ખાલિસ્તાની અમૃત પાલ અંગે અકાલ તખ્તની ઇમરજન્સી બેઠક, ટુંકમાં જ મોટો નિર્ણય થઇ શકે છે જાહેર

નવી દિલ્હી : શ્રી અકાલ તખ્તે ખાલિસ્તાન સમર્થક અમૃતપાલ સિંહને લઈને અમૃતસરમાં એક મોટી અને મહત્વપૂર્ણ બેઠક બોલાવી છે. 60 થી 70 શીખ સંગઠનો અને નિહંગ જૂથોને આ સંબંધમાં ભાગ લેવા માટે સંદેશ મોકલવામાં આવ્યો છે. આ બેઠકમાં અમૃતપાલ પર મોટો નિર્ણય લેવામાં આવી શકે છે. પંજાબ પોલીસ અને અન્ય એજન્સીઓ વારિસ પંજાબ દે સંગઠનના વડા અને ખાલિસ્તાન સમર્થક અમૃતપાલને પકડવા માટે જુદા જુદા રાજ્યોમાં તપાસ કરી રહી છે. જોકે, અત્યાર સુધી સુરક્ષા એજન્સીઓ અમૃતપાલ સુધી પહોંચવામાં નિષ્ફળ રહી છે. પોલીસથી બચવા માટે અમૃતપાલ સતત પોતાનું લોકેશન બદલી રહ્યો છે.

અમૃતપાલને લઈને ચાલી રહેલી ગતિવિધિઓ વચ્ચે 27મી માર્ચે શ્રી અકાલ તખ્ત સાહિબ અમૃતસર ખાતે એક મહત્વપૂર્ણ બેઠક યોજાઈ છે. આ બેઠકમાં વિવિધ શીખ સંગઠનો, ટંકશાળ, સંપ્રદાયો, સિંહ સભાઓના પ્રતિનિધિઓને બોલાવવામાં આવ્યા છે. આ બેઠકની અધ્યક્ષતા શ્રી અકાલ તખ્ત સાહિબના જથેદાર ગિયાની હરપ્રીત સિંહ કરશે. આમાં ભાગ લેવા માટે 60 થી 70 શીખ સંગઠનો અને નિહંગ જૂથોને સંદેશ મોકલવામાં આવ્યો છે.આ બેઠકમાં કોઈપણ રાજકીય પક્ષના પ્રતિનિધિઓ ભાગ લેશે નહીં. જે સંગઠનોના પ્રતિનિધિઓ આ બેઠકમાં પહોંચી શકતા નથી તેઓ તેમના લેખિત સૂચનો શ્રી અકાલ તખ્ત સાહિબના ઈ-મેલ પર મોકલી શકે છે. આ પછી જથેદાર મહત્વનો નિર્ણય લઈ શકે છે.સુરક્ષા એજન્સીઓને આશંકા છે કે અમૃતપાલ યુપી થઈને નેપાળ ભાગી શકે છે. આ જ કારણ છે કે પંજાબ, હરિયાણા, દિલ્હી અને ઉત્તરાખંડ બાદ હવે નેપાળમાં તેની શોધ શરૂ કરવામાં આવી છે. ઈન્ટેલિજન્સ બ્યુરો (IB), પંજાબ પોલીસ અને દિલ્હી પોલીસની ટીમ તેને નેપાળમાં શોધી રહી છે.

20 માર્ચે હરિયાણા બાદ અમૃતપાલ ક્યાં ગયો, પંજાબ પોલીસને કોઈ નક્કર સુરાગ મળી શક્યો નથી. જો કે, આ માહિતી સામે આવી છે કે 23 માર્ચે અમૃતપાલ યુપીના લખીમપુર ખેરીમાં હતો. અહીંથી નેપાળ બોર્ડરનું અંતર થોડા કલાકોનું છે.આવી સ્થિતિમાં તે નેપાળ ભાગી ન ગયો હોય તેવી આશંકા છે. તેથી નેપાળમાં પણ તેની શોધખોળ શરૂ કરવામાં આવી છે. બીજી તરફ અમૃતપાલના સહયોગીઓને આજે અજનાલા કોર્ટમાં રજૂ કરવામાં આવ્યા હતા. અહીં તેનું મેડિકલ કરવામાં આવ્યું હતું, જેના રિપોર્ટમાં તેના બે સાથી એચઆઈવી પોઝીટીવ હોવાનું બહાર આવ્યું હતું. આ માહિતી ‘વારિસ પંજાબ દે’ વતી કેસ લડી રહેલા એડવોકેટ બરિન્દર સિંહે આપી છે. તે જ સમયે, અકાલ તખ્તના જથેદાર હરપ્રીત સિંહે ભાગેડુ અમૃતપાલ સિંહને પોલીસ સમક્ષ આત્મસમર્પણ કરવા અને તપાસમાં સહયોગ કરવાની અપીલ કરી છે.