ગૃહમંત્રાલયનું મોટું એલાન : કેન્દ્રીય સશસ્ત્ર દળોની ભરતીમાં પૂર્વ અગ્નિવીરો માટે 10 ટકા પદ અનામત રખાશે

Agniveer Will Get 10 Percent Reservation : અગ્નિવીર માટે સારા સમાચાર છે. ગૃહ મંત્રાલયે અગ્નિવીરોના હિતોને ધ્યાનમાં રાખીને મોટો નિર્ણય લીધો છે. હવે અગ્નિવીરને અર્ધલશ્કરી દળોમાં 10 ટકા અનામત આપવામાં આવશે. CISF તેને તાત્કાલિક અમલમાં મૂકશે. તો આ સાથે અગ્નિવીરોને ફિઝિકલ પરીક્ષામાં પણ છૂટ મળશે. કહેવામાં આવી રહ્યું છે કે કેન્દ્રીય ઔદ્યોગિક સુરક્ષા દળ (CISF) એ આ અંગે તમામ પ્રકારની તૈયારીઓ કરી લીધી છે.

તમને જણાવી દઈએ કે અગ્નિવીરને લઈને સતત સવાલો ઉઠી રહ્યા છે. વિરોધ પક્ષ અગ્નિવીરોને સતત સમાન સુવિધાઓ આપવાની માંગ કરી રહ્યો છે. ત્યારે હવે ગૃહ મંત્રાલયના આ પગલાથી વિપક્ષને જવાબ મળશે અને અગ્નિવીરોને ફાયદો થશે.

અગ્નિવીરોને શારીરિક પરીક્ષામાંથી છૂટ અપાશે : CISF

CISF DG નીના સિંહે કહ્યું છે કે હવે કોન્સ્ટેબલની ભરતીમાં 10 ટકા પોસ્ટ્સ ભૂતપૂર્વ અગ્નિવીરો માટે અનામત રાખવામાં આવશે. સાથે જ તેમને શારીરિક કાર્યક્ષમતા પરીક્ષામાં છૂટ આપવામાં આવશે.

CISF DG નીના સિંહે કહ્યું છે કે ભૂતપૂર્વ અગ્નિવીરોને પણ વય મર્યાદામાં છૂટછાટ મળશે. આ વ્યવસ્થા CISF માટે પણ મહત્વની છે, કારણ કે તે CISFને પ્રશિક્ષિત, સક્ષમ અને જરૂરી મેનપાવર મળશે. આ ફોર્સમાં ડિસિપ્લિન હશે. તેવી જ રીતે તેનાથી પૂર્વ અગ્નિવીરોને CISFમાં સેવા કરવાની તક મળશે.

અગ્નિવીરોને ભરતીમાં 10 ટકા અનામત મળશે: BSF

આ અંગે બીએસએફ ડીજીનું નિવેદન પણ આવ્યું છે. બીએસએફના ડીજી નીતિન અગ્રવાલે કહ્યું છે કે અમે સૈનિકોને તૈયાર કરી રહ્યા છીએ. આનાથી સારું બીજું કંઈ ન હોઈ શકે. આનાથી તમામ દળોને ફાયદો થશે. અગ્નિવીરોને ભરતીમાં 10 ટકા અનામત મળશે.

અમારી પાસે પહેલા દિવસથી પ્રશિક્ષિત કર્મચારીઓ હશે: CRPF

CRPFના DG અનીશ દયાલ સિંહે કહ્યું છે કે CRPFમાં ભૂતપૂર્વ અગ્નિવીરોની ભરતી માટે તમામ વ્યવસ્થા કરવામાં આવી છે. અગ્નિવીરોએ સેનામાં રહીને શિસ્ત શીખી છે. આ સિસ્ટમ સાથે, અમારી પાસે પહેલા દિવસથી જ પ્રશિક્ષિત અને શિસ્તબદ્ધ કર્મચારીઓ હશે. CRPFમાં અગ્નિવીરોની પ્રથમ બેચને વયમર્યાદામાં 5 વર્ષની છૂટ આપવામાં આવશે.

10 ટકા જગ્યાઓ ભૂતપૂર્વ અગ્નિવીરો માટે અનામત : SSB

SSBના DG દલજીત સિંહે કહ્યું છે કે કોન્સ્ટેબલની 10 ટકા જગ્યાઓ ભૂતપૂર્વ અગ્નિવીરો માટે અનામત રાખવામાં આવી છે. પ્રથમ બેચને વયમર્યાદામાં 5 વર્ષની છૂટ આપવામાં આવશે. તેમને કોઈપણ શારીરિક કાર્યક્ષમતા પરીક્ષણમાંથી પસાર થવાની જરૂર રહેશે નહીં.

RPF ભૂતપૂર્વ અગ્નિવીરોને આવકારવા માટે ઉત્સાહિત

RPFના મહાનિર્દેશક મનોજ યાદવે પણ કહ્યું છે કે ભવિષ્યમાં રેલ્વે પ્રોટેક્શન ફોર્સમાં કોન્સ્ટેબલની પોસ્ટ માટેની તમામ ભરતીમાં ભૂતપૂર્વ અગ્નિવીરો માટે 10 ટકા અનામત હશે. આરપીએફ ભૂતપૂર્વ અગ્નિવીરોનું સ્વાગત કરવા માટે ખૂબ જ ઉત્સાહિત છે. આનાથી બળને નવી શક્તિ, ઉર્જા મળશે અને મનોબળ વધશે.