં ડેબ્યૂ કર્યું હતું. તેણે શાહરૂખ સાથે મુખ્ય ભૂમિકા ભજવી હતી. તેની એક્ટિંગના પણ ખૂબ વખાણ થયા હતા. જો કે, માત્ર એક જ ફિલ્મ ‘સ્વદેશ’ કર્યા પછી, તેણે પોતાની જાતને અભિનયથી દૂર કરી અને ઓબેરોય કન્સ્ટ્રક્શનના મેનેજિંગ ડિરેક્ટર વિકાસ ઓબેરોય સાથે લગ્ન કર્યા.

ત્યારથી તે બોલિવૂડથી દૂર જોવા મળી રહી છે. તેણે 1999માં ફેમિના મિસ ઈન્ડિયા કોમ્પિટિશનમાં ભાગ લઈને તેની કારકિર્દીની શરૂઆત કરી હતી. આગામી વર્ષે 2000 માં, તેણીએ મિસ ઈન્ડિયા ઈન્ટરનેશનલનો ખિતાબ જીત્યો, જેણે તેને જાપાનમાં મિસ ઈન્ટરનેશનલ 2000 માં ભારતનું પ્રતિનિધિત્વ કરવાની તક આપી.