મને સંસદમાં બોલવા દેવાશે નહી માટે હું આજે પત્રકાર પરિષદમાં સરકારને ખુલ્લી પાડીશ: રાહુલ ગાંધી

નવી દિલ્હી : સંસદમાં હોબાળા વચ્ચે રાહુલ ગાંધીએ ગુરુવારે પ્રેસ કોન્ફરન્સ કરી હતી. આ દરમિયાન તેમણે અદાણી અને પીએમ નરેન્દ્ર મોદી વચ્ચેના સંબંધો પર સવાલ ઉઠાવ્યા હતા. તેમણે કહ્યું કે તેમને સંસદમાં બોલવા દેવામાં નથી આવી રહ્યા. તેમણે કહ્યું કે મેં તાજેતરમાં સંસદમાં જે ભાષણ આપ્યું હતું તેને સંસદની કાર્યવાહીમાંથી હટાવી દેવામાં આવ્યું હતું. બ્રિટનમાં રાહુલ ગાંધીના નિવેદન પર સંસદમાં હોબાળો થયો છે. દરમિયાન રાહુલ ગાંધી યુકેના પ્રવાસેથી ભારત પરત ફર્યા છે. તેઓ ગુરુવારે સંસદ પહોંચ્યા હતા. આ પછી તેમણે લગભગ સાડા ત્રણ વાગ્યે પ્રેસ કોન્ફરન્સ કરીને સરકાર પર આકરા પ્રહારો કર્યા હતા. તેમણે કહ્યું કે સરકાર અદાણી મુદ્દાથી ડરી રહી છે. તેમણે કહ્યું કે હું આજે સંસદ ગયો અને સ્પીકરને મળ્યો. મેં સ્પીકરને કહ્યું કે હું સંસદમાં બોલવા માંગુ છું, હું મારી વાત રજુ કરવા માંગુ છું.

સરકાર અને તેમના મંત્રીઓ વિપક્ષને બોલવા દેવા નથી માંગતા
સરકારના ચાર મંત્રીઓએ ગૃહમાં મારા પર આક્ષેપો કર્યા છે, તેથી મને મારા મનની વાત કહેવા દેવી જોઈએ. જોકે મને લાગે છે કે મને સંસદમાં બોલવા દેવામાં આવશે નહીં. તેમણે કહ્યું કે આજે મારા આગમનના 1 મિનિટ બાદ ગૃહ સ્થગિત કરવામાં આવ્યું હતું. મેં સંસદમાં અદાણી અને નરેન્દ્ર મોદી વિશે જે ભાષણ આપ્યું હતું તેને કાર્યવાહીમાંથી હટાવી દેવામાં આવ્યું હતું અને તે ભાષણમાં એવું કંઈ નહોતું જેને હટાવવું પડે. મેં આ બધી વાતો જાહેર રેકોર્ડ, લોકોના નિવેદનો અને અખબારોમાંથી કાઢીને કહી હતી. રાહુલે કહ્યું કે આ સમગ્ર મામલો લોકોનું ધ્યાન હટાવવાનો પ્રયાસ કરવામાં આવી રહ્યો છે. સરકાર અદાણીના મુદ્દાથી ગભરાઇ રહી છે. તેથી જ તે આ બધા ષડયંત્રો કરી રહી છે.

અદાણી અને નરેન્દ્ર મોદી વચ્ચે શું સંબંધ છે?
રાહુલ ગાંધીએ ફરી સરકારને સવાલો કર્યા હતા કે, અદાણી અને નરેન્દ્ર મોદી વચ્ચે શું સંબંધ છે? – સંરક્ષણ કોન્ટ્રાક્ટ ગૌતમ અદાણીને જ કેમ આપવામાં આવે છે? શું હતું શ્રીલંકા અને બાંગ્લાદેશમાં ચર્ચા, કેમ થયું, કોણે કર્યું?પરંતુ અહીં પહોંચીને કેમ્બ્રિજ સહિતના તમામ કાર્યક્રમોમાં ભાગ લીધો હતો. બ્રિટનની મુલાકાતે આવેલા રાહુલ ગાંધીના નિવેદનને લઈને ભારતમાં રાજકીય ખળભળાટ મચી ગયો છે. છેલ્લા બે દિવસથી સંસદમાં રાહુલના મુદ્દે કોંગ્રેસ અને સત્તાધારી ભાજપ સામસામે છે. જ્યાં ભાજપ રાહુલને માફી માંગવાનું કહી રહી છે અને કોંગ્રેસે પણ સ્પષ્ટ કર્યું છે કે, રાહુલના નિવેદન પર માફી માંગવાનો સવાલ જ નથી.

રાહુલના કયા નિવેદનોથી હોબાળો થયો ?
લંડનમાં જર્નાલિસ્ટ એસોસિએશન દ્વારા આયોજિત એક કાર્યક્રમમાં રાહુલે કહ્યું હતું કે, જો યુરોપ કરતા ત્રણ કે ચાર ગણા કદના દેશમાં લોકશાહી ખતમ થઈ જાય તો તમે કેવી પ્રતિક્રિયા આપશો? વાસ્તવમાં ભારતમાં આવું બન્યું છે, પરંતુ કોઈ પ્રતિક્રિયા નથી આપી રહ્યું. આ એટલા માટે છે કારણ કે વ્યવસાય અને પૈસા મહત્વપૂર્ણ છે. અમેરિકા કરતાં ત્રણથી ચાર ગણી વસ્તીવાળા દેશમાં લોકશાહી ખતમ થઈ રહી છે અને તેને બચાવવાનો દાવો કરનારા અમેરિકા અને યુરોપ ચૂપચાપ જોઈ રહ્યા છે.આ એકલા ભારતની લડાઈ નથી. આ સમગ્ર લોકશાહીનો સંઘર્ષ છે. રાહુલના આ નિવેદન પર ભાજપે તેમના પર નિશાન સાધ્યું છે.આ પહેલા રાહુલે કેમ્બ્રિજમાં કહ્યું હતું કે ભારતમાં લોકશાહી ખતરામાં છે. અમે સતત દબાણ અનુભવીએ છીએ. વિપક્ષી નેતાઓ પર કેસ દાખલ કરવામાં આવી રહ્યા છે. મારી સામે ઘણા કેસ દાખલ કરવામાં આવ્યા હતા. આવા કેસોમાં કેસ દાખલ કરવામાં આવ્યા હતા, જે બિલકુલ બનતા નથી. અમે પોતાનો બચાવ કરવાનો પ્રયાસ કરી રહ્યા છીએ. મીડિયા અને ન્યાયતંત્ર કેદ થઈ ગયું છે. દલિતો અને લઘુમતીઓ, આદિવાસીઓ પર હુમલા થઈ રહ્યા છે.