ડ્રોન હુમલામાં અલ-કાયદાના વડા અલ-ઝવાહિરી ઠાર

અમેરિકાએ ડ્રોન હુમલામાં અલ-કાયદાના વડા અલ-ઝવાહિરીનો ખાતમો કર્યો છે. અલ ઝવાહિરી (71 વર્ષ) ઓસામા બિન લાદેનના મૃત્યુ પછી આતંકવાદી સંગઠન અલ કાયદાનો નેતા હતો. તે ઝવાહિરી કાબુલમાં એક ઘરમાં છુપાયો હતો. અમેરિકી રાષ્ટ્રપતિ જો બિડેને અલ-ઝવાહિરીના મોતની પુષ્ટિ કરી છે. અમેરિકી રાષ્ટ્રપતિ જો બિડેને કહ્યું કે ઝવાહિરી 9-11ના કાવતરામાં સામેલ હતો. આ હુમલામાં 2977 લોકોના મોત થયા હતા. દાયકાઓથી તે અમેરિકનો પર હુમલાનો માસ્ટરમાઈન્ડ રહ્યો છે.

સીએનએનના અહેવાલ મુજબ ઝવાહિરીએ કાબુલમાં શરણ લીધી હતી. અમેરિકી અધિકારીઓના જણાવ્યા અનુસાર, તે ડ્રોન હુમલામાં માર્યો ગયો હતો. અમેરિકાએ આ હુમલા માટે બે હેલફાયર મિસાઈલનો ઉપયોગ કર્યો હતો. શનિવારે રાત્રે 9:48 કલાકે ડ્રોન હુમલો કરવામાં આવ્યો હતો. કહેવામાં આવી રહ્યું છે કે ઝવાહિરી પર હુમલા પહેલા બિડેને પોતાના કેબિનેટ અને સલાહકારો સાથે કેટલાક અઠવાડિયા સુધી બેઠક કરી હતી. એટલું જ નહીં, ખાસ વાત એ છે કે આ હુમલા સમયે કાબુલમાં એકપણ અમેરિકન હાજર નહોતો.

હક્કાની તાલિબાનના વરિષ્ઠ સભ્યો આ વિસ્તારમાં ઝવાહિરીની હાજરીથી વાકેફ હતા. અમેરિકન અધિકારીઓએ કહ્યું કે તે દોહા કરારનું સ્પષ્ટ ઉલ્લંઘન છે. તાલિબાને ઝવાહિરીની હાજરી છુપાવવાનો પણ પ્રયાસ કર્યો હતો. તાલિબાને પણ તેના છુપા ઠેકાણા સુધી કોઈ પહોંચી ન જાય તે માટે ખાસ ધ્યાન આપ્યું હતું. આ માટે તેના પરિવારના સભ્યોનું લોકેશન પણ બદલવામાં આવ્યું હતું. જો કે, યુએસએ સ્પષ્ટ કર્યું છે કે આ હુમલામાં તેમના પરિવારને ન તો નિશાન બનાવવામાં આવ્યા છે કે ન તો કોઈ નુકસાન થયું છે. એટલું જ નહીં, અમેરિકાએ તાલિબાનને આ મિશન વિશે માહિતી પણ આપી ન હતી.

ઝવાહિરી 11 વર્ષથી અલ કાયદાનું નેતૃત્વ કરી રહ્યો હતો. તે એક સમયે ઓસામા બિન લાદેનના અંગત ચિકિત્સક હતા. ઝવાહિરી ઈજિપ્તના એક પ્રતિષ્ઠિત પરિવારમાંથી આવે છે. તેના દાદા, રાબિયા અલ-ઝવાહિરી, કૈરોની અલ-અઝહર યુનિવર્સિટીમાં ઇમામ હતા. તેમના પરદાદા અબ્દેલ રહેમાન આઝમ આરબ લીગના પ્રથમ સચિવ હતા. એટલું જ નહીં, અમેરિકા પર આતંકવાદી હુમલાના માસ્ટરમાઈન્ડના કાવતરામાં ઝવાહિરીએ મદદ કરી હતી. 11 સપ્ટેમ્બર 2001ના રોજ અમેરિકા પર થયેલા હુમલા બાદ જવાહિરી છુપાઈ ગયો હતો. આ પછી, તે અફઘાનિસ્તાનના પર્વતીય તોરા બોરા ક્ષેત્રમાં અમેરિકી હુમલામાં બચી ગયો. જેમાં તેની પત્ની અને બાળકોના મોત થયા હતા.