ભોજપુરી અભિનેત્રી આકાંક્ષા દુબેએ ટૂંકાવ્યું જીવન, વારાણસીની હોટલમાં લગાવી ફાંસી

આકાંક્ષા ભદોહી જિલ્લાના ચૌરી પોલીસ સ્ટેશન વિસ્તાર હેઠળના પારસીપુરની રહેવાસી હતી. તે ભોજપુરી ઈન્ડસ્ટ્રીનો જાણીતો ચહેરો હતો. આકાંક્ષાએ ‘વીરોં કે વીર’ અને ‘કસમ બદના વાલે કી 2’ નામની ફિલ્મોમાં કામ કર્યું હતું. અભિનેત્રીએ આ પગલું કેમ ભર્યું તે હજુ સુધી જાણી શકાયું નથી. આ સમાચાર આવ્યા બાદ ભોજપુરી ઈન્ડસ્ટ્રીમાં શોકની લાગણી ફેલાઈ ગઈ છે. આનાથી બધાને મોટો આંચકો લાગ્યો છે. આકાંક્ષા દુબે ત્રણ વર્ષની ઉંમરે તેના માતા-પિતા સાથે મુંબઈ શિફ્ટ થઈ ગઈ હતી. તેના માતા-પિતા તેને IPS ઓફિસર બનાવવા માંગતા હતા, પરંતુ તેમનું મન ડાન્સ અને એક્ટિંગમાં હતું.

આકાંક્ષા દુબે ભદોહીની રહેવાસી હતી અને તેની ગણતરી ઉત્તર પ્રદેશના જાણીતા કલાકારોમાં થતી હતી. આકાંક્ષાએ ભોજપુરી સિનેમા, સંગીત અને ફિલ્મોમાં પણ કામ કર્યું હતું. ઉત્તર પ્રદેશ ઉપરાંત દેશભરમાં તેની સારી ફેન ફોલોઈંગ છે. આકાંક્ષા પણ ઈન્સ્ટાગ્રામ પર રીલ્સ બનાવતી હતી.

 ટિક-ટોકથી કારકિર્દીની શરૂઆત કરી
કહેવામાં આવી રહ્યું છે કે આકાંક્ષા દુબેએ પોતાના કરિયરની શરૂઆત સોશિયલ પ્લેટફોર્મ ટિક-ટોકથી કરી હતી. લોકોને ટિક-ટોક પર આકાંક્ષાની ટેલેન્ટ પસંદ આવી અને તેની ફેન ફોલોઈંગ જબરદસ્ત બની ગઈ. બાદમાં, આકાંક્ષાએ ભોજપુરી ફિલ્મ ઉદ્યોગમાં પ્રવેશ કર્યો અને એકથી વધુ ભોજપુરી ગીતો અને ફિલ્મોમાં કામ કર્યું. જે લોકોને ખૂબ પસંદ આવી હતી.